Mʉkpanganɨa 37

Yɛjɛfʉ ɔngakɨɔ ɓamanye lɨwɔtɔ

1Yakɔɓɔ a꞉wolo ɨkʉmbʉ anɔ Kanana, aki ɨsɛ Isaka a꞉wolo jɛnɛ-ɛɛ ndʉ mɛɛka.

2Uduɓa ngʉwɔ ɓana ɓɔ Yakɔɓɔ, wa ɓɔ. Ngbinga ngɨa Yɛjɛfʉ a꞉ɓio-ɔɔ tɨa nɔ mago tɛkɛɓɛ nɔ mɛɗɨanɛka, a꞉tɨpɛmakɨa ɓakɔndɔlɔ, nɔ ɓamɛmɛ, ɨɓɔ nɔ ɓamanye, ɓana ɓɔ Bila, nɔ ɓana ɓɔ Jɨlɨpa, ɓoi ɓɔ ɨsɛ. Ɨyɔ Yɛjɛfʉ, a꞉tɨsa aɓɨakɨa ɨsɛ, yaka yɛta ɓɨɓɨ iɓomu ngɨyɛ ɓamanye ɓa꞉tɨkɨa. 3Ɨsalaɛlɛ a꞉tɨkʉnda Yɛjɛfʉ nɔgbɛ, anagaaka ɓana ngʉɓangɔ ɓɔmɔ ɓaɓomu, dɔ, a꞉mʉnɔta ngbinga ngɨa, ɨyɔ a꞉ɓio-ɔɔ tɨa mʉkʉʉ. Ɔ꞉minjo tɨa kʉ nɔ kɔtɨ ata muɗo, mʉta ɓɔ kpɛɛ kpɛɛ. 4Ndʉ ɓamanye ɓɛ꞉na ɓɔ ɨsɛ eɓo akyɔmʉkʉnda ɨyɔ nɔgbɛ, kʉdɔ, ɓa꞉pʉnga nayɔ ayaa. Ɓa꞉ngɔɓɨmʉngɨa tii ɓata, ɨyɔ yaka nɔ iso yɔ majɨɔ.

5Tɨa naɓutu mʉngana, Yɛjɛfʉ a꞉natakanaka lɨwɔtɔ. Ɨyɛ tɨta ɔ꞉ngakɨa ɓamanye lɨwɔtɔ ngɨlɛnɛnɨ, ɨɓɔ, ɓɔ꞉mʉyaa tɨta nɔgbɛ. 6Ga Yɛjɛfʉ naɓɔ aka ɓɔ: «Nɔnɨtɔ ɓɔ, ʉkeni-sɨ lɨwɔtɔ ngɨlɛ nɔ꞉takanakɔ pɛngɛ. 7Tɔ꞉ɓio pɛngɛ akɔ sangaka lɨkaja lɔ nganɔ, akɔ ɓana ɓɔ ɓapeɓu, ati ɔ kʉbaa ɓɔ. Ndʉ aka, ɨkaja yɔ nganɔ ngɨyɛsɛmɨ, yɔ꞉tunduono ga tuu, nɔ yɔ꞉maa ga gba. Tɨa ileno, lɔ꞉ɨkunguo ga kuu, nɔ lɔ꞉gbʉkʉmɨa ananɨ apɛɨ ɔngɔ.» 8Ɓamanye ɓɔ꞉mʉngɨa ɓɔ: «Ya ndɨ asugo ɓɔ, wa꞊ɓio ngama eso? Nɔ wɔ꞊ɓio tɨa nɔ ʉpanʉ akʉʉ eso?» Akɔ yaka yɔ lɨwɔtɔ, nɔ ɓanamʉkɔ ngʉɓangɔ, ɨɓɔ ɓamanye ɓɔ꞉mʉyaa tɨa nɔgbɛ.

