Yɔanɨ 5

Yeso ɔheiso mombi aipuu yɔ Betesaida

1Ambise ngɨananɨ, Yeso ɔ꞉sa anɔ Yelusalɛma akɔ ʉmbɔ mʉngana wɔ Ɓayuda. 2Inani anɔ Yelusalɛma, tinene nɔ umongu wɔ Ɓakɔndɔlɔ, ya꞉ɓio nɔ ipuu mɛngana, ɨyɛ ɓa꞉tɨisoko nɔ Ɛbɛlɛnɨa ɓɔ Bɛtɛsaida. Ipuu ngɨyɛnɛnɨ, ya꞉ɓio nɔ ɓabasa ɓɔkʉ. 3Inani amati ɔ ɓabasa, ɓombi ɓɔ ɓakaɓu ɓaja ɓa꞉ɓio ɓakwaakise, tɨa akɔ ɓombi ɓɔ mamɔmɔ, ɓombi ɓɔ majangi, nɔ ʉɓa ndʉtʉ ya꞉ɓuwo. [Ɨɓɔ ɓaɓomu, ɓa꞉ɓio aɓɛtɨa ta ngbinga ngɨa mipo kadʉanɔ-ɔɔ. 4Dɔ malaika mʉngana wɔ Makwɔɓɨɨ, a꞉tijoko inani aipuu, nɔ ɔ꞉dʉaniso mipo. Ambise ngɨa mipo katɨdʉana-ɔɔ, mombi ngɨa apʉnga anujo amati ɔ mipo kɔ ipuu, gʉtʉ kaɓu ngɨangɔ a ta tanɨ, ɔ꞉nɨhɛa ta hɛa.] 5Ya꞉ɓio ananɨ, nɔ mombi mʉngana ngɨa a꞉ɓio nɔ kaɓu amati mago ɓatɛkɛɓɛ ɓaatʉ nɔ ɓɛgɨna. 6Ɨyɛ ndʉ Yeso a꞉mɨna ɓakwaɛ, nɔ ɛ꞉mbɨa ɓɔ a tɨa ananɨ nɔ mago maja, ga ɨyɔ nayɔ ɓɔ: «Wa ndɨ akʉnda hɛa?» 7Ga mombi ɔ kaɓu ngɨananɨ nayɔ ɓɔ: «Iii, Makwɔɓɨɨ, nangɔmʉ ɨmɨ, nɔ mombi ngɨa anamaya amatɨ ipuu, ngbinga ngɨa mipo kakɨdʉana-ɔɔ. Ɨyɛ nakanio ɓɔ nabi, mombi nga ɔmɔ, ɔjeni pɛngɛ ujoni apɛɨ asɛmɨ.» 8Ga Yeso nayɔ ɓɔ: «Ɨmaa, nɔ, sɨka kalagba ngɨasɔɔ, nɔ, kyɛndaka!» 9Ta gagaa ngɨananɨ, mombi ɔhɛa ta hɛa. Ɔ꞉sɨka kalagba ngɨangɔ ga tʉɓa, nɔ ɔ꞉pʉnga kyɛndaka. Ya꞉ɓio ɓisi ɓɔ nuhomuo ngʉɓɔ Ɓayuda. 10Tɨa kwananɨ Ɓayuda, ɓa꞉sigio-ɔɔ mombi ngɨa Yeso a꞉mʉheiso ɓɔ: «Ha gue, ɓʉɓʉnʉ ya ɓisi ɓɔ nuhomuo, yɔsisekiomʉ ʉwɛ, atʉmba kalagba ngɨasɔɔ!» 11Ga ɨyɔ naɓɔ ɓɔ: «Mombi ngɨa ɔ꞉naheiso akɛ, ɔ꞉nasigio ɓɔ: ‹Sɨka kalagba ngɨasɔɔ, nɔ wɔkyɛndaka›» 12Ɓɔ꞉muɓokuo ɓata ɓɔ: «Anɨ-sɨ ɨyananɨ, ɔ꞉nasigio ɓɔ sɨka kalagba nɔ kyɛndaka?» 13Yakamɛngana, mombi ngɨa ɓa꞉muheiso, ɛ꞉mbɨamʉ ɓɔ anɨ akɛ ɔ꞉muheiso, dɔ Yeso a꞉nawo ta ananɨ amati ɔ ambaja ɔ ɓombi ngʉɓa ɓa꞉ɓio ananɨ. 14Ambise ɔ angbinga bele, Yeso ɔ꞉tɔmʉgbʉka tɨa amati ɔ ɨkáá yɔ Asɔɓɨɨ, ga ɨyɔ nayɔ ɓɔ: «Ha gue, ɨna, ʉwɛ ɨya tɨa wɔhɛyɔ-a! Ɛɛ, pɛmanɨa dɔ, watɨkɨamʉ ɓata ɓʉɓɨɓɨ, ambɔ yaka yɛta ɓʉmʉ akɔchana ɨyayɛ, yatɨnakwɨamʉ.» 15Mombi ngɨananɨ, ɔ꞉sa aɓɨa ɓangama ɓɔ Ɓayuda, ɓɔ Yeso akɛ ɔ꞉muheiso pɛngɛ.

