Yɔanɨ 4

Yeso ɔyakanakɔ nɔ muto Ɓasamalɨa

1Akɔ angbinga ngɨananɨ, Ɓafalisayɔ ɓɔ꞉ka ɨsaʉ ga Yeso anɨsoko ɓakpata, nɔ ɓatisa ɓombi tɨa ɓaja nɔgbɛ anagaaka Yɔanɨ. 2Ɨnadɔ, ɨyɔ ingainga a꞉ɓatisamʉ ɓombi. Yakamɛngana, ta ɓakpata ngʉɓangɔ, ɓa꞉ɓio akɔɓatisa. 3Ɨyɛ ndʉ Yeso ɔ꞉ka ɓanɨ, ɔ꞉tɔngwa inani anɔ Yudɛa, atɔa tɨa kʉ anɔ Galilaya.

4Akɔɓɔya inani, ya꞉ɓio anɨtanɨa ɓɔ ɨchana ɨngbaa ta aihoi yɔ Samalɨa.

5Kʉdɔ, Yeso a꞉ɓɔya agʉlʉ mʉngana wɔ Samalɨa, ino ɓɔ Sikali. Gʉlʉ ngɨananɨ, a tinene nɔ kʉbaa ngɨa Yakɔɓɔ a꞉njo jɛnɛ mwana angɔ Yɛjɛfʉ.#popoko Mʉkp 33:19; Yɔs 24:32 6Ɨkɔ ngɨyɔ Yakɔɓɔ ya꞉ɓio inani. Ɨyɛ Yeso ɛ꞉ka, nɔ bɔmba yɔ kyɛnda, ga ɨyɔ ɓɔ jikomu, ananɨ anambamba ɔ ɨkɔ ngɨyɛnɛnɨ. Ɨpa ya꞉ɓio tɨa amusoti.

