Mʉkpanganɨa 41

Lɨwɔtɔ ngɨlɔ Falaɔ

1Mago kapɨnɨ ambise ɔ yaka ngɨyɛnɛnɨ, Falaɔ ɔ꞉takanaka ɓata ɨyɔ kʉ lɨwɔtɔ. Ya꞉ɓio bɔ ɔɓieni ɓɛmaɛ anɔ ambamba ɔ lisini ngɨa ata mʉja wɔ Ɓamisili, ino ɓɔ Nili. 2Ɛ꞉na ɓangɔmbɛ mɛɗɨanɛka, ngʉɓa ɓɔta manjanja, kʉ ɓɔ ngbʉlʉngbʉlʉ, achwea amati ɔ Nili. Nɔ, ɓɔ꞉pʉnga dyakanaka ananɨ amutii wɔngɔ. 3Mbise ɔngɔ, ɔ꞉tɛna ɓata ɓangɔmbɛ ngaɓɔmɔ ɓata kʉ mɛɗɨanɛka, ʉɓɔ ɓɔta ɓɨɓɨ ɓɨɓɨ, kʉ nɔ uwondi. Ɨɓɔ, a꞉chwɛa amati ɔ Nili, nɔ, ɓɛ꞉maaka anɔ ambamba ɔ ɓangɔmbɛ ngʉɓɔmɔ, kʉ ananɨ anambamba ɔ lisini. 4Ɓangɔmbɛ ngʉɓɔnanɨ ɓɔta ɓɨɓɨ ɓɨɓɨ, kʉ mɨgbɛngɛ, ɓɔ꞉dya ʉɓa ɓɔta manjanja mɛɗɨanɛka, kʉ ɓɔ ngbʉlʉngbʉlʉ, ta ɓaɓomu ɓɔ sɛ. Kʉdɔ, ngama ɔ꞉tɔjʉkana tɨa. 5Tɔɔ kɔ꞉mʉfa, nɔ, ɔ꞉takanaka ɓata kʉ lɨwɔtɔ ngalɛmɔ. Ɔ꞉tɛna tɨa lɨkʉjʉ mɛɗɨanɛka lɔ nganɔ, ɨlɛ lɛta manjanja, kʉ lɨkpɔkpɔ, lɔchwɛeni akʉʉ ɔ mʉkakaʉ wɔngɔ ta mʉngana. 6Ambise ɔngɔ, ɔ꞉tɛna ɓata lɨkʉjʉ ngalɛmɔ, kʉ mɛɗɨanɛka, lɔ꞉chwɛeni ɓata kʉ amʉkakaʉ ngʉwɔnanɨ. La꞉ɓio nyɛ nyɛ nyɛ, nɔ kʉ lʉmakɛ ɓɔ ke ke ke, lɔ꞉siokeni nɔ ɓʉnja ngʉɓɔ mukengu. 7Lɨkʉjʉ ngɨlɛnɛnɨ lɛta nyɛ nyɛ nyɛ, lɔ꞉mioko ɨlɛ lɛta manjanja, kʉ lɨkpɔkpɔ, ta ɓɔ gali gali. Ambise ɔngɔ, ɨyɔ Falaɔ ɔ꞉jʉkana, ambɔgɔ ɓɔ pe, ta lɨwɔtɔ.

