Mʉkpanganɨa 40
40
1Ɓisi mʉngana ambise ɔ yaka ngɨyɛnɛnɨ, ngama ɔ pɛmakɨa ʉpata wɔ ʉkyɛpʉ ngʉwɔ Falaɔ, ɨhɔ nɔ ngama ngɨa ɔ mɨkatɨ, ɓa꞉kɨa Falaɔ yaka yɛta ɓɨɓɨ. 2Kʉdɔ, Falaɔ ɔ꞉huo nɔ ʉnganga akʉʉ ɔ eɓo. 3Ɔ꞉ɓufisiso aboloko, atɨ ngama ata mʉja ɔ ɓasʉda ngʉɓa, ɓa꞉tɨpɛmakɨa Falaɔ. Ɓɔ꞉ɓʉmaya ɓata, kʉ akɔ ɨkáá yɔ boloko, ngɨyɛ aki Yɛjɛfʉ a꞉ɓio-ɛɛ mʉfanɨɛ. 4Ɨyɔ ngama ɔ ɓasʉda ngɨananɨ, ɔ꞉mʉchwa Yɛjɛfʉ ɓɔ iɓio naɓɔ akɔsalakɨa. Inani akɔ ɨkáá yɔ boloko, ɨɓɔ ɓangama ngʉɓɔnanɨ, ɓa꞉kwaa ɓata-sɨ makwaa ta kwaanɨ.
Yɛjɛfʉ ɔngakɔ ɨsɨ yɔ lɨwɔtɔ
5Tɨa naɓutu mʉngana ɓɔ, ngama ɔ pɛmakɨa ʉpata wɔ ʉkyɛpʉ nɔ ngama ɔ mʉkatɨ, ɓɔ꞉takanaka lɨwɔtɔ, inani amati ɔ ɨkáá yɔ boloko. Mombi nɔ mombi, ta nɔ lɨwɔtɔ nga langɔ, nɔ ɨsɨ yɔ lɨwɔtɔ lɔngɔ, la꞉ɓio kʉ di di di. 6Nekuɓa yɔngɔ, ɨyɛ ndʉ Yɛjɛfʉ ɛ꞉ka ananɨ ɓa꞉ɓio-ɔɔ, ɔ꞉ɓɨna ndʉtʉ tɨa yɔɔyɔɔ. 7Kʉdɔ, a꞉ɓuɓokuo ɓangama ngʉɓɔnanɨ, ɓa꞉ɓio ɨhɔ nayɔ aboloko, inani atɨ makwangɔ ɓɔ: «Ɨmanɨ ɨyɛ na-ɔɔ ɓʉnʉ mesu ta nɔ ikoko ɓɔ?» 8Ɓɔ꞉mutosio ɓɔ: «Tɔ꞉takanakɔ pɛngɛ lɨwɔtɔ, yakamɛngana, mombi ngɨa atʉngakɨa ɨsɨ yɔngɔ, angɔmʉ pɔ mʉngana.» Kʉdɔ, Yɛjɛfʉ a꞉ɓio naɓɔ aka ɓɔ: «Mombi ngɨa akyɔngaka ɨsɨ yɔ lɨwɔtɔ, ya ta Asɔɓɨɨ nangana. Kikiliki, anɔngakɨeni-sɨ ɨmɨ, ɨlɔ, kʉ ngɨanɨ.»
9Ga ngama ɔ ʉkyɛpʉ nɔ Yɛjɛfʉ ɓɔ: «Amati ɔ lɨwɔtɔ ngɨlɛsɛmɨ, mujabibo wɔ꞉ɓio ʉɓaɛ apɛɨ asɛmɨ ɓɔ. 10Wɔ꞉ɓio nɔ mɨtapʉ ɓeetu. Nɔ, manɨ kɔngɔ pɛ-sɨ aɓaa kʉ ɨtakɨtakɨ, nɔ umbi tɨa a꞉pʉnga nutoko, nɔ ananɨ alɨkaja lɔngɔ, lipumo lɔ꞉pʉnga tɨa kʉ anɨya. 11Ɨmɨ, nɔ꞉ɓio pɛngɛ tɨa nɔ ʉpata ngʉwɔ ngama alɨkɔndɔ. Kɔdɔ, nɔ꞉sɨka pɛngɛ tɨa lipumo ngɨlɛnɛnɨ, nɔ꞉naminyoko mipo kɔngɔ inani amati. Nɔ꞉sɨka ʉkyɛpʉ ngʉwɔnanɨ, nɔ꞉tɔminjo Falaɔ ga ja.»
