Maatiyos 13

Yazriyetiih aymassal

(Markos 4:1-9; Luukas 8:4-8)

1Amaa lellecidde Yeesus careeko yewceh igil gimamalle defeye. 2Yadiyeh jalbadde defeyandah lel mango xiyaw alle yekettin. Amaa mango xiyaw lel inkoh igil gimamalle daw-yerhxin. 3Usuk lel aymassalah tayim arhxuk mangum akah warishe: “Yazriyeti yazraw ifaare. 4Yizriye gedda lel amaa zaraako gari arax afalle radeyaako kimbir yemeeteh beete. 5Zaraako gari lel mango buure hin dhayit le baarholle radeyaako, addale buure luuk miyinemhi sabbatah, akkanih yubqule. 6Ayrotta boodde gedda lel xarare. Rimid luuk miyinemhi sabbatah lel kafe. 7Zaraako gari keenanti fanadde rade, keenan aalih carsimeh lel kaa yisniqhe. 8Zaraako gari mece buuredde radeyaako mece fire baahe, gari bool, gari laxtam, gari lel soddom waqhtiya yemfeere. 9Yaabbe cokkak leti yaabboo!”

Aymassal macal

(Markos 4:10-12; Luukas 8:9-10)

10Sarrah katattaynit yemeetinyaako: “Aymihi aymassalah xiyawlih waanishsham?” akko yerhxin. 11Usuk lel taginah alle yedebbe: “Sinah carshi nigsinnahi mashthir kinam taarhagoona caashir sinah yomxoyeh yane, tenah laakin akah mamxayinna. 12Amayim lel le tiyah ziyaada akah ossimteyaako manginatah yaallo, hin tiyaako laakin amaa luuk yinem gantah akko tadawo kinamhi sabbatah kinni. 13Yablin hanuk miyabliini, yaabbin hanuk miyaabbiini, hido lel miduhaanamhi sabbatah kinni aymassalah tenlih waanisham. 14Rummah lel tenim, nabii Isayas waani tikmileh kinni:

‘Rummah taabboona kitin, laakin tafhamoona maki,

rummah tabloona kitin, laakin taarhagoona maki.

15Ta xiyawhi afcaado daabba tekkeh tanemhi sabbatah,

ten cokkak miyaabbe,

sinni intit alifeenih yanin.

Amaymih ten intit yablo mirhiica

ten cokkak lel yaabbo mirhiica,

ten afcaado lel mitafhime

usun yottalle gaxoona mirhiicaana, anu lel ten uruso yimixabaana.’#Isayas 6:9-10

16Atin laakin sin intit yablemih, sin cokkak yaabbemih baraka-lem kitin. 17Mango nobowa kee xaqqi-wannun atin tubliinim yabloona mangum hambeeren, laakin maballinnooni, atin taabbiinim yaabboona hambereereenih mabbinnoonim rummah sinak arhxiyuk ane.

Yazriyetiih aymassal caddowe

(Markos 4:13-20; Luukas 8:11-15)

18Yazriye tiyahi aymassal oobbaanta: 19Nigsinnat waani aabbinnan gedda afhime wayam, amaa umati yamiiteh, amaa kaa afcaadodde timzirriyem akko simbaacah kinni. Ta zari lel amaa arax afalle timzirriyem kinni. 20Amaa dhayitle buurelle timzirriyem lel, amaa waanitta yaabbe gedda akkanih xedenlih kabbaatatiya kinni. 21Yakko kibah, rimid malemhi sabbatah, dago gedda curah, amaa waanittat sabbatah cazaab kee hadaano tamiite gedda, akkanih gaba yaxaye. 22Amaa keenanti fanadde timzirriyem lel, amaa waanitta yaabbe tiya kinni, laakin ta caalamti nawashshiga kee solaadit doolab lel amaa waanitta yasniqhe, daro baahekkah lel raaca. 23Amaa mece buuredde timzirriyem lel, amaa waanitta yaabbeh yafhime tiya kinni. Rummah lel daro baahah yamfeere, wuli gedda bool waqhtiya, wuli gedda laxtam waqhtiya, wuli gedda lel soddom waqhtiya yamfeere.”

Kirdadti aymassal

24Tahe yerhxeh lel aki aymassal akah warishe: “Carshi nigsinna ishi dhagelle mece zara yizriye xiyawtoh higgida. 25Kaa xiyaw dhiinak laakin kaa nacabtooli yamiiteh sinraa fanadde kirdad akko yizriyeh yedee. 26Amaymih amaa takli yabquleh ilaw baaha gedda, amaa kirdad aalih yambulluwe. 27Amaa cari-manabottahi garuuza yamiitiinih: ‘Maddara, ishi dhagedde mece zara mazrayinnitoho? Aaginah kinni kirdad leyam?’ akko yerhxin. 28Usuk: ‘Tayim abteh tanem nacabtoole kinni’ akko yerhxe. Amaa garuuza lel: ‘Nedeyeyaako akko naskatto fadhdha?’ akko yerhxin. 29Usuk laakin: ‘Kirdad akko ayyaacuk nane arhxitin sinraa aalih bukkussanki, maale’ akko yerhxe. 30Orba fanah inkidde carsimooki xaba, amaa orbi yakke gedda lel yaciyye marak: ‘Tookomiinih amaa kirdad teskettinyaako xararo ciloh citreh urhuwa, ilaw laakin yi ilaw makhaazinodde eskettaanta’ akko arhxo kiyo.”