8Nekuɓa yɔngɔ, ngama ɔ꞉mbambanio nɔgbɛ. Kʉdɔ, ɛ꞉soko magbɛ ngʉkangɔ, nɔ ɓombi ɓɔ nɨmbɨmbɨanaka ngʉɓɔ Misili, ta ɓaɓomu ɓɔ sɛ. Ɔ꞉ɓʉngakɨa lɨwɔtɔ ngɨlɛnɛnɨ. Yakamɛngana, mombi ngɨa a꞉kwanana jɛnɛ nayɔ anʉngakɨa ɨsɨ yɔngɔ, ɛ꞉nɨanɨamʉ, pɔ mʉngana. 9Tɨa ananɨ, ngama ɔ pɛmakɨa ʉpata wɔ ʉkyɛpʉ, ɔ꞉sigio ngama ngɨa ata mʉja ɓɔ: «Ngama! Ɓʉɓʉnʉ nɔmanɔ tɨa atunguo ɓʉɓɨɓɨ ngʉɓa, ɨmɨ, na꞉kɨa jɛnɛ. 10Ya꞉ɓio ɓisi mʉngana, mʉtɨma ngʉwɔsɔɔ wa꞉huo nɔ ʉnganga akʉʉ asɛmɨ, ɨhɔ nɔ ngama ɔ mɨkatɨ. Wɔ꞉tɨfisiso jɛnɛ aboloko, aki atɨ ngama ɔ ɓasʉda. 11Ya꞉ɓio tɨa naɓutu mʉngana, isu nayɔ ɓaɓomu, tɔ꞉takanaka lɨwɔtɔ. Mombi nɔ mombi nɔ ɨsɨ yɔ lɨwɔtɔ nga langɔ ta di. 12Inani, ta꞉ɓio nɔ nɛgbama mʉngana, Mʉebelenia wɔngɔ. Ɨyɔ, a꞉ɓio mombi ɔ tɛa ɔ ngama ɔ ɓasʉda. Ndʉ, ta꞉mʉngakɨa lɨwɔtɔ ngɨleso, ɔ꞉ngakɨa mombi nɔ mombi ɨsɨ yɔ lɨwɔtɔ ngɨlangɔ. 13Mbise ɔngɔ, yaka iɓomu yɔ꞉tɔkyananakɨa ngbanga ta ndʉ aka, a꞉tɨngakɨa jɛnɛ-ɔɔ. Ɓɔ꞉natoso ɨmɨ, kʉ aɨda yɔ tɛa ngɨyɛsɛmɨ, nɔ, ɓɔ꞉titio ɓɔ ɓimunjenjo mombi ngɨyɔmɔ.»

Yɛjɛfʉ ɔngakɔ ɨsɛ yɔ lɨwɔtɔ ngɨlɔ Falaɔ

14Kʉdɔ, Falaɔ a꞉tʉma ɓɔ ɓisoko Yɛjɛfʉ. Ɓɔ꞉muchwɛiso akɔ ɨkáá yɔ boloko ta gagaa. Ɔ꞉kiiso ndii, nɔ, ɔ꞉pɛnɨa lɨpʉkʉ ngalɛmɔ, nɔ, ɔ꞉sa aki ɨyɔ ngama a꞉ɓio-ɛɛ. 15Ga ngama nɔ Yɛjɛfʉ ɓɔ: «Nɔ꞉takanakɔ pɛngɛ lɨwɔtɔ. Mombi ngɨa akwanana anʉngaka ɨsɨ yɔ lɨwɔtɔ ngɨlɛnɛnɨ, angɔmʉ pɔ mʉngana. Yakamɛngana, nɔkɔ ɓɔ ʉwɛ, ɓakyɔnangakɨa lɨwɔtɔ ta imbi mɛngana, wɛ꞉njo ɨsɨ yɔngɔ.» 16Ga Yɛjɛfʉ nɔ ngama ɓɔ: «Sɔkɔmʉ ɨmɨ akɛ, nakwanana nɔwɛ angakɨa ɨsɨ yɔ lɨwɔtɔ. Yakamɛngana, ta Asɔɓɨɨ nangana akɛ, anenjo ɨsɨ yɔngɔ ngɨyɛ yɔkwananɔ nɔwɛ.»