Ɓɔnapɨɔ Yeso nɔ mʉkɔmbʉ

16Kʉdɔ, Ɓayuda ɓɔ꞉pʉnga ahataka Yeso nɔ yaka, ga dɔ ɔ꞉heiso mombi aɓisi ɓɔ nuhomuo. 17Yeso ɔ꞉ɓutosio ɓɔ: «Aba ngɨasɛmɨ, a ta amati ɔ tɛa ɓɔ ɗu, nɛmɨ na kʉ amati ɔ tɛa.» 18Akʉʉ yaka ngɨyɛnɛnɨ Yeso a꞉ɓusigio, ɓɔ꞉pʉnga nayɔ ahata tɨa nɔgbɛ, ga ɓamʉwa ta nɨwa. Sɔkɔmʉ ta dɔ ɔɓundo mapanʉ kɔ ɓisi ɓɔ nuhomuo, yakamɛngana, ɛ꞉soko tɨa kʉ nɔ Asɔɓɨɨ ɓɔ ɨsɛ, nɔ ɔkɨana ngbanga tɨa nɔ Asɔɓɨɨ.

Mwana ɔ Mombi anɔ ʉpanʉ akio mʉkɔmbʉ

19Kʉdɔ, Yeso a꞉ɓutosio ɓɔ: «Nanenu asigio ta ingono bɔ, Mwana angɔkwanana akɨa yaka pɔ mɛngana ta nɔ mʉtʉ wangɔ nangana, yakamɛngana, akɨa ta yaka ngɨyɛ kʉ ɨsɛ akɨkɨa. Iɓomu ngɨyɛ Aba akɨa, Mwana akɨa ngbanga kʉɓanɨ. 20Dɔ Aba akʉnda Mwana kʉndanɨ, nɔ ɔ꞉mʉpanaka iɓomu ngɨyɛ akɨkɨa. Nɔ, a꞊mʉpana sina ɓata yaka ɨja akɔnagaaka ɨyɛ, iɗo ambɔ yaka yɔngɔ, yɨnɨmbangɨa ta mbangɨa. 21Ngbanga kʉ ndɨ Aba ajʉkaniso ɓombi akɔ ingwo, nɔ ɔɓinjo ubei, kʉɓanɨ, Mwana ɛnjo ubei akɔ mombi muɓomu, ngɨa akʉnda nayɔ aninjo. 22Aba angɔkio mʉkɔmbʉ wɔ mombi pɔ mʉngana. Yakamɛngana, tɛa ngɨyɛnɛnɨ yɔ kio mʉkɔmbʉ iɓomu, a꞉sɨa ʉpanʉ wɔngɔ uɓomu ta alɨkɔndɔ lɔ Mwana, 23iɗo ambɔ mombi muɓomu ɨbibiso Mwana, kʉndʉ ɓabibiso Aba. Mombi ngɨa angɔbibiso Mwana, ɨsɨ yɔngɔ ɓɔ, angɔbibisomʉ Aba ngɨa a꞉mʉtʉma kʉɓanɨ. 