9Ɔ꞉tɔnatakanaka ɓata, nɔ ɔ꞉tɔngakɨa ɓata ɓamanye kʉ ngakɨanɨ: «Nɔ꞉takanakɔ pɛngɛ ɓata! Ananɨ, yɔ꞉ɓio pɛngɛ atɨ ɨpá, nɔ ui, nɔ ndata tɛkɛɓɛ nɔ mʉngana, yɔ꞉ɓio pɛngɛ agbʉkʉmakɨa apɛɨ asɛmɨ.» 10Ɔ꞉ɓʉngɨa atɨ ɨsɛ, nɔ ɓamanye. Yakamɛngana, ɨsɛ ɔ꞉mʉgʉga, nɔ ɔ꞉mʉngɨa ɓɔ: «Lɨwɔtɔ ngɨlɛsɔɔ, ɨsɨ yɔngɔ ya-sɨ ɨmanɨ? Ya ndɨ anɨtanɨa ɓɔ isu, nɔ atɨ anʉ, nɔ ɓamananʉ tɛka agbʉkʉmakɨa akɔɓɔya mesu aɨsɨ apɛɨ asɔɔ?» 11Ɓamanye ɓɔ꞉mʉkwɨa imi. Yakamɛngana, ɨsɛ ɔɓio ta atungwoko lɨwɔtɔ ngɨlɛnɛnɨ.

Ɓamanye ɓɔ Yɛjɛfʉ ɓɔmʉgabɔ

12Ɓamanye ɓɔ Yɛjɛfʉ, ɓa꞉sa adyaakiso ɓakɔndɔlɔ, nɔ ɓamɛmɛ ngʉɓɔ ɨsɛ eɓo, anɔ Sɛkɛmʉ. 13Tɨa ɓisi mʉngana, ga Ɨsalaɛlɛ nɔ Yɛjɛfʉ aka ɓɔ: «Sɨ ɓamananʉ ɓadyakakiso ɓanama anɔ Sɛkɛmʉ. Ika, sa-sɨ nɛmɨ akangɨa eɓo.»

Ga ɨyɔ ɓɔ: «Iii, atʉma-pɨ, ɨmɨ ɨya.» 14Ga Yakɔɓɔ ɓɔ: «Nɔnɛtɔ ɓɔ, sa-sɨ nɛmɨ akangɨa eɓo, ɓɔ ɓa inani tanɨ, ɨhɔ nɔ ɓanama kʉtaa. Wɔ꞊nɛkɨa nɔ masaʉ ngʉka inani.» Kʉdɔ, Yakɔɓɔ a꞉mʉtʉma Yɛjɛfʉ anɨngwa inani a mugbundu wɔ Hɛbʉlɔnɨ anɨsa, anɔ Sɛkɛmʉ.

Ɨyɛ ndʉ Yɛjɛfʉ a꞉ɓio tɨa tinene aɓɔya anɔ Sɛkɛmʉ, 15mombi mʉngana ɔ꞉mʉgbʉka akɔyɛnganaka ananɨ achʉngbʉ. Ga mombi ngɨananɨ, nayɔ ɓɔ: «Wakɔhata ɨmanɨ?» 16Yɛjɛfʉ ɔ꞉mutosio ɓɔ: «Nakɔhata ɓana ɓɛnaa, kikiliki, anapana ɓaka aki ɓa-ɛɛ adyakakiso ɓanama.» 17Mombi ngɨananɨ, ɔ꞉musigio ɓɔ: «Ya ndʉ ɓɔ꞉sɔ sanɨ, dɔ, nɔ꞉ɓʉkɔ anʉnga ɓɔ: ‹Kiseni anɔ Dɔtanɨ.›» Kʉdɔ, Yɛjɛfʉ ɛ꞉sɨnganaka nɔ kyɛnda anɨsa ahata ɓamanye, nɔ ɔ꞉tɔɓʉgbʉka ta inani anɔ Dɔtanɨ.