17Kʉdɔ, ngama a꞉ngakɨa Yɛjɛfʉ ɓɔ: «Amati ɔ lɨwɔtɔ ngɨlɛsɛmɨ, nɔ꞉ɓio pɛngɛ ɓɛma-ɛɛ anambamba ɔ lisini ɔngɔ Nili. 18Nɛ꞉na pɛ ɓangɔmbɛ mɛɗɨanɛka ngʉɓa ɓɔta manjanja, kʉ ɓɔngbʉlʉngbʉlʉ, ɓɔ꞉chwɛeni amati ɔ Nili, nɔ, ɓɔ꞉pʉnga dyakanaka amutii wɔngɔ. 19Ambise ɔngɔ, nɛ꞉na ɓangɔmbɛ mɛɗɨanɛka ngaɓɔmɔ, ʉɓɔ uwondi, nɔ kʉ ɓɨɓɨ ɓɨɓɨ, nɔ kʉ mɨgbɛngɛ, ɓɔ꞉chwɛa amati ɔ lisini. Ɨmɨ, na꞉ngɛna jɛnɛ nguwɔngɔ, amati ɔ ɨkʉmbʉ yɔ Misili ta iɓomu. 20Ɨnadɔ, ɓangɔmbɛ ɓɔta ɓɨɓɨ ɓɨɓɨ ngʉɓɔnanɨ, nɔ kʉ mɨgbɛngɛ yɔngɔ, ɓɔ꞉dya pɛ ɓangɔmbɛ mɛɗɨanɛka ngʉɓɔmɔ, ɓɔta ngbʉlʉngbʉlʉ ta ɓɔ sɛ. 21Gʉtʉ ta ndʉ ɓa꞉dya pɛ ʉɓa ɓɔta ngbʉlʉngbʉlʉ ɓanɨ, sɔkɔmʉ yɨnɨanɨa pɔ bele. Yakamɛngana, ɓɔ꞉ɓio ta nɔ uwondi kʉndʉ aka ɓa꞉ɓio-ɔɔ pɛɨ. Kʉdɔ, nɔ꞉jʉkana. 22Mbise ɔngɔ, nɔ꞉tɔtakanaka ɓata lɨwɔtɔ ngalɛmɔ. Nɔ꞉tɛna pɛngɛ lɨkʉjʉ mɛɗɨanɛka ngɨlɛ lɨta manjanja, kʉ lɨkpɔkpɔ, lɔchwɛeni akɔ mʉkakaʉ wɔngɔ mʉngana. 23Ambise ɔngɔ, lɨkʉjʉ ngalɛmɔ mɛɗɨanɛka ngɨlɛ lɨta ɓʉmʉ ɓʉmʉ, nɔ kʉ nyɛ nyɛ nyɛ, lɔ꞉siokeni nɔ ɓʉnja ngʉɓɔ mukengu, lɔ꞉tɔchwɛa tɨa ɛlɔ. 24Lɨkʉjʉ ngɨlɛnɛnɨ lɨta nyɛ nyɛ nyɛ, lɔ꞉miokɔ lɨkʉjʉ mɛɗɨanɛka ngɨlɛ ta manjanja, ta ɓɔ gali gali. Nɔ꞉ngakɨɔ pɛngɛ-sɨ kʉɔ magbɛ ngʉkɔsɛmɨ. Yakamɛngana, mombi ngɨa a꞉nenjo ɨsɨ yɔngɔ, ɔ꞉kenɨanɨɔmʉ.»

25Kʉdɔ, Yɛjɛfʉ a꞉ɓio nɔ Falaɔ ɓɔ: «Ngama! Ɨsɨ yɔ lɨwɔtɔ ngɨlɛsɔɔ liɓomu ɗepini, ya ta mɛngana. Asɔɓɨɨ ɔ꞉napananiso ʉwɛ, yaka ngɨyɛ akʉnda kɨa. 26Ɓangɔmbɛ mɛɗɨanɛka, ngʉɓa ɓɔta manjanja, ɨsɨ yɔngɔ ɓɔ mago mɛɗɨanɛka, nɔ lɨkʉjʉ mɛɗɨanɛka ngɨlɛ lɨta manjanja, ɨsɨ yɛngɔ kʉ ɓɔ mago mɛɗɨanɛka. Kʉɓanɨ, ya ta lɨwɔtɔ mɛngana. 27Ɓangɔmbɛ mɛɗɨanɛka ʉɓɔ uwondi, nɔ kʉ ɓɨɓɨ ɓɨɓɨ ngʉɓa ɓa꞉chwɛa ambise ɔ ɓangɛ, kʉndʉ lifoko lɔ lɨkʉjʉ mɛɗɨanɛka ngɨlɛ lɔ꞉makɔ nɔ ɓʉnja ngʉɓɔ mukengu, ɨsɨ yɔngɔ ta ɓɔ mago mɛɗɨanɛka, ngʉkɔ ayende ata mʉja.

