Luukas 24

Rabaakohi ugut

(Maatiyos 28:1-10; Markos 16:1-8; Yohannis 20:1-10)

1Amaa sayyo laakin baxuurooko afti lellecidde, dhaxiine ifanih amaa yisqirribiinih yinin qamam beyeenih amaa qabre fanah yedeyin. 2Amaa qabreeko lel duma akko tendedebbeh akah sugte. 3Addadde oroben gedda laakin Maddara kin Yeesus nabse migeyinnooni. 4Taykinna lel amaymih bexsiitak, lamma xiyawti lilic-yarhxe sara sariteya ten afalle daw-yerhxin. 5Usun mashshiitenyaako nifih baarhodde cunuunak, amaa mari: “Yane tiya rabtemhi fanadde akah wagiitaanam ayim kinni?” akko yerhxin. 6“Usuk rabaako ugutenkah talle miyane. Galiilalle anuk ayim sinak yerhxeh yinem izzikkira. 7Amayim lel Xiyawti Barhi zambi-wannunti gabadde rado kinam kee masqalak takarimeyaako maddaxit lellec rabaako uguto alle tinemhi sabbatah kinni.” 8Usun lel kaa waani yizzikkirin. 9Amaa qabreeko gaxenyaako lel tayim inkoh amaa inikan kee taman kee aki xiyawah warishen. 10Tayim amaa fartottitik terhxem lel Magdalat Maryam, Yohanna, Yacqoob ina kin Maryam kee tenlih tine aki sayyo kuuk yinin. 11Ta waani laakin tinem-tineh adde yimmingidenkah ten maamaninnooni. 12Bithroos lel uguteyaako amaa qabre fanah yerde, cunuuneyaako addadde kulux-yerhxe gedda lel amaa maknaz ishi ulah yuble. Ta tekkeh tinemih cibrah rabak lel careh yedee.

Emmayusaati araxadde

(Markos 16:12-13)

13Amaa lellecidde lel tenko lamma wuli Emmayus akko yarhxin dik Yerusaalemko inikan kee taman kiilometer takkeya fanah aduuk yinin. 14Sinne-sinneh lel inkoh amaa tekkeh tinemidde waanishak yinin. 15Inkidde waanishak kee haasawak anuk lel isheh Yeesus kab adde yerhxeyaako tenlih yedee. 16Kaa yaarhigiinimko laakin ten intit deesimeh yine. 17Usuk lel: “Ayim kinni ta adiitin sittaalih abaa sugten wagri?” akko yerhxe. Usun lel yiqhdibinyaako daw-yerhxin. 18Amaymik sarrah tenko wuliti, Kiile-obas akko yarhxinya: “Kotta bisa akkale Yerusaalem gerhenti ta ayyamadde amalle tekkem aarhiginnixeya?” yerhxeh alle yedebbe. 19Usuk lel “Ayim?” akko yerhxe. Usun lel: “Naazret Yeesus zacabah, ta Yalla kee umbuka xiyawhi nifidde abitto kee waanittah dhiiceena kin nabii kuuk yine xiyawto. 20Ni sheekhat manabottit kee reezon aaginah rabih yamfarrado Kaa yiyrhibirhiinim kee aaginah masqalak kaa takareenim. 21Nanu laakin Israa-eel mayyaaca yakko cag abinneh nine. Yoo, amayimko bextih, tayim tekkemko taahe kaafi maddaxit lellec kinni. 22Ummanimko ziyaada lel wuli ni zooba kin sayyo ni bexsiishen. Usun subxe qabrelle yinin. 23Kaa nabse geye wayen gedda lel, usuk wafaalih yanem akko yerhxe malaykutti mablo gantah nuble arhxuk lel gaxen. 24Nottaalih tinemko gari lel amaa qabre fanah yedeyinyaako amaa sayyo akah yerhxiinih yiniiniikah geyen. Kayya laakin maballinnooni” akko yerhxin. 25Usuk lel: “Ko nobowa inkoh waanisheenim yaamano waye tirir afcaado le duudito! 26Masiix taymih yimcizzibeh ishi nabnedde orobo farhshishsham makiho?” 27Moosaako erherhisheh umbuka Nobowa, kaa zacabah umbuka Kutuubudde tanem inkoh akah caddoyshe.