7Kʉdɔ, moi mʉngana, muto Ɓasamalɨa, ɛ꞉ka atʉka mipo. Ga Yeso nayɔ ɓɔ: «Anenjo ɓaka mipo kɔta mamwɛ.» 8(Angbinga ngɨyananɨ, ɓakpata ngʉɓangɔ, ɓa꞉ɓio ɓɔseni agʉlʉ akayanakɨa madyo.) 9Ga muto Ɓasamalɨa ngɨananɨ nayɔ ɓɔ: «Yɔkwa tanɨ, ʉwɛ Muyuda nɛmɨ anɨta ɨmɨ, muto Ɓasamalɨa mipo?» (Nʉkana yangɔmʉ ati ɔ Ɓayuda nɔ Ɓasamalɨa.) 10Yeso ɔmʉtosio ɓɔ: «Wɔɓieni pɛngɛ anɨmbɨa apɛpɛ ngɨa Asɔɓɨɨ eneni anenjo, nɔ anɨmbɨa mombi ngɨa anɔwɛ anʉngɨa ɓɔ: ‹Aninjo ɓaka mipo kɔta mamwɛ›, ambɔ ʉwɛ akɛ, wɔmɨtɔ mipo, nɔ ambɔ ɔnenjo mipo ngʉka kenjo uɓei.» 11Kʉdɔ moi ngɨananɨ, a꞉ɓio nayɔ ɓɔ: «Ha Makwɔɓɨɨ, andɔ wangɔmʉ pɔ nɔ ɨkyɛmʉ ngɨyɛ watʉka nayɔ mipo kʉɓanɨ, amati ɔ ɨkɔ yɛta ɗu ngɨyɛ. Ʉwɛ, wagbʉka tɨa mipo ngʉkɔnanɨ kenjo uɓei gbanɨ? 12Ɨkɔ ngɨyɛ, ya maɓɨɨ ngʉwa kuku Yakɔɓɔ, a꞉tɨsɨa isu nawɔ. Ɨyɔ makwɔngɔ, a꞉mwa jɛnɛ mipo kɔngɔ kʉ mwanɨ, nɔ ɓana ɓangɔ, ɨhɔ kʉ nɔ mitunduga yɔ ɓanama ngʉɓangɔ. Ʉwɛ, wa ndɨ asɨkana ndʉ mombi ata mʉja nayɔ anagaaka, ɨyɔ kuku Yakɔɓɔ?» 13Yeso ɔ꞉mutosio ɓɔ: «Mombi ɔmweni mipo ngʉka, a꞊kwa ɓata mʉsasa wɔ mipo mbise ta kwanɨ. 14Yakamɛngana, mombi ngɨa a꞊mwa mipo ngʉka ɨmɨ na꞊minjo, a꞊ngɔkwa sina ɓata mʉsasa wɔ mipo pɔ bele. Mipo ngʉka ɨmɨ na꞊minjo, kɛ꞊ka aɓio tɨa ɨkpakpa yɔ lisini ngɨyɛ yenjo uɓei ngʉwɔ mago nɔ mago.» 15Ga moi ngɨananɨ nayɔ ɓɔ: «Hii Makwɔɓɨɨ, enjo ɓaka ɨmɨ mipo ngʉkɔnanɨ iyani, iɗo ambɔ na꞊tɨkwamʉ sina ɓata mʉsasa wɔ mipo, nɔ, nɔsɨa ɓɔmbana anɨkaka atʉka mipo aka tɨa sɨanɨ.» 16Ga Yeso nayɔ ɓɔ: «Sa anɨsoko aɓaʉ, nɔ nɛka nayɔ aka!» 17Moi ɔ꞉mutosio ɓɔ: «Ɨmɨ, nangɔmʉ nɔ gue.» Kʉdɔ Yeso ɔ꞉musigio ɓɔ: «Wɔsugo ingono ɓɔ: ‹Ɨmɨ, nangɔmʉ nɔ gue.› 18Dɔ, wa꞉sɨkana jɛnɛ nɔ ɓague ɓɔkʉ. Nɔ, ɨyakɛ nánayɔ ɓʉɓʉnʉ, angɔmʉ gue asɔɔ kʉɓanɨ. Wɔ꞉ngakɔ ananɨ ta ingono.» 19Ga moi nayɔ ɓɔ: «Makwɔɓɨɨ, ɨmɨ nanɨna ɓɔ ʉwɛ, wa ta ɨgbɛ. 20Ɓakuku ngʉɓeso, ɓa꞉ɓio jɛnɛ akɔbibiso Asɔɓɨɨ akʉʉ ɔ ɨkpangba ngɨyɛ. Yakamɛngana, inu Ɓayuda, násugo tɨa ga ɨda yɔ bibiso Asɔɓɨɨ, ya anɔ Yelusalɛma.» 21Ga Yeso nayɔ ɓɔ: «Moi ngɨa, ɓio nɔ baya akʉʉ asɛmɨ. Ya꞊ɓio sina nɔ angbinga mʉngana ɨyakɛ, ná꞊bibiso-ɔɔ Asɔɓɨɨ, sɔkɔmʉ akʉʉ ɔ ɨkpangba ngɨyɛ, gʉtʉ pɔ anɔ Yelusalɛma kʉɓanɨ. 22Inu, nákɔbibiso ɨkyɛmʉ ngɨyɛ nangɔmʉ anɨmbɨa. Isu, tanɨmbɨa ɓɔ, takɔbibiso ɨmanɨ, dɔ, ɓʉhɛa ɓakɔchwɛanɨa ɨngbaa aƁayuda. 23Yakamɛngana, angbinga a suo anɨka, nɔ angbinga ɔngɔ ɔndanɔ tɨa ʉndananɨ, ɨyakɛ ɓombi ngʉɓa ɓabibiso nɔ ingono, ɓa꞊mubibiso suo Aba ɨngbaa amʉtɨma nɔ ingono. Dɔ Aba akʉnda ɨyɔ, ɨkananja yɔ ɓombi ngʉɓa ɓamubibiso ɓanɨ. 24Asɔɓɨɨ a Mʉtɨma, nɔ yɔkwananɔ ɓɔ ɓombi ngʉɓa ɓa nayɔ akɔbibiso, ɓimubibiso kʉ ɨngbaa amʉtɨma nɔ ingono.» 25Ga moi nayɔ ɓɔ: «Ɨmɨ, nanɨmbɨa iɗo ɓɔ Masia anɨka, ɨyakɛ ɓamisoko ɓɔ Klisito. Angbinga ngɨa, ɨyɔ ɛ꞊ka sina-ɔɔ, a꞊tɨngakɨa yaka ta iɓomu.» 26Ga Yeso nayɔ ɓɔ: «Ɨmɨ, Masia ɨyakɛ tayakanaka nɔwɛ-a!»

