Maatiyos 14

Yaythimmiqhe Yohannis raba

(Markos 6:14-29; Luukas 9:7-9)

1Amaa waqhtedde Galiilaati mafarrit zoobah manabotta kuuk yine Heerodes Yeesus ware yoobbe gedda, 2ishi khaddamtek: “Tati yaythimmiqhe Yohannis kinni. Rabaako lel uguteh yane. Amaymih kinni lel ta xayla-le abittot kayyadde akkuk yanem” akko yerhxe. 3Kaa sacal yakke Filibboos numa kin Heerodiyasti sabbatah, Heerodes Yohannis yurhuweh xabshedde hayeh yine. 4Amayim lel Yohannis: “Ishi sacalhi numa marcishitto koh meedda” akko arhxuk yinemhi sabbatah kinni. 5Kaa yagdafo farhe hanuk laakin, Yohannis nabii kaa akkaluk yiniinimhi sabbatah amaa xiyawko mashshiite. 6Heerodesti ubkat lellec yekke gedda, Heerodiyasti barhä gerhah akah tirgideyaako Heerodes xedenishshe. 7Amaymih lel kaa esserinnannim akah abo akah dhiiwite. 8Tee ina akah tee fayishsheekah: “Yaythimmiqhe Yohannis hi amo biyattille hayteh yoh uxuu” akko terhxe. 9Amaa nugusudde mangum adde tossoobbe hanuk, ishi dhiiwa kee ishi gerhahi sabbatah akah tamxawo yeemere. 10Xiyaw dhirhiyeh lel Yohannis amo xabshedde yigrice. 11Kaa amo lel biyattille temeeteh amaa barhäh tomxoye, ishi lel ishi inah bahte. 12Kaa katattaynit lel yemeetiinih kaa rashsha beyenyaako yoocogin. Yeesusuh lel yedeynih akah warishen.

Yeesus koona shiix bettiisha

(Markos 6:30-44; Luukas 9:10-17; Yohannis 6:1-14)

13Kado Yeesus tayim yoobbe gedda, amakkeeko jalbadde gaxeh wuli zibo kin makaanolle ishi ulah yedee. Amaa mango xiyaw tayim yoobbin gedda laakin, daafofko ibah adde katayen. 14Usuk gimamalle yewce gedda mangum mango xiyaw yuble, raxmah uluc akko xarheenih lel ten laxuuteenit akah uruse. 15Kado kasi yekke gedda, amaa katattaynit alle yemeetiinih: “Takke zibo kin makaano kinni, baarho lel dhumteh tane. Folo sinneh dhaamitoonaaki ta mango xiyaw diika fanah ten dhirhii” akko yerhxin. 16Yeesus laakin: “Yadawna alle mitane. Atin bettimtam akah uxuwa” akko yerhxe. 17Usun: “Nanu koona kinnas kee lamma caasatto bisa kinni linom” akko yerhxin. 18Usuk lel: “Tena talle yolle baha” akko yerhxe. 19Sarrah, amaa xiyaw cashsholle defeyoona ten yeemereyaako, amaa koona kinnas kee lamma caasatto yibbirheh, agana carshelle kulux-yerhxeyaako dhaaco abe. Sarrah amaa kinnos yigdileyaako katattaynitih yoxoye, amaa katattaynit lel amaa mango xiyawah kelen. 20Inkoh beeteenih lel xayten. Amaa raace buturko lel yemmeege lamman kee taman jambiiliya yooqhocin. 21Amaa beete mari lel sayyo kee cindham hinnim labhat koona shiix kuuk yinin.

Yeesus layet bukalle gerha

(Markos 6:45-52; Yohannis 6:15-21)

22Akkanih lel amaa katattaynit jalbadde koreenih, usuk amaa mango xiyaw dhirhiyandah, yookomiinih amaa carhalle tabeenih akah sugoona ten yeemere. 23Amaa xiyaw dhirhiyek sarrah lel yassallaw ishi ulah koomalle yewce. Baarho dhumte gedda lel amalle inkettak yine. 24Amaa geddadde lel amaa jalba goomadhdheh tumuttukeyaako, xaaxatti nifko tee safucak yinemhi sabbatah, baarhooko mirixtah tine. 25Yeesus lel maaxah#14:25 Maaxah Barti saaca 3 ko 6 fanah yane waqhte igilille ibah gerheyaako tenalle yemeete. 26Amaa katattaynit usuk igilille ibah gerhak kaa yublin gedda, birriigeenih: “Xiyawti jinneh higgida” arhxuk gilixih zeeren. 27Akkanih laakin Yeesus: “Aydukum-erhexa, yotta kinni. Mimashshiitina” arhxuk tenlih waanishe.

28Bithroos lel; “Maddara, kotta yekkemko, layet bukalle kolle amaatok yi eemer” akko yerhxe. 29Usuk: “Amo” yerhxe. Sarrah lel Bithroos amaa jalbaako oobeh layet bukalle ibah gerhak Yeesusulle yemeete. 30Usuk laakin xaaxatta yuble gedda, mashshiiteh, yamandhaco farhe gedda lel: “Maddara, yi garger” arhxuk zeere. 31Yeesus lel akkanih ishi gaba dhirhiyeh kaa aleeleyaako kaa yibbirheh: “Ko imaan dago, aymih lammaa-garbitta?” akko yerhxe. 32Usun jalbadde koren gedda lel amaa xaaxatti daw-yerhxe. 33Amaa jalbadde yine mari lel: “Atu rummah Yallih Barha kito” arhxuk akah yucbudin.

Yeesus Gennesaaretille laxuuteenit urusa

(Markos 6:53-56)

34Amaa igilko tabeenih lel wuli Gennesaaret baarholle yemeetin. 35Amaa baarho hi xiyaw kaa yeerhegin gedda, inkoh ten wakalelle farto dhirhiyeenih, inkoh laxutteh tinem kaalle baahen. 36Kaa sareenah erherha bisa dhagoona lel kaa dhaacimen. Dhage mari lel inkoh uren.

Currently Selected:

Maatiyos 14: SCC

Highlight

Copy