Mʉkpanganɨa 38

Yuda nɔ Tamalɨ

1Tɨa akɔ angbinga ngɨananɨ jɛnɛ, Yuda a꞉sɨana nɔ ɓamanye, nɔ, ɔ꞉sa awolo anambamba ɔ mombi mʉngana, Mʉadʉlamɨ wɔngɔ, ino ɓɔ Hɨla. 2Yuda tɨta inani, ɛ꞉na gwa ata moi mʉngana, muto Ɓakanana ɔngɔ, mwana ɔ Sʉa. Ɔ꞉mʉsɨka ndɨ moi, nɔ, ɔ꞉kyɛnda nayɔ. 3Ɨyɔ gwa ata moi, ɔ꞉siyo ɓʉa nɔ, ɔ꞉nɔta mwana ata gue, nɔ, ɔ꞉mʉsʉa ino ɓɔ Ɛlɨ. 4Ɔ꞉tɔsiyo ɓata ɓʉa ngaɓɔmɔ, nɔ, ɔ꞉nɔta ɓata ta gue, nɔ, ɔ꞉mʉsʉa ino ɓɔ Ɔnanɨ. 5Ɔ꞉tɔsiyo ɓata kʉ ɓʉa ngaɓɔmɔ, nɔ, ɔ꞉nɔta ɓata kʉ gue, nɔ, ɔ꞉mʉsʉa ino ɓɔ Sɛla. Ngbinga ngɨa a꞉nɔta-ɔɔ, Yuda a꞉ɓio ɨyɔ anɔ Kɛsɛbʉ.

6Yuda a꞉mʉsɨkɨa Ɛlɨ, tapio ngɨangɔ, moi ino ɓɔ Tamalɨ. 7Yakamɛngana, ɨyɔ Ɛlɨ, tapio ngɨa wɔ Yuda, a꞉ɓio mombi ata ɓɨɓɨ, apɛɨ ɔ MAKWƆƁƗƗ. Kʉdɔ ɨyɔ, MAKWƆƁƗƗ ɔ꞉mʉwa ta nɨwa. 8Tɨa ananɨ, ga Yuda nɔ Ɔnanɨ ɓɔ: «Akpatanakɨa nɔ gbali ngɨyeso, ʉwɛ sɨka ta woko ngɨa wɔ abɨɨ ɔ mwananʉ akɛ. Kʉdɔ, wɔmʉnɔtɨa mwana ɔ anu ɓana.» 9Yakamɛngana, Ɔnanɨ a꞉ɓio anɨmbɨa ɓɔ, ɓana ɓa꞊ngɔɓio ɓangɔ. Kʉdɔ, akɔnujonokio ngɨangɔ nɔ moi ɔ manye, ɔ꞉tito masaɨ ta aɨsɨ, dɔ, atɨnɔtɨamʉ manye ɓana. 10Yaka ngɨyɛnɛnɨ, yɔ꞉mʉjʉka MAKWƆƁƗƗ, nɔ, ɔ꞉mʉwa ɓata ɨyɔ, kʉ nɨwa. 11Yuda ɔ꞉sigio Tamalɨ, munenu angɔ ɓɔ: «Dɔ ʉwɛ ɨya wa woko-a, ɓio-sɨ ta atɨ atɔ, akɔɓɔya ta aka mwana asɛmɨ Sɛla, akɨa-ɔɔ ɓakʉʉ.» Dɔ, a꞉ɓio ayakanaka amati angɔ ɓɔ: «Ɨyakɛ, ɔmanɔ aniwo, kʉndʉ ɓamanye.» Tamalɨ ɔ꞉sa yangɔ awolo tɨa kʉ atɨ ɨsɛ.

