Mʉkpanganɨa 39
39
Yɛjɛfʉ ɛkɔ baya ɔ Pɔtɨfalɨ
1Ɨyɛ ndʉ ɓa꞉sa nɔ Yɛjɛfʉ anɔ Misili, kʉdɔ, Pɔtɨfalɨ ɔ꞉tɔmʉkaya alɨkɔndɔ lɔ Ɓaɨsɨmaɛlɛ ngʉɓa ɓɛ꞉ka nayɔ. Ɨyɔ Pɔtɨfalɨ, a꞉ɓio ngama ɔ ɓasʉda ngʉɓa ɓa꞉pɛmakɨa ɨkáá yɔ boloko, nɔ kʉ nɛbaya ata mʉja ɔ Falaɔ. 2MAKWƆƁƗƗ a꞉ɓio ɨhɔ nɔ Yɛjɛfʉ, nɔ tɛa iɓomu ngɨyɛ a꞉tɨpʉnga, yɔ꞉sio ta iɗo. A꞉ɓio ɨyɔ tɨta inani ambɛnɨ ngɨyɔ makwangɔ, Mumisili ngʉwɔnanɨ, ɓɔ ɗu. 3Tɨa mbise, Pɔtɨfalɨ ɛ꞉na ɓɔ MAKWƆƁƗƗ a ɨhɔ nɔ Yɛjɛfʉ, nɔ tɛa ngɨangɔ iɓomu yakɨanɨa ta iɗo, dɔ, MAKWƆƁƗƗ a ɨhɔ nayɔ. 4Kʉdɔ, Yɛjɛfʉ ɛ꞉nɨanɨa nɔ ɨjɨɔ a pɛɨ ɔ makwangɔ, nɔ, ɔ꞉mʉsɨka ndʉ mombi ɔ tɛa angɔ ɔ ɓʉkʉnda. Ɔ꞉mʉchwa aɓio kapita wɔ ɨkáá ngɨangɔ, nɔ, ɔ꞉mʉnapɨa apɛmakɨa lɨkyɛmʉ ngɨlangɔ liɓomu. 5Anɨngwa tɨta ananɨ, MAKWƆƁƗƗ ɔ꞉kiokio ɨkáá ngɨyɔ Pɔtɨfalɨ akɔ yaka yɔ Yɛjɛfʉ. Ʉɓʉnga ngʉwɔ MAKWƆƁƗƗ, wɛ꞉nɨanɨa akɔ ɓayaka ngʉɓangɔ ɓaɓomu, iɓio andɔngɔ ambɛnɨ, kʉndʉ aɓakʉbaa ngʉɓangɔ. 6Kʉdɔ, a꞉sɨa ɓayaka ngʉɓangɔ ɓaɓomu, tɨta alɨkɔndɔ lɔ Yɛjɛfʉ, sɔkɔmʉ ɨ꞉napɨana ɓata mʉtɨma ayaka pɔ mɛngana, anunguso ta dyakaka ngɨangɔ.
Moi ɔ Pɔtɨfalɨ ɔsingekio Yɛjɛfʉ mʉjɛɛ
Ɨnadɔ, Yɛjɛfʉ a꞉ɓio nɛgbama ata muɗo nɔgbɛ.
7Ambise ɔ makwaa bele, moi ɔ Pɔtɨfalɨ ɔ꞉pʉnga kangaka Yɛjɛfʉ nɔ ajwa ɔ ɨsaakyɛ, ga ɨyɔ nayɔ ɓɔ: «Kwaa nɛmɨ!» 8Ɨyɔ Yɛjɛfʉ ɔ꞉yaa ta yaa, ga ɨyɔ nɔ moi ɔ makwangɔ ɓɔ: «Makwasɛmɨ a꞉nasɨa pɛ ɨmɨ nɔ ʉpanʉ akʉʉ ɔ lɨkyɛmʉ ngɨlangɔ ta liɓomu, nɔ ɨyɔ ingainga, angɔmʉ ɓata akanga yaka pɔ mɛnga. 9Mombi angɔmʉ aka pɔ mʉngana, ɨya akʉʉ asɛmɨ, amati ɔ ɨkáá ngɨyɛ. Makwasɛmɨ, a꞉nagbɛmɨamʉ ɨmɨ, ɨkyɛmʉ aka pɔ mɛngana, yɔɓienimʉ ta ʉwɛ, dɔ ʉwɛ, wa moi angɔ. Yakwa tɨa tanɨ, ɨmɨ, akɨa ɓʉɓɨɓɨ ɓɔta kisoɓa ɓanɨ? Nɔ, akɨa ɓʉɓɨɓɨ akɔ mesu kɔ Asɔɓɨɨ ɓanɨ?» 10Moi ngɨananɨ, ɔ꞉pʉnga nayɔ akpakpa tɨta masi maɓomu ga, ɨmʉgbʉka aɓʉkwaa, dɔ, ɓijonokio nayɔ. Yakamɛngana, ɨyɔ Yɛjɛfʉ, ɔ꞉yaa ta yaa.