28Sarrah lel amaa alle aduuk yinin dikih yendhewwin. Mirix-ta fanah aduuk yine tiya balih lel adde yimmingide. 29Usun lel sirii ginah: “Baarho kamboh dhuma kinni, ayrotta tentebeh tanek nottaalih dhin” arhxuk kaa dhaacimen. Usuk lel careh tenlih yedee. 30Tekke lel, maaddille tenlih defeyeh, folotta beyeyaako dhaaco alle abeh yigdileyaako akah yoxoye. 31Ten intit fakkiteyaako lel kaa yeerhegin. Ten mablooko lel yelee. 32Sinne-sinneh lel: “Usuk adiinuk araxadde Kutuub caddooso faakeyaako nottaalih waanishe gedda ni afcaadod addaako nodde bololeh makiho?” sittak yerhxin. 33Amaa saacadde uguteenih lel Yerusaalem gaxen. Amaa inikan kee taman kee amaa tenlih inkidde teketteh tinem lel geyen. 34“Maddari lel rummah rabaako uguteh yane, Simcoonuh lel yumbulluwe!” arhxuk yinin. 35Usun lel araxadde ayim tekkeh tinem kee folotta agdiluk aaginah akah yimidhdhigem akah warishen.

Yeesus ishi katattaynitih yambulluwe

(Maatiyos 28:16-20; Markos 16:14-18; Yohannis 20:19-23)

36Taymidde waanishak lel Yeesus isheh ten fanadde sooleyaako: “Salaam sinah yakko!” akko yerhxe. 37Usun laakin ufaye abluk yanin sinne yekkeliinih birriigeenih mashshiiten. 38Usuk lel: “Aymih kinni tamsheeqheliinim, aymih kinni sinni afcaadodde shakke haytaanam? 39Yi gabub kee yi iboobi ubula. Tati yotta kinni! Yi dhagantaaki ubula! Anu liyom akah tabliiniikah, ufayi xazo kee lafuf maleya” akko yerhxe. 40Tahe yerhxeyaako lel ishi gabub kee ishi iboobi ten yuybulluwe. 41Usun xedenih kaddih yaamanoona waynih cibrah rabak lel: “Talle beetaanamah litiinim leho?” akko yerhxe. 42Usun solliime caasatti dhacto akah yoxoyin. 43Usuk lel bishshiiteyaako ten afalle beete.

44Amaymik sarrah lel usuk: “Tayim lel anu sinlih aniyuk, yi sabbatah Moosat Sercat, Nobowa kee Zaaburudde tunkuttubem inkoh takmalo alle tane sinak erhxeh iniyo yi waani kinni” akko yerhxe. 45Amaymik sarrah lel amaa Kutuub yafhamoona ciloh xangal akah faake. 46Tahe lel akko yerhxe: “Masiix yamcazzabo kinam kee maddaxit lellec rabtemko uguto kinam tunkuttubeh kinni. 47Kaa migacalle lel tooba kee zambi xabbot Yerusaalemko erhedhdheh inkoh ummatalle warroyto kinni. 48Atin lel taymih shohoda kitin. 49Taykinna lel yi Abba wacde akah sayeh yinem sinah dhirhiyak aniyo. Atin lel aganaako xayla sarittaanandah amaa daafodde suganta” akko yerhxe.

Carshellehi kornan

(Markos 16:19-20)

50Irolle lel aykee Beetcaniya fanah ten beyeyaako ishi gabub xaf-isheh ten yeybeereke. 51Tekke lel, ten aybeerekuk yinemko ten xabeyaako lel carshelle yumuqquce. 52Usun lel akah yucbudiinih mango xedenlih Yerusaalem gaxen. 53Yalla faylishitak lel maqhdas caredde dhuguugulusen.

Currently Selected:

Luukas 24: SCC

Highlight

Copy