28Ya ngbanga ta ndʉ ananɨ nɔnasigio-ɔɔ ɓɔ, Asɔɓɨɨ akʉnda nɔwɛ apaniso, ɨkyɛmʉ ngɨyɛ akʉnda kɨa. 29Amati ɔ ɨkʉmbʉ yɔ Misili ta iɓomu, ya꞉ɓio suo nɔ mago mɛɗɨanɛka, ɨyɛ, idyo ya꞊ɓio-ɔɔ ɓɔ kyɔ kyɔ kyɔ. 30Yakamɛngana, ambise ɔngɔ, ya꞊ɓio sungo tɨa nɔ mago nga kɔmɔ mɛɗɨanɛka ʉka ayende ata mʉja. Kʉɓanɨ, inani anɔ Misili, ɓombi ɓɛ꞊paa sina ngbinga ngɨananɨ, idyo ya꞉ɓio jɛnɛ-ɔɔ ɨja ta nɨpaa. Dɔ ayende ngɨananɨ, a꞉nangiso sina ɨkʉmbʉ ta ɓɔ kɛkɛɛ. 31Ayende ngɨananɨ, a꞊ɓio sina ɓʉkaɨ nɔgbɛ, nɔ ɨkyɛmʉ ngɨyɛ yapananiso ɓɔ idyo ya꞉ɓio jɛnɛ ɨja, ya꞊ngɔɓio tii ɓata pɔ mɛngana. 32Yɔɓieni ɓɔ lɨwɔtɔ ngɨlɛnɛnɨ lɔtoyonio machaa kapɨnɨ, ya ɓɔ dɔ Asɔɓɨɨ akɛ, ɔ꞉kwaisio yaka yɔngɔ. Nɔ ya ɓanɨ ɓɔ, Asɔɓɨɨ a꞊ngɔgbalakisomʉ suo kɨa yaka ngɨyɛnɛnɨ.

33Ngama! Ɨtakɨtakɨ ngɨyɛ, yɔsisekio ɓɔ hata mombi ngɨa anɔ mʉtʉ, nɔ ɨya anɔ nɨmbɨmbɨanaka, nɔ wɔmʉchwa akanga ɨkʉmbʉ yɔ Misili iɓomu. 34Nɔ ɓata, yɔsisekio ɓɔ ngama ɨkɨa, nɔ, ɨchwa ɓombi ngʉɓa, ɓa꞊ɓio akanga ɨkʉmbʉ, nɔ, mɔmaka mʉngana wɔ ɓɔkʉ, wɔ masɔɔ maɓomu ngʉkɔ Misili, amati ɔ mago mɛɗɨanɛka, ngʉkɔ idyo ɓɔ kyɔ kyɔ kyɔ. 35Ɨɓɔ ɓombi ngʉɓɔnanɨ, ɓa꞊momiso suo madyo maɓomu amati ɔ mago ngʉka ka suo a꞊nɨka, ʉka idyo, ya꞊ɓio-ɔɔ ɓɔ kyɔ kyɔ kyɔ. Ɓa꞊momiso suo nganɔ, nɔ, ɓɔ꞊muɓoso amati ɔ ɓagʉlʉ, nɔ kʉ ɨɓɔ akɛ ɓɔ꞊muɓeyoko akpatanɨa nɔ ʉpanʉ ngʉwɔsɔɔ. 36Ɓa꞊ɓoso suo idyo ngɨyɛnɛnɨ, akɔ yaka yɔ mago kɔ ayende mɛɗɨanɛka, ngʉka suo a꞊nɨka anɔ Misili, dɔ, ɓombi ɓa꞊tɨdʉkamʉ nɔ taá.»