Adratto kee ayco

(Markos 4:30-32; Luukas 13:18-19)

31Aki aymassal lel taginah akah warishe: “Carshi nigsinna adratti caynahi zaratto xiyawti ishi dhagedde yizriyeyah kinni higgidam. 32Umbuka zaraako lel cindha, tanabe gedda laakin umbuka jardiin takleeko tanabeh xarha takke. Amaymih lel kimbir yamiitiinih sinni care xakukukke akko siraaxitan.”

33Aki aymassal lel akah warishe: “Carshi nigsinna, wuli numa beyteyaako inkoh muluxandah wuli tamana cusse yakke sinraa cagunudde hayte aycoh kinni higgidam.”

Nabii waani kee aymassal

(Markos 4:33-34)

34Yeesus tayim inkoh amaa mango xiyawah aymassalah kinni akah warishem; rummah aymassal hinnim walaa inkim akah miwarisho. 35Tayim lel amaa nabii yerhxeh yinem takmalo ciloh tekkem kinni:

“Inni af aymassalah faako kiyo,

caalam dhishshimtemko taahe sucutteh tinem lel arhxo kiyo.”#Zaabur 78:2

Kirdadti aymassal caddowe

36Sarrah amaa mango xiyaw xabeyaako caredde orobe. Kaa katattaynit lel: “Dhaget kirdadti aymassal noh ishrix” arhxuk alle yemeetin. 37Usuk: “Amaa mece zara yizriyeti Xiyawti Barha kinni. 38Amaa dhage lel ta caalam kinni, mece zari lel nigsinnat cindham kinon. Amaa kirdad lel uma tiyahi cindham kinon. 39Amayim yizriye nacabtooli lel ibliis kinni. Amaa orbi lel waqhti abayshima kinni. Amaa yaciyye mari lel malaykut kinon. 40Amaa kirdad yeketteh giradde akah xarareeka balih, ta waqhtih abayshima lel amaye takko kinni. 41Xiyawti Barhi ishi malaykut dhirhiyeyaako kaa nigsinnaako inkoh zambi sabab kinam kee sercat-malit yeyyeeciinih, 42habalbal-tarhxe giradde ten cidoona kinon. Amadde lel weeca kee ikokti xarqam yakko kinni. 43Amaymik sarrah, xaqqi-wannun sinni Abbahi nigsinnadde ayrotta balih ifishoona kinon. Yaabbe cokkak leti yaabboo!

Sucutte cukrah aymassal

44Carshi nigsinna, dhagedde sucutte cukra, xiyawti geye gedda lel malammih amadde sucuseyah higgida. Xedenih lel yadiyeyaako inkoh luuk yinem yaabixeh amaa dhage dhaama.

Qaali kin undhudhdhah aymassal

45-46Amayim balih carshi nigsinna, mece luul wagiya bacshaara, amaa qaali kin inki luul geya gedda lel, inkoh luuk yinem yaabixeh amaa luul dhaameyah higgida.

Caasat intileh aymassal

47Amayim balih carshi nigsinna, badalle siddishimteh umbuka caynah caasa teskette intileh higgida. 48Tammaage gedda lel, gimamalle yayyaaciinih defeyenyaako mecem nuwattadde akko hayan, umam lel amulalle akko cidan. 49Amaydo, ta waqhtih abayshimalle amayim takko kinni. Malaykut yemeetiinih amaa uma mara xaqqi-wannunko barhisheenih, 50habalbal-tarhxe giradde cidoona kinon. Amalle lel weeca kee ikokti xarqam yakko kinni.

Cusubam kee barrowe cukrar

51Tayim inkoh tifhimiini?” akko yerhxe. Usun lel: “Yoo” akko yerhxin. 52Usuk lel: “Amaydo, carshi nigsinnah yakko adrusinnan sercat dhiiceeni, cusubam kee baarroytem ishi cukraako yayyaace cari-manabottah kinni higgidam” akko yerhxe.

Yeesus Naazretille xinnitima

(Markos 6:1-6; Luukas 4:16-30)

53Yeesus ta aymassal abayshemko sarrah, amakkeeko amulalle yedee. 54Ishi dik hi daafolle yemeeteh lel ten sunagoogedde ten yuyduruse. Amaymih cibrah rabeenih lel: “Ta xiyawti ta xikma kee ta xayla-le abittot awlaako geye? 55Tati amaa oreeni barha makiho? Kaa inak Maryam makiho akko yarhxiinim? Kaa sacul Yacqoob, Yoosuf, Simcoon kee Yahuuda makiho? 56Kaa saculte inkoh nottaalih miyaniiniho? Amaydo, ta xiyawti tayim inkoh awlaako geye?” yerhxin. 57Amaymih lel usun kaa xineenih aaminekkah raacen. Yeesus laakin: “Nabii ishi dik hi daafo kee ishi careeko beexinille xishma-le” akko yerhxe. 58Ten imaan waytoh sabbatah lel amalle mangum naba ciyyo maabinna.

Currently Selected:

Maatiyos 13: SCC

Highlight

Copy