Luukas 3

Yaythimmiqhe Yohannis arax yasqirribe

(Maatiyos 3:1-12; Markos 1:1-8; Yohannis 1:19-28)

1 Tiberiyos akko yarhxin Roomaati naba nugus hi nigsinnahi koonan kee taman-ya iggidah, Bontiyos Bilaatos Yahuudiyaati manabotta kuuk, Heerodes lel Galiilaati amotta, kaa sacal Filibboos lel Itureya kee Tirakhoonitisti amotta, Lisaaniyas lel Abileneti amotta kuuk, 2Hannas kee Kayaafas lel sheekhat makaabun kuuk yinin gedda, Yohannis Zakariyyaati barhi zibolle anuk, Yallahi waani alle temeete. 3Usuk lel zambi xabbot geyoona ciloh, toobat anthammaq warroyshak, umbuka Yordaanos wakalille yuzuure. 4Nabii Isayas kitaabhi waanidde akah tunkuttubeh taneekah:

“Zeeratiih dhaw zibolle yamabbe:

‘Maddarah arax akah isqirriba,

kaa arax rig-ishanta.

5Umman xoolim yammaago,

umman kooma kee xangal lel sam-yarhxo,

kodhdharh rig-yarhxo,

xogaagid kin arux lel yamsalxano,

6umman xiyawti barhi lel Yallahi garger yablo kinni.’”#Isayas 40:3-5

7Amaymih, Yohannis yanthammaqho kayyalle temeete mango xiyawak: “Ko datali zarawo! Amiituk tane kuraako kuddoona mii sin asuuse? 8Amaydo, toobah missil fire lem aba, sinnedde lel ‘Abraahim abbah lino’ tarhxoona meerherhishina. Yalli Abraahimih ta dhayitko cindham akah abo dhiicam sinah warisha. 9Kado yakkeedo faas xorhti rimidille carhah yane. Amaydo, mece daro baahinnexe xarha tiggiriceh giradde gaxta”, akko yerhxe.

10Amaa mango xiyaw lel “Amaydo, ayim abno nolle tane?” yerhxiinih kaa esseren. 11Usuk lel “Lamma qamish aallinnanti, inkim aallinnixe tiyah xaziila. Macaasha aallinnanti lel amayim balih” yerhxeh alle yedebbe. 12Miiri yaskattit yakkeedo yanthammaqhoona yemeetiinih: “Mudarris, ayim abno nolle tane?” akko yerhxin. 13Usuk lel “Akah sin yeemeriinimko ziyaada maskattina” akko yerhxe. 14Caskar yakkeedo: “Nanu lel, ayim abno nolle tane?” arhxuk kaa esseren. Usuk lel “Walaa inketta maskalaabatina, hido lel zirabah maksasina, sinni maahiyah lel iqhnica” akko yerhxe.

15Amaa xiyaw ilalta luuk yiniinimhi zacabah, Yohannisik “Kela tati Masiix yakke?” arhxuk inkoh sinni afcaadodde axeesebuk yinin. 16Yohannis lel: “Anu layeh sin aythimmiqhe, laakin yottaako ziyaada xayla leti amiituk yane. Anu lel kaa kabelhi ragad akko aftaxo meeda. Usuk lel Quddus kin Ufaye kee girah sin yaythammaqho kinni. 17Ishi cawda yatsrago kee sinraa ishi ilaw qafodde yaskatto ciloh, kaa mase kaa gabadde tane. Xasar laakin badinnixe giradde xararisho kinni” yerhxeh alle yedebbe.

18Taginah lel, usuk xiyaw aki mango uguuguslih Mece Ware ten yiybissire. 19Galiilaati affara zoobah manabotti Heerodes laakin tamaa kaa sacalhi numa kin Heerodiyasti zacabah kee inkoh aki umaani abeyah Yohannisih cadalime gedda, 20tayim lel aki mangumudde ositeh: usuk Yohannis xabshedde alife.

Yeesus anthammaq

(Maatiyos 3:13-17; Markos 1:9-11)

21Tekke lel, amaa xiyaw inkoh anthimmiqhuk yinin gedda, Yeesus yakkeedo anthimmiqhuk yine. Usuk assilluuk lel carshi fakkiime, 22Quddus kin Ufayi lel nabseelih xamaamat xibarak kayyalle oobe. Carsheeko lel dhaw yemeete: “Atu yinkixxine Yi Barha kito. Anu kottaalih xedeneena kiyo.”

Yeesus Masiix maabako

(Maatiyos 1:1-17)

23Yeesus ishi aydaras erherhishe gedda lel soddom iggidiya takkem cumreh luuk yine. Akah kaa akkaluk yiniiniikah usuk Yoosuf barha, Ceelit barha, 24Mattat barha, Leewit barha, Melkhit barha, Yannayit barha, Yoosuf barha 25Mattatiyas barha, Caamoos barha, Naxuum barha, Eslit barha, Naggayit barha 26Maat barha, Mattatiyas barha, Semeyin barha, Yooseekh barha, Yoodit barha, 27Yoonaan barha, Reesat barha, Zerubbaabel barha, She-altiyel barha, Neerit barha, 28Melkhit barha, Addit barha, Koosam barha, Elmadam barha, Ceer barha, 29Yehooshucit barha, Eliicezer barha, Yoorim barha, Mattat barha, Leewit barha, 30Simcoon barha, Yahuudi barha, Yoosuf barha, Yoonam barha, Elyaaqhiim barha, 31Meleyit barha, Mennit barha, Mattaatit barha, Naataan barha, Dawud barha, 32Yishxay barha, Coobed barha, Boocaz barha, Salmoon barha, Naxshoon barha, 33Cammiinaadaab barha, Admin barha, Arnit barha, Xetsroon barha, Beretsi barha, Yahuudi barha, 34Yacqoob barha, Isxaaq barha, Abraahim barha, Terax barha, Naaxoor barha, 35Seruug barha, Recut barha, Beleg barha, Ceeber barha, Shelax barha, 36Qeenan barha, Arpaksad barha, Sheem barha, Nuux barha, Laamek barha, 37Metuuselax barha, Xanokh barha, Yaared barha, Mahalal-eel barha, Qeenan barha, 38Enoosh barha, Sheet barha, Adam barha, Yallih barha kuuk yine.

Currently Selected:

Luukas 3: SCC

Highlight

Copy