18Ɓamanye ɓa꞉mɨna ta ɗu, angɛsɨnganenimʉ-sɨ pɔ tinene naɓɔ. Ɓɔ꞉singekio idimi nayɔ akɔnɨwa. 19Ɓɔ꞉mʉyakanakɨa ati eɓo ɓɔ: «Eee, ngama wɔ lɨwɔtɔ a tɨa anɨka. 20Ikeni, tʉmʉweni ɨtakɨtakɨ ngɨyɛ, nɔ tɔmugiso amati ɔ ʉpɨa mʉngana aka. Tabisugo ɓɔ nama ata ɗɛa ɔ꞉mʉwɔ, nɔ, tɛ꞊na suo tɨa aka lɨwɔtɔ ngɨlangɔ, la꞊kyananakɨa-ɔɔ.»

21Ɨyɛ ndʉ Lubeni ɔ꞉ka yaka ngɨyɛnɛnɨ, ɔ꞉hata nayɔ akɔɓwanakiso akɔ lɨkɔndɔ leɓo. Ga ɨyɔ naɓɔ ɓɔ: «Kikiliki, tatɨmʉwenimʉ ɓaka ta nɨwa.» 22Ga Lubeni ɓata naɓɔ aka ɓɔ: «Nátɨnjwakisenimʉ menike. Mugiseni gʉtʉ ta amati ɔ ʉpɨa mʉngana, amukengu aka, nɔ mombi atɨnapɨamʉ ɨkɔndɔ akʉʉ ɛngɔ.» Lubeni a꞉ɓio akʉnda nayɔ aɓwanakiso, alɨkɔndɔ leɓo, dɔ, imutoiso ta atɨ ɨsɛ.

23Ɨyɛ ndʉ Yɛjɛfʉ a꞉ɓɔya aka ɓamanye ɓa꞉ɓio-ɔɔ, ɨɓɔ ɓɔ꞉mʉɗuo kɔtɨ ata muɗo, ata kpɛɛ kpɛɛ ngɨangɔ, a꞉ɓio nayɔ mʉpɨnyɛ. 24Kʉdɔ, ɓɔ꞉mʉfa ga kwɨ, nɔ ɓɔ꞉mugiso amati ɔ ʉpɨa. Ʉpɨa ngʉwɔnanɨ, wa꞉ɓio ta ɓʉtʉʉ, sɔkɔmʉ nɔ mipo, inani amati ɔngɔ.

25Tɨa mbise ɔngɔ, ɓɔ꞉tɔwolo tɨa adyakaka. Ɨyɛ ndʉ ɓa꞉tɨna ɓajwa ɓɔ, ɓɔ꞉tɛna tɨa mʉkalapa wɔ Ɓaɨsɨmaɛlɛ. Ɨɓɔ, ɓa꞉ngwa anɔ Gɨlɨadɨ, anɨsa anɔ Misili. Ɓɔ꞉pakiseni ɓangamɨa ngʉɓeɓo adʉdʉ, ɓʉtɔɓɛ, nɔ ɓayaka nga ɓɔmɔ ɓɔta mvo tɨpɨ tɨpɨ#37:25 Ɓayaka ɓɔta mvo tɨpɨ tɨpɨ ngʉɓɔnanɨ ɓa꞉ɓisalɨa apɛmakɨa mɨnda akɔ yaka yɔ pɔwa nɔ tɔka ɓombi.

26Ga Yuda nɔ ɓamanye aka ɓɔ: «Tɛ꞊nɨa nɔ ɨjangɨa nga yino tanɨ, tɔmʉweni mwana ɔ ɨnaa eso, nɔ tɔnaya ingwo yangɔ? 27Tatɨmʉwenimʉ, dɔ ta꞉chwɛa ta naɓɔ, nɔ a kʉ menike keso ɓɔ kpɛ. Tɔmʉgabeni gʉtʉ, ta atɨ Ɓaɨsɨmaɛlɛ ngʉɓa aɓɛ.» Ɓamanye ɓɔ꞉mʉɓɨnyɨa. 28Ɨyɛ ndʉ, ɓombi ɓɔ magabʉ, Ɓamɛdɨanɨ ɓɔngɔ, ɓa꞉ɓio tɨa achana, ɓɔ꞉mʉɗuɗuo Yɛjɛfʉ, nɔ ɓɔ꞉muchwɛiso amati ɔ ʉpɨa. Nɔ ɓɔ꞉mʉgaba atɨ Ɓaɨsɨmaɛlɛ, akɔ mangyɛɛ kɔ mako kɔ dada ɓatɛkɛɓɛ ɓapɨnɨ. Kʉdɔ, ɓɔ꞉sa nayɔ anɔ Misili, ga ngo.