27Akɔ angbinga ngɨananɨ, ɓakpata ngʉɓangɔ ɓe꞉joo ga buu. Kʉdɔ, yɔ꞉ɓʉkyaka anɨna ɓɔ Yeso akɔyakanaka nɔ moi. Yakamɛngana, Sɔkɔmʉ mombi pɔ mʉngana ati eɓo, ɨmuɓokuo moi ngɨananɨ ɓɔ akʉnda ɨmanɨ, nɔ sɔkɔmʉ ɓiɓokuo Yeso kʉɓanɨ ɓɔ, ɓayakanaka nayɔ dɔtanɨ? 28Moi ngɨananɨ a꞉sia kpɛngʉ ngɨangɔ tɨta ananɨ, nɔ ɔ꞉sa amati ɔ gʉlʉ, nɔ ɔ꞉pʉnga anʉngakɨa ɓombi ɓɔ: 29«Ɨkeni anɨna gue ngɨa, ɔ꞉naɓɨakɨɔ ɨmɨ yaka ta iɓomu ngɨyɛ, na꞉ɨkɨa! Ambɨ dɔ ɓʉnʉnʉ tɨa Masia ɨyananɨ?» 30Kʉdɔ, ɓombi ɓa꞉ngwɨa kyɛnda anɨsa inani Yeso a꞉ɓio-ɛɛ.

31Angbinga ngɨananɨ, ga ɓakpata nayɔ ɓɔ: «Mʉpananakɨa, dya ɓaka-sɨ tɨa mwana ɔ ɨkyɛmʉ!» 32Yakamɛngana, ɔɓʉtosio ɓɔ: «Inu, nángɔmʉ anɨmbɨa idyo ngɨyɛ ɨmɨ, nɔkwananɔ anɨdya.» 33Ɓakpata ɓɔ꞉pʉnga yakanaka ati eɓo ɓɔ: «Mombi ɔ꞉mɨkɨɔ ndɨ dɔ nɔ ɨkyɛmʉ yɛta ɨdyɛ?» 34Ga Yeso naɓɔ ɓɔ: «Idyo ngɨyɛsɛmɨ, ya ta akyananakɨa ɓʉkʉnda ngʉɓɔ Mombi ngɨa a꞉natʉma, nɔ pipiso tɛa ngɨangɔ anapɨa ɓɔ nɨkɨa. 35Inu nɔ́huneni masɔɔ, nákyɔsugo ga mombi ɔhʉnakeni masɔɔ a꞊kʉbuoko ambise ɔ mai ɓɔgɨna. Yakamɛngana, ɨmɨ nanenu asigio ɓɔ, tɨneni ajwa, nɔ kangeni ɓakʉbaa, masɔɔ ka tɨa mɛtɨyɛ, nɔ aɓɛtakɨa tɨta nakɔ abuoko. 36Mombi ngɨa abuoko masɔɔ ngʉkɔnanɨ, ɛnɨanɨɔ ɨyɔ nɔ mʉkaya ngʉwangɔ tɨa ɛnɨanɨanɨ, nɔ masɔɔ kɔngɔ kaminjo uɓei ngʉwɔ mago nɔ mago. Kʉɓanɨ, mombi ngɨa ahʉnaka masɔɔ, nɔ ɨya abuoko, ɓakwa ɨgyagya tɨta ɨhɔ. 37Yaka ngɨyɛ, ɓakyɔsugo ɓɔ: ‹Mombi mʉngana ahʉnaka, nɔ ɨya ɔmɔ ɔbuoko›, ya ta ingono. 38Ɨmɨ, na꞉nɨtʉma abuoko masɔɔ akʉbaa ngɨa aki ná꞉kɨamʉ-ɛɛ tɛa. Yakamɛngana, ɓombi ngaɓɔmɔ ɓa꞉nɨkɨa tɛa, nɔ, inu, nɛ́꞉ka tɨta ajangɨa nɔ masɔɔ kɔngɔ.»

39Amati ɔ gʉlʉ ngɨananɨ, Ɓasamalɨa ɓaja ɓa꞉baya Yeso, anʉka ɨsaʉ yɔ yaka ngɨyɛ moi ngɨananɨ a꞉ɓusigio ɓɔ: «Ɔ꞉nangakɨɔ yaka ta iɓomu ngɨyɛ na꞉ɨkɨa.» 40Nɔ ɓata, angbinga ngɨa Ɓasamalɨa ɓa꞉sa-ɔɔ inani a꞉ɓio-ɛɛ, ɓɔ꞉mɨta ɓɔ biɓio baka-sɨ ɨhɔ naɓɔ ta ananɨ, kʉdɔ, ɓa꞉kwaa naɓɔ makwaa kapɨnɨ. 41Anʉka yaka ngɨyɛ ɨyɔ makwɔngɔ a꞉ɓio asugo, ɓombi ɓaja nɔgbɛ ɓɛ꞉ka ɓata nayɔ akɔbaya. 42Ga ɨɓɔ nɔ moi ngɨananɨ ɓɔ: «Isu, tɔbayanakɨɔmʉ, ta akʉʉ ɔ yaka ngɨyɛ wɔ꞉tɨngakɨɔ. Yakamɛngana, isu, ɓakʉɓɔngɔ tɔ꞉kɔ tɨa nɔ machwei, nɔ tanɨmbɨa ɓɔ ɨyɔ ingainga akɛ a Muheiso wɔ dɔdɔ.»