24Ta ingono nanenu asigio ɓɔ, mombi ngɨa anʉka ʉpanʉ ngʉwɔsɛmɨ, nɔ ɓɛnyɨa mombi ngɨa a꞉natʉma ɨmɨ, ɛnɨanɨa nɔ uɓei ngʉwɔ mago nɔ mago, nɔ angɛmaamʉ apɛɨ ɔ mʉkɔmbʉ. Yakamɛngana, a꞉chana anɨngwa akɔ ingwo, anɨsa akɔ ubei. 25Ta ingono nanenu asigio ɓɔ, ngbinga anɨka, nɔ ɛkɔ tɨa ɨkanɨ, ɨya ɓombi ngʉɓa ɓa꞉sio, ɓɔ꞊ka sina-ɔɔ iso yɔ Mwana ɔ Asɔɓɨɨ, nɔ ɓiga ngʉɓa ɓɔ꞊ka iso ngɨyɛnɛnɨ, ɓa꞊ɓio sina nɔ uɓei. 26Ngbanga kʉndʉ Aba anɔ ubei amati angɔ, ɛ꞊njo Mwana aɓio kʉ nɔ uɓei amati angɔ. 27Nɔ, ɔ꞉tɔminjo tɨa kʉ nɔ ʉpanʉ, akɔkio mʉkɔmbʉ dɔ, ɨyɔ, a Mwana ngɨyɔ Mombi. 28Yakamɛngana, yatɨnɨmbangɨamʉ, dɔ, ngbinga anɨka ngɨa ɓombi ɓaɓomu ngʉɓa ɓa amati ɔ manjaʉ, ɓɔ꞊ka sina iso ngɨangɔ, 29nɔ ɓɔ꞊chʉchwaka amanjaʉ. Ɓiga ngʉɓa ɓa꞉kyananaka iɗo, ɓa꞊jʉkana akɔ uɓei. Yakamɛngana, ʉɓa ɓa꞉kyananaka ɓɨɓɨ, ɓa꞊jʉkana akɔnɨdya mʉkɔmbʉ.

30Nangɔmʉ akɨa yaka pɔ mɛngana nɔ mʉtʉ wɔsɛmɨ ingainga. Ɨmɨ nakɔkio mʉkɔmbʉ akpatanakɨa kʉ nɔ ɨyɛ nanʉka anɨngwa atɨ Asɔɓɨɨ, nɔ mʉkɔmbʉ ngʉwɔsɛmɨ wa ngbingbii. Dɔ ɨmɨ, nangɔmʉ ahata ɓʉkʉnda ngʉɓɔsɛmɨ, yakamɛngana, nahata ɓʉkʉnda ɓɔ mombi ngɨa a꞉natʉma.

