Luukas 23

Yeesus Bilaatos nifille

(Maatiyos 27:1-2,11-14; Markos 15:11-15; Yohannis 18:28-38)

1Sarrah, amaa teketteh tine xiyaw inkoh uguteenih Bilaatosulle kaa baahen. 2Tahe yerhxiinih lel kaa yaksasoona erherhishen: “Ta xiyawti, ishi nabsekke Masiix, nugus kiyo arhxuk kee ta xiyaw doolabeyaako Roomaati naba nugusuh wirko naxayemko ni deesak noh suge.” 3Bilaatos lel: “Atu Yahuud nugus kitoho?” yerhxeh kaa essere. Usuk lel: “Atu gantah arhxituk tane” yerhxeh alle yedebbe. 4Amaymik sarrah lel Bilaatos, sheekhat manabottit kee tekette xiyawak: “Ta xiyawtodde cagab-wanna akko abtam adde migeyinniyo” akko yerhxe. 5Usun laakin: “Umbuka Yahuudiyalle, Galiilaako erherhisheh ta baarho fanah gantah aydurusuk xiyaw zirigak yane” arhxuk ambeetsecuk yinin.

Yeesus Heerodes nifille

6Bilaatos tayim yoobbe gedda, ta xiyawti Galiilaati tiya yakkemko esserime. 7Usuk Heerodes galedde tane zoobah tiya kinam yeerhege gedda lel amaa waqhte isheh Yerusaalemille yine Heerodes fanah kaa dhirhiye. 8Heerodes Yeesus yuble gedda kaa yablo mango farhi luuk yinemhi sabbatah mangum xedene, amayim lel kaa ware yoobbeh yinemhi sabbatah kee usuk aba wuli bexsiisha ishaarar yablo caagak yinemhi sabbatah kinni. 9Amaymih usuk wuliidhdha kaa esserehaaki usuk radde maadabbinna. 10Sheekhat manabottit kee sercat dhiiceenit lel dhacumaatih kaa aksisuk agaagalle daw akko yerhxin. 11Heerodes kee kaa caskar lel kaa ilaaceniyaako alle tsaggarowen. Carha-mece sara kaa sarisheh lel Bilaatosulle kaa yedebbe. 12Heerodes kee Bilaatos lel amaymik basolle sittiyahi cangit kuuk yiniinimko amaa lellecidde soxoba yekkin.

13Bilaatos lel sheekhat manabottit, reezon kee xiyawah inkoh inkidde akah deecimeh: 14“Ta xiyawto xiyaw aylalawuk yane tiya balih akko abteenih yolle bahten. Sin nifille imirmiremik sarrah lel, taykinna, tamaa atin akah kaa tiksisiinimko lel ta xiyawtodde cagabah inkim adde migeyinniyo. 15Heerodes yakkeedo adde migeyinna, notta fanah kaa yedebbe. Ubula, rabi akah eeddam usuk abeyah walaa inkim mitane. 16Amaymih, kaa iqhtsiceh kaa dhirhiyo kiyo” akko yerhxe. [17Cid cidih lel inki maxbuushsha akah yayyaacem labcaadeenih yinin.]

Bilaatos Yeesus masqalak takarimo yaxaye

18Usun laakin: “Ta xiyawto mirix nok ishaaki Barabbaas noh eyyec” yerhxiinih inkoh zeeren. 19Barabbaas lel daafolle erherhe cigirgir kee gidfoh xabshedde cidditeh yine tiya kuuk yine. 20Bilaatos lel Yeesus dhirhiyo farheyaako malammih tenlih waanishe. 21Usun laakin: “Masqalak Takar, Masqalak kaa takar” arhxuk zeeren. 22Maddaxit gedda lel: “Aymih? Umaanih ayim abeh yane? Rabo akah eeddamah walaa inki cagab adde migeyinniyo. Amaymih iqhtsiceh kaa dhirhiyo kiyo” akko yerhxe. 23Inkoh wac-yerhxiinih lel takarimo alle tanem gaxen gaxeenih kaa esseren. Ten andhax lel agana gaxe. 24Bilaatos lel ten farhi balih takko abayshe. 25Cigirgir kee gidfoh xabshedde cidditeh yine xiyawto, usun esserenya, yeyyeeceh, Yeesus laakin ten farhi balih tillaabisheh kaa yosxoye.