12Mbise ɔ makwaa maja, moi wɔ Yuda ngɨa mwana ɔ Sʉa, ɔ꞉wo. Ɨyɛ ndʉ ɨyɔ Yuda a꞉pipiso didima ɓɔ gba, ɔ꞉ngwɨa kyɛnda anɨsa anɔ Tɨmʉna, atɨ ɓombi ngʉɓa ɓa꞉tɨkio ɓakɔndɔlɔ ngʉɓangɔ mata, ɨhɔ nɔ awai angɔ Hɨla, Mʉadʉlamɨ wɔngɔ. 13Ɓɔ꞉sa anʉngɨa Tamalɨ ɨsaʉ ɓɔ: «Atʉngwanʉ anɨsa anɔ Tɨmʉna, akɔkio ɓakɔndɔlɔ ngʉɓangɔ mata.» 14Ɨyɔ anʉka ta ɓanɨ, Tamalɨ ɔ꞉ɗuo lɨpʉkʉ lɔ ɓuwoko ngɨlangɔ, nɔ, ɔ꞉kutono nɔ malɨkanɨ, nɔ, ɔ꞉kweenio nawɔ ga kpa, ga ɨyɔ ɓɔ kyepele, ananɨ anɔ umongu wɔ gʉlʉ ɔ Ɛnaɨmʉ, anɔ ɨngbaa yɔ Tɨmʉna. Akɨa ɓanɨ, dɔ, Sɛla aɓio tɨa kʉ gue ata mʉja, yakamɛngana, sɔkɔmʉ, ɓɔminjo ɨyɔ ɓɔ, iɓio tɨa kʉ moi angɔ.

15Yuda ɔ꞉mɨna, nɔ, ɔ꞉mʉsɨka ndʉ ɨjangwɛ dɔ, a꞉ɓio mesu makutone. 16Ɔ꞉ɓundono ga gbʉʉ, ananɨ a꞉ɓio-ɔɔ ɓawele anɔ ambamba ɔ ɨngbaa, ga ɨyɔ nayɔ ɓɔ: «Kikiliki, nɨkwaa ɓaka nɔwɛ.» Ɨyɔ, sɔkɔmʉ anɨmbɨa ɓɔ munenu wangɔ ɨyananɨ. Tamalɨ ɔ꞉mutosio ga ndʉ wakwaa nɛmɨ, wa꞊nenjo dɔ ɨmɨ tɨa ɨmanɨ? 17Yuda ɔ꞉mutosio ɓɔ: «Nanatʉmɨa mwana ɔ mɛmɛ.» Kʉdɔ, Tamalɨ a꞉ɓio nayɔ ɓɔ: «Pɛɨ ngɨa wanatʉmɨa-ɔɔ mwana ɔ mɛmɛ, asɨa-sɨ nɔ ɨkyɛmʉ akɔ mupita.» 18Ɔ꞉muɓokuo ɓɔ: «Wɔkʉndɔ ɓɔ nɨnenjo ɨmanɨ akɔ mupita?» Ɨyɔ, ɔ꞉mutosio ɓɔ: «Ta ɨtɔɓɛ ngɨyɛsɔɔ, nɔ muki wɔngɔ, kʉ nɔ mutupo ngʉwɔnanɨ, wa nawɔ.» Kʉdɔ, ɔ꞉minjo ga ja. Ɔ꞉kwaa nayɔ, nɔ ɨyɔ Tamalɨ ɔ꞉siyo ta ɓʉa nayɔ. 19Mbise ɔngɔ, Tamalɨ ɔ꞉sa yangɔ, ɔ꞉ɗuo malɨkanɨ, nɔ, ɔ꞉pɛnɨa ɓata ta lɨpʉkʉ ngɨlangɔ, lɔ ɓuwoko.

20Yuda ɔ꞉tʉma tɨa awai angɔ Hɨla, Mʉadʉlamɨ wɔngɔ, aninjo mwana ɔ mɛmɛ atɨ Tamalɨ, nɔ, sɨka ɓayaka ngʉɓa a꞉napɨa akɔ mupita. Yakamɛngana, sɔkɔmʉ ɔ꞉mɨna. 21Kʉdɔ, a꞉ɓokuo ɓombi ɓɔ ɨkʉmbʉ ɓɔ: «Ɨjangwɛ#38:21 ɨjangwɛ: pɔ ɓɔ ɨjangwɛ ngɨyɛ yagbanganɨa gbanganɨanɨ nɔ Ebelenia ngɨyɛ ya꞉ɓio pɔngɔ ɓɛmaɛ anɔ ambamba ɔ ɨngbaa, anɔ Ɛnaɨmʉ, ya gbanɨ?» Ɨɓɔ, ɓɔ꞉mutosio ɓɔ: «Ta꞉ngɛna sina isu ɨjangwɛ aka!» 22Ɔ꞉tɔwa atɨ Yuda, ga ɨyɔ nayɔ aka ɓɔ: «Nɔ꞉kɔmɨnɔmʉ ɨmɨ, nɔ ɓombi ɓɔ ɨkʉmbʉ ɓɔ꞉sugo kʉ ɓɔ: ‹Ta꞉ngɛna sina isu ɨjangwɛ aka!›» 23Ga Yuda ɓɔ: «Nɔ꞉tʉmɔ mwana ɔ mɛmɛ tɨa kʉ tʉmanɨ, sɔkɔmʉ wɔ꞉mɨna. Itukoo gɔ tii-sɨ nɔ ɓayaka ngʉɓɔnanɨ, tɨa kʉ inani. Tatɨyapanakisomʉ isu, ananɨ kʉyayɛ.»