Yeso ɔheiso mwana ata gue ɔ ngama ɔ ɓasʉda

43Ambise ɔ makwaa kapɨnɨ, Yeso ɔ꞉ngwɨa kyɛnda anɨsa, anɔ Galilaya. 44Dɔ ɨyɔ makwɔngɔ, a꞉sugo ɓɔ: «Ɓangɔbibisomʉ ɨgbɛ yɔ Asɔɓɨɨ andaɓʉ.» 45Ɨyɛ ndʉ aɓɔya anɔ Galilaya, ɓombi ɓɔ Galilaya, ɓɔ꞉mʉtɛtɨa iɗo, dɔ ɨɓɔ ɓa꞉sa kʉ aɄmbɔ wɔ chwɛa abubaya, anɔ Yelusalɛma, nɔ ɓɛ꞉na nɔ mesu yaka iɓomu ngɨyɛ Yeso a꞉ɨkɨa inani. 46Kʉdɔ, ɓa꞉tɔa anɔ Kana amatɨ ɔ ihoi yɔ Galilaya, aki a꞉nacho-ɛɛ mipo akɔ ʉkyɛpʉ. Inani anɔ Kapalanaumu, ya꞉ɓio nɔ ngama ɔ ɓasʉda mʉngana, ɨya, mwana angɔ ata gue a꞉ɓio nɔ kaɓu. 47Angbinga ngɨa a꞉kɔ-ɔɔ ɓɔ Yeso ɔ꞉ngwɔ anɔ Yudɛa, nɔ ɔ꞉ɓɔyɔ tɨa ananɨ anɔ Galilaya, ɔ꞉sa nayɔ akɔgbʉka, nɔ ɔ꞉mʉndɨanɨa ɓɔ ɨsa ɓaka anɔ Kapalanaumu, nayɔ akɔheisio mwana ngɨangɔ, ɨya, a꞉ɓio tinene akio mʉtɨma. 48Yeso ɔ꞉musigio ɓɔ: «Inu nɔ́kenenimʉ ta ɓakɔkɔ, nɔ ɓayaka ɓɔta ɓambangɛ, nángɔbayamʉ pɔ bele!» 49Ga ngama ngɨananɨ nayɔ ɓɔ: «Makwɔɓɨɨ, ɓɔya ɓaka-sɨ ta andamɨ, pɛɨ ngɨa mwana anawio-ɔɔ.» 50Ga Yeso nayɔ ɓɔ: «Sa, mwana ata gue ngɨa asɔɔ ɔhɛyɔ hɛyanɨ.» Ngama ɔ꞉baya yaka ngɨyɛ Yeso a꞉musigio, nɔ ɔ꞉ngwɨa kyɛnda atɔwa. 51Tɨa aka a꞉ɓio-ɔɔ atɔa, ɓabaya ngʉɓangɔ ɓɔ꞉tɔjonokio nayɔ anɔ ɨngbaa, ga ɨɓɔ nayɔ ɓɔ: «Mwana ɔhɛyɔ hɛyanɨ.» 52Kʉdɔ, a꞉ɓuɓokuo ɓɔ: «Ɔ꞉pʉngɔ pɛngɛ akɔnɔ iɗo akɔ angbinga nga ino tanɨ? Ga ɨɓɔ nayɔ ɓɔ: ‹Ya꞉ɓio pɛ ɨkɔpɛ nɔ musoti, ɨyɛ sɛsʉ ya꞉mʉngwa pɛ-ɔɔ.› 53Ɨyɔ ɨsɛ ɔ mwana ngɨananɨ, a꞉pemiso ta iɗo ɓɔ, ya꞉ɓio ta akɔ angbinga ngɨa Yeso a꞉musigio-ɔɔ ɓɔ: ‹Mwana asɔɔ ɔhɛyɔ hɛyanɨ.›» Ɨyɔ, ngama ngɨananɨ ɔ꞉baya Yeso ɨhɔ nɔ ɨfananja ngɨangɔ kʉ iɓomu. 54Ɨyɛnɛnɨ, ya꞉ɓio kɔkɔ ata mʉmbangɛ ngɨyɔ ɓepini, ɨya Yeso a꞉mʉkɨa aka a꞉ngwa-ɔɔ anɔ Yudɛa, anɨsa anɔ Galilaya.

Currently Selected:

Yɔanɨ 4: buuN

Highlight

Copy