12Ga Yɛjɛfʉ nayɔ aka ɓɔ: «Ɨsɨ yɔ lɨwɔtɔ ngɨlɛnɛnɨ yasugo ɓɔ, mɨtapʉ ɓeetu, ya makwaa kaatʉ. 13Yɔtukoo makwaa kaatʉ, Falaɔ a꞊naɓoo suo, nɔ, ɔ꞊natɔso ɓata kʉ aɨda yɔ tɛa ngɨyɛsɔɔ. Kʉɓanɨ, wɔ꞊minjo ɓata ɨyɔ ngama, ʉpata ngʉangɔ ta alɨkɔndɔ ga ja. Ngbanga kʉndʉ aka, wa꞉tɨminjekio pɔngɔ-ɔɔ pɛɨ, angbinga ngɨa, wa꞉ɓio-ɔɔ mombi ɔ tɛa angɔ. 14Yakamɛngana, ndʉ wɛ꞊nɨanɨa suo nɔ majɨɔ, kikiliki, anatunguo ɓaka ɨmɨ, kʉ tunguoni, nɔ, wɔ꞊napananiso ɨmɨ iɗo iɗo ngɨyɛsɔɔ, kʉ pananisoni. Chwa ɓaka kʉɔ uduɓa ngʉwɔsɛmɨ, inani atɨ Falaɔ, nɔ, wɔnachwɛiso kʉɔ aɨkáá yɔ boloko, ngɨyɛ na-ɔɔ ayɛ. 15Dɔ, ɨmɨ ngɨa ɓa꞉nahokiso andɛsɔ, aɨkʉmbʉ yɔ Ɓaɛbɛlɛnɨa nɔ ɓʉkaɓʉkaɨ, nɔ, ɓɔ꞉tɔnafa aboloko kʉ yayɛ, nɔ꞉kɨenimʉ ɓʉɓɨɓɨ pɔ bele kʉɓanɨ.»
16Ɨyɛ ngama ngɨa a꞉tɨkanga yaka yɔ mɨkatɨ ɛ꞉na ɓanɨ ɓɔ, ɨsɨ yɔ lɨwɔtɔ ngɨlɔ mangɛ lɔ꞉kwɔ liɗo, ga ɨyɔ nɔ Yɛjɛfʉ aka ɓɔ: «Amati ɔ lɨwɔtɔ nga lɨsɛmɨ, nɔ꞉ɓio pɛngɛ nɔtʉmbɛni ɓakakpa ɓaatʉ ɓɔ mɨkatɨ yɛta tu tu tu, amʉtʉ. 17Amati ɔ kakpa ngɨa ɔ꞉ɓio pɛngɛ akʉʉ nɔgbɛ, yɔ꞉ɓio nɔ migbo yɔ mɨkatɨ di di di, nɔ litambua ngɨlɛ Falaɔ akyɔdyaka. Ɓanoi ɓɔ꞉ɓio pɛngɛ tɨa anɨka anɨdya, ta ananɨ akʉʉ ɔ mʉtʉ.»
18Ga Yɛjɛfʉ nayɔ aka ɓɔ: «Ɨsɨ yɔ lɨwɔtɔ ngɨlɛnɛnɨ, yasugo ɓɔ, ɓakakpa ɓaatʉ ngʉɓɔnanɨ, ya makwaa kʉ kaatʉ. 19Yɔtukoo makwaa kaatʉ, Falaɔ ɔ꞊naɓoo suo nɔ ɓɔ꞊nakio mʉtʉ, nɔ, ɓɔ꞊nanjenjo akʉʉ ɔ ɓʉtɨ ga dɔɔ. Kʉdɔ, ɓanoi ɓɔ꞊jangɨa suo nɔ anjɨɓɔ asɔɔ.»
20Ta ambise ɔ makwaa kaatʉ ngʉkɔnanɨ, ya꞉ɓio nɔ ʉmbɔ wɔta ʉja, akɔ ɨgyagya yɔ tunguo ɓisi ɓɔ nɔtanɨa ngʉɓɔ Falaɔ. Nɔ ɓisi ngʉɓɔnanɨ, ɨyɔ ngama, ɔ꞉dyisio ɓandɔngɔ ɓaɓomu ʉmbɔ. Ta ananɨ akɔ mesu kɔ ɓandɔngɔ, ɓɔ꞉ɓoo ngama ngɨa a꞉ɓikanga yaka yɔ ʉkyɛpʉ, nɔ ɨya, wɔ yaka yɔ mɨkatɨ kʉtaa. 21Ɔ꞉mutoso ngama ɔ ʉkyɛpʉ, kʉ akɔ ɨda yɔ tɛa ngɨangɔ. Kʉdɔ, ɔ꞉minjo Falaɔ ʉpata alɨkɔndɔ ga ja, kʉndʉ aɓʉpɛɨ ɓɔngɔ. 22Yakamɛngana, ɓɔ꞉munjenjo ngama ngɨa, ɔ mɨkatɨ akɔ ɓʉtɨ, ga dɔɔ, ngbanga ta ndʉ aka Yɛjɛfʉ a꞉mʉngakɨa-ɔɔ, ɨsɨ yɔ lɨwɔtɔ ngɨlangɔ. 23Ɨnadɔ, ɨyɔ ngama ngakɛ, ɔ ʉpata wɔ ʉkyɛpʉ, sɔkɔmʉ ɨ꞉mutunguo ɓata Yɛjɛfʉ, pɔ tii pɔ tunguo. Nɔ, ɔ꞉mɨpaa tɨta nɨpaa.
Currently Selected:
Mʉkpanganɨa 40: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