Yɛjɛfʉ ɔdyɔ ɓʉngama

37Yaka ngɨyɛnɛnɨ, yɛ꞉kataa atɨ Falaɔ, nɔ ɓandɔngɔ ta ɓaɓomu. 38Ga ngama nɔ ɓandɔngɔ aka ɓɔ: «Gue ngɨa anɔ mʉtɨma wɔ Asɔɓɨɨ amati angɔ. Mombi nga kɔmɔ, ɨya, tamʉchwa akɔ tɛa ngɨyɛ, angɔmʉ.» 39Kʉdɔ, ngama a꞉ɓio nɔ Yɛjɛfʉ ɓɔ: «Dɔ, Asɔɓɨɨ ɔ꞉nɛmbiiso ʉwɛ yaka ngɨyɛnɛnɨ iɓomu, mombi ngakɔmɔ, ɨya, anɔ mʉtʉ nɔ nɨmbɨmbɨanaka ndʉ ʉwɛ, angɔmʉ. 40Ta ʉwɛ akɛ, wa꞊ɓio ngama ambise asɛmɨ, akanga ɨkʉmbʉ ngɨyɛsɛmɨ. Nɔ, ɓombi ngʉɓɔsɛmɨ ɓaɓomu, ɓa꞊ɓio nɔwɛ anʉka ta ʉwɛ. Ɨmɨ, na꞊nagaaka ʉwɛ, ta nɔ ɓʉngama ɓɔta ɓʉja ngʉɓa ɓa꞉nenjo ɨmɨ akɛ.»

41Ga ngama ɓata nɔ Yɛjɛfʉ ɓɔ: «Ha gue, ɨmɨ akɛ nɔ꞉nachwɔ ʉwɛ, aɓio ngama akanga ɨkʉmbʉ yɔ Misili iɓomu.» 42Ga Falaɔ nɔ pɛtɛ ɔ ɓʉngama ɓɔ ɗɔɔ, akpɛngbɛ ngɨangɔ, ɔ꞉mʉsʉmbana Yɛjɛfʉ akɔ kpɛngbɛ, ga kprʉɔ. Ɔ꞉mʉpeniso ɨpʉkʉ yɛta iɗo nɔgbɛ ɨyɛ ɨgabʉ, tɨa kʉ nɔ angɛga wɔ ɔlɔ akɔ ɨmɨyɔ, ga dɔɔ. 43Kʉdɔ, ngama ɔ꞉muɗetiso akʉʉ ɔ mʉtʉka ngʉwangɔ, wɔmɔ wɔ ɓʉngama. Ɓɔ꞉pʉnga tʉɓɨa, atangba apɛɨ angɔ ɓɔ: «Ʉngweni anɔ ɨngbaa!» Yaka ngɨyɛ Falaɔ, a꞉chwa-ɔɔ Yɛjɛfʉ aɓio ngama, akanga ɨkʉmbʉ yɔ Misili iɓomu, ya꞉kwa ɓanɨ.

44Ga Falaɔ ɓata nɔ Yɛjɛfʉ kʉ ɓɔ: «Ɨmɨ akɛ na ngama, ɔ ɨkʉmbʉ ngɨyɛ. Mombi pɔ mʉngana, angɔgana monu, yɔɓienimʉ ta asɨ ɔ ʉpanʉ wɔsɔɔ anɔ Misili aka.» 45Kʉdɔ, ngama a꞉sʉa Yɛjɛfʉ ino ɓɔ: Safɛnatɨ-Panɛa. A꞉minjo kʉ nɔ moi, ino ɓɔ Asɛnatɨ, mwana ɔ Pɔtɨfɛla, ngɨa a꞉ɓio kumukumu, ɔ gʉlʉ ngɨyɔ Oni. Kʉdɔ, Yɛjɛfʉ ɔ꞉pʉnga kyɛndɨa ɨkʉmbʉ yɔ Misili iɓomu. 46Ɓɛ꞉ka nɔ Yɛjɛfʉ apɛɨ ɔ Falaɔ, ɨyɔ tɨa nɔ mago ɓatɛkɛɓɛ ɓaatʉ. Ɨyɛ ndʉ a꞉ngwa ananɨ apɛɨ ɔ ngama, ɔ꞉pʉnga tɨta kyɛndɨa ɨkʉmbʉ yɔ Misili iɓomu. 47Amati ɔ mago ngʉkɔnanɨ, idyo ya꞉ɓio ɓɔ kyɔ kyɔ kyɔ, nɔ ɓakʉbaa ɓa꞉chwɛiso idyo sɔkɔmʉ nɔ ipoye. 48Amati ɔ mago mɛɗɨanɛka ngʉkɔnanɨ, Yɛjɛfʉ a꞉mɔmiso madyo amati ɔ ɓagʉlʉ ta ɓaɓomu, ngʉɓɔ Misili. Nɔ, ɔ꞉mɔmiso idyo iɓomu ngɨyɛ, yɔ lɨkʉmbʉ ngɨlɛ lɔ gʉlʉ nangana nangana. 49Yɛjɛfʉ a꞉mɔmiso jɛnɛ nganɔ, ɓɔ kyɔ kyɔ kyɔ, ngbanga ndʉ sasaɨ alisini. Ɓɔ꞉sɨa pɔɔ tɨta sɨa, dɔ, ya꞉ɓio tii ɓata adaa ngɨa ɓapoo-ɔɔ.