29Ɨyɛ ndʉ Lubeni a꞉tɔwa ɓata kʉ ananɨ akɔ ʉpɨa, yakamɛngana, sɔkɔmʉ ɨ꞉gbʉka ɓata Yɛjɛfʉ. Kʉdɔ, ɔ꞉natʉa lɨpʉkʉ ngɨlangɔ, ga huwa huwa, nɔ ikoko. 30Ɔ꞉tɔwa agbʉka ɓamanye, ga ɨyɔ naɓɔ ɓɔ: «Eee ɓe, mwana angɔmʉ ɓata inani amati ʉpɨa, nakyana pɨ dɔ ɨmɨ tanɨ?» 31Kʉdɔ, ɨɓɔ ɓamanye ɓɔ꞉sɨka ɓɔwa yagbonguo, nɔ ɓɔ꞉no kɔtɨ ata mʉta ngɨyɔ Yɛjɛfʉ amati ɔ menike kɔngɔ, ga vuu. 32Mbise ɔngɔ, ɓɔ꞉mʉtɔɨa ɨsɛ eɓo nɔ kɔtɨ ngɨananɨ, nɔ ɓɔ꞉musigio ɓɔ: «Aba-e! Ɨndɔ ɨna-sɨ kɔtɨ ngɨa, tɛ꞉nɔ akɛ, sɔkɔmʉ-sɨ ɨyɔ mwana asɔɔ?»

33Ɨyɛ a꞉kanga nayɔ ɓɔ, ga ɨyɔ ɓɔ: «Eee ɓe! Ɨna kɔtɨ ngɨa ɔ mwana asɛmɨ ɨyakɛ-ee! Ya ndʉ nama ata ɓʉkaɓʉkaɨ, ɔ꞉mʉfɔ pɛngɛ ɓaka Yɛjɛfʉ fanɨ, ɔ꞉mʉnatʉa ɓɔ chwɛɛ chwɛɛ, nɔ ɔ꞉mʉdya.» 34Kʉɓanɨ, Yakɔɓɔ ɔ꞉natʉwa lɨpʉkʉ ngɨlangɔ ɓɔ huwa huwa, nɔ, ɔ꞉namangana ikonio amangbo, ga ndu. Kʉdɔ, ɔ꞉kumonio didima wɔ mwanangɔ amati ɔ makwaa maja. 35Ɓana ɓɛngɔ ta ɓaɓomu ɓɔ sɛ, ʉɓa ɓegue, kʉndʉ ʉɓa ɓeɓoi, ɓɔ꞉kɨa angu nayɔ akɔsungo mʉtɨma, yakamɛngana, ɔ꞉yaa ta yaa. Ga ɨyɔ ɓɔ: «Naɓio ta amati wɔ didima, akɔɓɔya ta aka, nabigbʉka sina-ɔɔ, mwana asɛmɨ a ɓʉbɨɨ.» Ɨsɛ a꞉mʉndɨa ɓanɨ-o!

36Ambɔgɔ ɓɔ pe, Ɓamɛdɨanɨ ɓa꞉gaba jɛnɛ Yɛjɛfʉ, anɔ Misili gabanɨ, atɨ Pɔtɨfalɨ, ngama ɔ ɓasʉda ata mʉja, ngɨyɔ Falaɔ, nɔ kʉ ngama ɔ ɓapɛmakɨa ɓɔ boloko.

Currently Selected:

Mʉkpanganɨa 37: buuN

Highlight

Copy