24Ambise ɔ mayi ndʉ kaatʉ, ɓɛ꞉ka anʉngɨa Yuda ɓɔ: «Munenu asɔɔ Tamalɨ a꞉kwa pɛ ɓʉjangwɛ, nɔ ɓʉjangwɛ ɓɔngɔ, ɔ꞉sio pɛ ɓʉa.» Kʉɓanɨ, Yuda ɔ꞉sugo ɓɔ: «Muchweiseni gɔ tii aɓei, ɓʉmʉgbʉnda adyaa!» 25Ndʉ ɓa꞉ɓio tɨa nayɔ achwɛiso aɓei, ɨyɔ Tamalɨ, ɔ꞉mayaka iso atɨ ɨsɛngʉʉ akɔsugo ɓɔ: «Nɔnɛtɔ ɓɔ kanga-sɨ lɨkyɛmʉ ngɨlɛkɛ, la-sɨ lanɨ: ɨtɔɓɛ, nɔ muki, nɔ mutupo, dɔ, makwɔ ɔ ɓayaka ngʉɓɔnanɨ, ɨya, a꞉nenjo pɔngɔ ɨmɨ ɓʉa ngʉɓaɓɛ.» 26Yuda ɔ꞉ɓʉkanga, nɔ, ɔ꞉sugo ɓɔ: «Tamalɨ akɛ, anɔ ɓungbingbii, nɛmɨ akɔnagaaka, dɔ, na꞉kɔmʉsɨkanisomʉ nɔ mwana asɛmɨ Sɛla.» Akɔnɨngwa tɨta ananɨ, Yuda a꞉kwaa tii ɓata nayɔ pɔ.

27Yɛ꞉mbɨanɨa ɓɔ Tamalɨ anɔ mapiyo, tɨta aɓisi ɓɔ ʉnɔtʉ. 28Angbinga ngɨa a꞉ɓio-ɔɔ anɔta, mwana mʉngana ɔ꞉pʉnga-sɨ achwɛiso ta ɨkɔndɔ. Kʉdɔ, moi ngɨa anɔtokiso, a꞉fa ɨkɔndɔ ngɨyɛnɛnɨ, nɔ, ɔ꞉ɨnga nɔ muki wɔta ngbʉ, ga ɨyɔ ɓɔ: «Gwa ngɨa ɔ꞉chwɛɔ pɛɨ, ɨyakɛ.» 29Ɨyɛ ndʉ, a꞉toiso ɨkɔndɔ, yakamɛngana, tɨa manye ɔ꞉pʉnga chwɛa. Ga moi ngɨa anɔtokiso ɓɔ: «Ʉwɛ, wɔ꞉ganɔ-sɨ ɨngbaa tɨa nɔ ɓʉkaɓʉkaɨ ɓanɨ, dɔtanɨ?» Kʉdɔ, ɔ꞉mʉsʉa ino tɨa ɓɔ Pɛlɛsɨ#38:29 Pɛlɛsɨ: pɔ ɓɔ ɨsɨ yɔngɔ ɓɔ ɨngbaa, nɔ Ebelenia. 30Manye ngɨyɔmɔ a꞉chwɛa ɨyɔ tɨta nɔ muki wɔta ngbʉ ngʉwɔnanɨ, aɨkɔndɔ, ɔ꞉mʉsʉa ɨyananɨ tɨa ino ɓɔ Jɛla#38:30 Jɛla: pɔ ɓɔ ɨsɨ yɔngɔ ɓɔ jɛa, nɔ Ebelenia.

Currently Selected:

Mʉkpanganɨa 38: buuN

Highlight

Copy