50Pɛɨ ɔ mago ngʉka ayende anɨka, Yɛjɛfʉ a꞉nɔta ɓana ɓegue ɓapɨnɨ, nɔ Asɛnatɨ, mwana ɔ Pɔtɨfɛla ngɨa a꞉ɓio kumukumu ɔ ɨkʉmbʉ yɔ Oni. 51Yɛjɛfʉ ɔ꞉mʉsʉa ɨya tapio ɔngɔ ino ɓɔ Manasɛ#41:51 Manasɛ: pɔ ɓɔ yanʉkanɨa tinetine ndʉ «nɨpaa» nɔ Ebelenia. Dɔ a꞉tɨsugo ɓɔ: «Asɔɓɨɨ ɔ꞉nepaiso ɨmɨ ɓʉkaɓʉkaɨ ngʉɓɔsɛmɨ ɓuɓomu, nɔ ɨkáá iɓomu ngɨyɔ aba ngɨasɛmɨ.» 52Ɔ꞉mʉsʉa mwana ngɨyɔ ɓepini ino ɓɔ Ɛfalaɨmʉ#41:52 Ɛfalaɨmʉ: pɔ ɓɔ yanʉkanɨa tinetine ndʉ «ʉnɔtʉ» nɔ Ebelenia. Dɔ a꞉tɨsugo ɓɔ: «Asɔɓɨɨ ɔ꞉nenjo ɓaka ɨmɨ ʉnɔtʉ, amati ɔ ɨkʉmbʉ ngɨyɛ, ɨmɨ na꞉dyɔ-ɔɔ ikoko ayɛ.»

53Mago mɛɗɨanɛka ngʉka idyo ya꞉ɓio-ɔɔ ɓɔ kyɔ kyɔ kyɔ anɔ Misili, kɔ꞉sio ga gba. 54Ngbanga, ta ndʉ aka Yɛjɛfʉ a꞉sugo jɛnɛ-ɔɔ. Mago mɛɗɨanɛka ngʉkɔ taa kɔ꞉pʉnga. Lɨkʉmbʉ ngɨlɔmɔ liɓomu, lɔ꞉kumonio amati ɔ ayende ngɨananɨ. Yakamɛngana, amati ɔ ɨkʉmbʉ yɔ Misili, idyo ya꞉ɓio ta ʉwɔ. 55Ɨyɛ ndʉ ɨkʉmbʉ yɔ Misili, ya꞉kumonio ɨyɔ tɨa kʉ amati ɔ ayende, ɓombi ɓɔ꞉mʉndɨanɨa Falaɔ ɓɔ, ɔ꞉ɓinjo ɓaka idyo. Ga ngama naɓɔ ɓɔ: «Seni pɨ anɨna ta Yɛjɛfʉ, nɔ, nɔ꞊kɨa ta yaka ngɨyɛ anisigio.» 56Ayende ɔ꞉ndanaka amati ɔ ɨkʉmbʉ ta iɓomu, ga gba gba gba, nɔ, ɛ꞉ka tɨa kʉ ɓʉkaɓʉkaɨ nɔgbɛ. Kʉɓanɨ, Yɛjɛfʉ ɔ꞉ganaka lɨkáá lɔ nganɔ liɓomu, nɔ, ɔ꞉pʉnga gabisio ɓombi ɓɔ Misili. 57Anɨngwa gbanɨ nɔ gbanɨ, aki ɓombi ɓadya-ɛɛ ngine, akɔ dɔdɔ ta muɓomu, ɓa꞉tɨka akaya idyo ta anɔ Misili, alɨkɔndɔ lɔ Yɛjɛfʉ, dɔ, akɔ ʉmʉa uɓomu, ayende a꞉ɓio ɓɔ ɔbelueni tɨta beluo.

Currently Selected:

Mʉkpanganɨa 41: buuN

Highlight

Copy