11Tɨa ɓisi mʉngana, Yɛjɛfʉ ɔ꞉kumonio ambɛnɨ akɨaka ɓatɛa ngʉɓangɔ. Mombi wɔ ɨkʉmbʉ, a꞉ɓiomʉ ananɨ andei pɔ mʉngana. 12Kʉdɔ, moi ɔ Pɔtɨfalɨ, ɔ꞉mʉfa ɨpʉkʉ ngɨangɔ, nɔ, ɔ꞉mʉngɨa ɓɔ: «Ɨndɔ kwaa nɛmɨ!» Yɛjɛfʉ ɔ꞉mʉsɨa nɔ ɨpʉkʉ ga vu, nɔ, ɔ꞉chwɛa aɓei ga puchuchu. 13Ɨyɛ ndʉ moi ngɨananɨ, ɛ꞉na ɓɔ Yɛjɛfʉ ɔ꞉mʉsɨa nɔ ɨpʉkʉ alɨkɔndɔ, nɔ, ɔ꞉chwɛa bangʉ tɨa kʉ aɓei, 14ɛ꞉soko ɓandɔngɔ, nɔ, ɔ꞉ɓʉngɨa ɓɔ: «Ineni-sɨ, Pɔtɨfalɨ a꞉tɨkɨa pɛ nɔ Mʉebelenia aka, nesu ayapakiso. Ɛ꞉kɔ ta ɓɔ fu, ga ɨkwaa nɛmɨ ta kwaanɨ. Yakamɛngana, ɨmɨ, nɔ꞉natɨa ɓʉmʉ nɔgbɛ. 15Ndʉ, ɔ꞉kɔ ɓɔ nɔɓieni anatɨa nɔ tʉɓɨa ɓanɨ, ɔ꞉nasɨa nɔ ɨpʉkʉ ngɨangɔ ayɛ, nɔ, ɔ꞉chwɛa bangʉ aɓei.»
16Kʉdɔ, a꞉pɛmakɨa ɨpʉkʉ, aɓɔya ta aka swaɨ, Pɔtɨfalɨ, a꞉tɔwa-ɔɔ. 17Ɔ꞉mʉngakɨa swaɨ yaka ngɨyɛnɛnɨ, ta ɓanɨ asugo ɓɔ: «Ɨkyɛmʉ yɔ baya wɔ Mʉebelenia, ngɨa wa꞉tɨkɨa pɔngɔ nayɔ akɛ, ɛ꞉kɔ pɛngɛ ɓɔ fu, ga ɨjɛka nɛmɨ ta jɛkanɨ. 18Tɨa ndʉ, nɔ꞉pʉngɔ pɛngɛ tʉɓɨa, ɔ꞉nasɨa tɨta nɔ ɨpʉkʉ ngɨangɔ, nɔ, ɔ꞉chwɛa bangʉ aɓei, ga puchuchu.» 19Ɨyɛ ndʉ, moi a꞉ɓɨakɨa swaɨ yaka ngɨyɛ baya angɔ a꞉mʉkɨa, ɨyɔ Pɔtɨfalɨ, ɔ꞉kwa ʉnganga nɔgbɛ.
Ɓɔmayɔ Yɛjɛfʉ aboloko
20Makwangɔ ɔ꞉fisiso Yɛjɛfʉ, nɔ, ɓɔ꞉mʉmaya aboloko, aki ɓa꞉ɓimayaka-ɛɛ ɓombi ɓɔ boloko ngʉɓɔ Falaɔ, nɔ, ɔ꞉ɓio tɨta inani amati ɔngɔ.
21Sɔkɔmʉ MAKWƆƁƗƗ ɨsɨa Yɛjɛfʉ, nɔ, ɔ꞉mʉpananiso iɗo iɗo ngɨangɔ. Kʉdɔ, ɛ꞉nɨanɨa nɔ ɨjɨɔ apɛɨ ɔ ngama wɔ ɨkáá yɔ boloko. 22Tɨa kʉ ananɨ, ngama wɔ ɨkáá yɔ boloko a꞉chwa Yɛjɛfʉ, aɓio kapita wɔ ɓombi ɓɔ boloko, ngʉɓa ɓa꞉ɓio inani amati ɓaɓomu. Yaka iɓomu yɔ꞉ɓikyananakɨa, tɨta ɛsɨ ɔ ʉpanʉ wangɔ.
23Ɨyɔ ngama, ɔ ɨkáá yɔ boloko, ɔ꞉nguso ɓatumo akʉʉ ɔ yaka iɓomu ngɨyɛ Yɛjɛfʉ a꞉ɓio akɨa. Nɔ tɛa ngɨangɔ iɓomu, ya꞉ɓikɨanɨa iɗo, dɔ, MAKWƆƁƗƗ a꞉ɓio ɨhɔ nayɔ.
Currently Selected:
Mʉkpanganɨa 39: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