Ɓɔchwɛɔ Yeso ɓʉdɛmʉ

31Yɔɓieni ɓɔ ɨmɨ akɛ nakɔchwɛanɨa ɓʉdɛmʉ ngʉɓɔsɛmɨ, ɨmɨ makwɔngɔ, yasugo ɓɔ ɓʉdɛmʉ ɓɔngɔ, ɓa nɔ mʉjɛɛ amati. 32Mombi nga kɔmɔ, kʉ di akɛ anɛmɨ achwɛɨa ɓʉdɛmʉ, nɔ ɨmɨ, nanɨmbɨa ɓɔ ɓʉdɛmʉ ɓɔngɔ ɓa ingono. 33Inu, ná꞉tʉmɨa Yɔanɨ ɓombi, nɔ ɨyɔ, a꞉ngaka ɨsaʉ akʉʉ ɔ ingono. 34Akɔ ɨmɨ, sɔkɔmʉ mombi ɔ dɔdɔ akɛ, anachwɛanɨa ɨmɨ ɓʉdɛmʉ. Yakamɛngana, nakɔsugo yaka ngɨyɛnɛnɨ dɔ inu, ɨnɨanɨeni nɔ ɓʉhɛa. 35Yaɓanɨ, Yɔanɨ a꞉ɓio ndʉ ʉwanga ngʉwa ɓaʉya dɔ wɨpɔya ʉmʉwa. Yakamɛngana, inu nábaya anɨkwa magyagya, nɔ ʉwanga ngʉwɔnanɨ ta akɔ angbinga bele. 36Yakamɛngana, nanɔ ɓʉdɛmʉ ngaɓɔmɔ, ʉba ba ɓʉja nɔgbɛ anagaaka ʉbɔ Yɔanɨ a꞉ngaka akʉʉ asɛmɨ. Tɛa ngɨyɛ nakɔkɨa, ɨyɛ kʉ Aba a꞉natʉma ɨmɨ ɓɔ nɨkɨa, ɨyɔ ingainga ayɛ, yapananiso ɓɔ, Aba akɛ a꞉natʉma. 37Aba ngɨa a꞉natʉma ɨmɨ, ɨyɔ akɛ anɛmɨ achwɛa ɓʉdɛmʉ. Inu ná꞉ngɔkamʉ sina pɔ iso ngɨangɔ, gʉtʉ pɔ nayɔ anɨna mesu. 38Yaka ngɨangɔ, yangɔmʉ amati eno pɔ bele, dɔ inu ná꞉bayamʉ inu mombi ngɨa a꞉mʉtʉma. 39Inu, nákɨa angu anɨmbɨa yaka ngɨyɛ ya amati ɔ Mabii, dɔ nátunguo ga, amati ɔngɔ nɛ́꞊nɨanɨa nɔ uɓei ngʉwɔ mago nɔ mago. Ɨnadɔ, kʉ Mabii ingainga akɛ kanɛmɨ achwɛa ɓʉdɛmʉ. 40Yakamɛngana, inu nángɔmʉ akʉnda anɨka andamɨ, anɨnɨanɨa nɔ uɓei wɔ ingono. 41Nangɔkɨhatamʉ ɨmɨ, ʉbɨba anɨngwa atɨ ɓombi. 42Yakamɛngana ngɨyɛ nɛnɔ amati eno, ya ɓɔ, nángɔmʉ nɔ ɓʉkʉnda akɔ Asɔɓɨɨ. 43Ɨmɨ, nɛ꞉ka akɔ ino ngɨyɔ Aba, nɔ inu, nɔ́yaa nɛmɨ atɛtɨa ta yaa. Yakamɛngana, mombi ɛkeni ɨyɔ, ta aino ngɨangɔ nangana, námʉtɛtɨa ta tɛtɨa. 44Inu, nábaya dɔ-sɨ ɨkʉkʉɓʉmʉ tanɨ, ngbinga ngɨa ná-ɔɔ ahatana ʉbɨba ta ati eno. Nɔ nɔ́sɨa pɛpɛ-sɨ ahata ʉbɨba ngʉwa, wanɨngwa atɨ Asɔɓɨɨ ingainga? 45Nátɨtunguomʉ ɓɔ ɨmɨ, na꞊nɨchɔngɨa sina apɛɨ Aba. Mombi ngɨa anenu achɔngɨa, ya ta Musa ngɨa kʉ inu ná꞉napɨana jɛnɛ-ɔɔ mʉtɨma akʉʉ angɔ. 46Nɔ́꞉mʉbayeni jɛnɛ Musa ta ingono, ambɔ nánabaya ɨmɨ, kʉ bayanɨ, dɔ ɨyɔ, a꞉tɛndakɨa kʉɔ yaka akʉʉ asɛmɨ. 47Nɔ́bayenimʉ-sɨ Mabii ngʉkangɔ, nábibaya tɨa yaka ngɨyɛsɛmɨ ɨkʉkʉɓʉmʉ tanɨ?»

Currently Selected:

Yɔanɨ 5: buuN

Highlight

Copy