Masqalakkehi takarimnan

(Maatiyos 27:32-44; Markos 15:21-23; Yohannis 19:17-27)

26Usun kaa beyak, zibooko amiituk suge wuli Simcoon Kureeneeko kinya yibbirhiinih, Yeesus sarradde gaxeh kaa masqal yaaqhaco alle hayen. 27Mango xiyaw kee sayyo kayyah zertah taxzineya lel sarradde akko aduuk yinin. 28Yeesus laakin tenadde yufkuneyaako: “Yerusaalem saytoo, sinne kee sinni cindhamah weca kibah yottah miweecina. 29Amayim lel taykinna: ‘Gedam, inkim baahinnixe guzez kee dhoysheh sorha angug baraka-lem kinon’ adde yarhxin maaxi yamaato kinamhi sabbatah kinni. 30Amaymik sarrah lel koomamak: ‘Nolle rad’, xanguluk lel: ‘Ni agoogish’ akko yarhxoona erherhishoona kinon. 31Amayim lel xorh andharhuk tayim akko abanya, kafa gedda ayim takko kinni?” akko yerhxe.

32Aki lamma, wuli umam-abeenit kinya lel, kaalih yagdafoona beyak yinin. 33“Amot xanxanta” akko yarhxin makaano gufen gedda lel amalle, amaa umam-abeenit yakkeedo, wuli tiya kaa mizgi gabooko, wuli tiya lel kaa guri gabooko eelih hayeenih masqalak kaa takaren. 34Yeesus lel: “Wobba! abaanam miyaarhigiiniiki alle xab” yerhxe. Kaa sara xazitoona lel cija ciden. 35Xiyaw daw-yerhxiinih abluk, amaa reezon laakin: “Usuk Yallih Masiix, kaa Doorime tiya yekkemko, aki mara gargeerek ishe gargeero” arhxuk alle aasuluk yinin. 36Caskar gantah kab alle yerhxiinih cur-tarhxe wayni akah yoxoynih alle digirak: 37“Yahuud nugus tekkemko, ishe garger!” akko yerhxin. 38Kaa bukakke lel: “Tati Yahuud Nugus kinni” tarhxe kataaba tine.

39Amaa takarimteh tine umam-abeenitko wuliti lel: “Atu Masiix makitoho? Ishe kee notta garger” arhxuk akah waatimak yine. 40Ooti laakin: “Inki caynah firdedde tanito hanuk, Yalla mimashshitta? 41Nottah noh, ni abittoh jaza kabbaatak nanino, ta xiyawti laakin umaanih walaa inkim maabinna” yerhxeh kaa yoskoolofe. 42“Yeesus, ishi nigsinnalle tamiite gedda yi izzikkir” lel yerhxe. 43Usuk lel: “Rummah, kaafa yottaalih jannadde takko kitom kok arhxiyuk ane” akko yerhxe.

Yeesus raba

(Maatiyos 27:45-56; Markos 15:33-41; Yohannis 19:28-30)

44Kado lellecti abrha tekkeh tine, umbuka baarholle lel aykee kasit saaca adox fanah dite tekkeh tine. 45Ayro dattoyte. Macbadti carih goleena lel candhiirhoh lammalle gaxte. 46Sarrah lel Yeesus wac-yerhxeyaako deecoh: “Wobba! Inni ufaye ku gabadde hayak aniyo!” yerhxe. Tahe yerhxeyaako lel abayshimalle kaa wafa tewce. 47Bool caskartiyah manabotti tekkeh tinem yuble gedda: “Rummah ta xiyawti xaqqi-wanna kuuk yine” arhxuk Yalla yeynebe. 48Tayim yabloona inkoh amalle teketteh tine xiyaw lel ta tekkeh tinem yublin gedda sinni naxur aatukuk careh gaxen. 49Inkoh kaa taarhigem kee sayyo Galiilaako kaa katayteya lel tayim abluk mirixtalle daw-yerhxin.

Yeesus macaga

(Maatiyos 27:57-61; Markos 15:42-47; Yohannis 19:38-42)

50-51Taykinna lel amalle wuli Yoosuf akko yarhxin xiyawti, Yahuud daafo kin Arimatayaako kinya yine. Usuk arabaako yekkeh mece xiyawto kee xaqqi-wanna kuuk yine. Usun bakinnannim kee abinnannimlih attifiqhuk miyine. Yallih nigsinna lel ilaalak yine. 52Ta xiyawti Bilaatos fanah yedeeyaako Yeesus rashsha kaa essere. 53Amaymik sarrah lel oobisheyaako dabalaan maknazah kaa yiknizeh tayek basoh walaa inketti adde amcuginnixe qooqhaxadde faraacime qabredde kaa yoocoge. 54Anqaraarabti lellec kuuk yineyaako Sambat erherho luuk yine. 55Galiilaako Yeesuslih temeete sayyo lel Yoosuf kataynih amaa qabre yublin. 56Sarrah gaxenyaako lel qamamaat kee cithir-le zeet amaa rashshah yakkeya yisqirribin.

Amaa amre balih lel Sambatah yucrufin.

Currently Selected:

Luukas 23: SCC

Highlight

Copy