Luukas 22

Yeesus gidfohi xagara

(Maatiyos 26:1-5; Markos 14:1-2; Yohannis 11:45-53)

1 Faasiga akko yarhxin Cadublat Xabazahi cid lel kab-yerhxeh yine. 2Sheekhat manabottit kee sercat dhiiceenit lel xiyawko mashshiiteenimhi sabbatah aaginah akah kaa yagdifiinikah wagiyak yinin.

Yahuuda Yeesus yasxaw abaysha

(Maatiyos 26:14-16; Markos 14:10-11)

3Amaymik sarrah lel Sheethan Iskariyoot akko yarhxin Yahuuda amaa lamman kee taman katattayniyaako kuuk yineyadde orobe. 4Usuk lel yedeeyaako Yeesus aaginah yayrhibirhem sheekhat manabottit kee maqhdasti carih dhawrhenti manabottitlih zatteye. 5Usun lel xedeneenih fiddat solaadi akah yaxawna gaba-beeten. 6Usuk yakkeedo yittifiqheh, tenalle kaa yayrhabarho tekette xiyaw adde anniinnixe caashir wagiyak yine.

Faasiga katattaynitlih

(Maatiyos 26:17-25; Markos 14:12-21; Yohannis 13:21-30)

7Amaymik sarrah lel Faasigaati leemi adde yamraxxado alle tine Cadublat Xabazahi cidti lellec yemeete. 8Amaa gedda, Yeesus: “Aduwantaaki bennok Faasigi dirar noh isqirriba” yerhxeh Bithroos kee Yohannis dhirhiye. 9Usun: “Awla nasqirribem nok fadhdha?” akko yerhxin. 10Usuk: “Oobbaanta, daafodde orobtan gedda, layet citro yaaqhuce xiyawti sinah garawo kinni. Usuk adde oroba care fanah kaa kataanta. 11Cari-wannak lel akko erhexa: ‘Mudarris yarhxe: Inni katattaynitlih Faasigi dirar alle beeto liyo gerhenti cari awla yane?’ 12Usuk lel bukat fidin cari siddishimeya sin yayballaw kinnik amadde isqirriba”, akko yerhxe. 13Usun lel yedeynih tamaa usuk tenak akah yerhxeekah geyen, Faasigi dirar lel yisqirribin.

Maddari dirar

(Maatiyos 26:26-30; Markos 14:22-26)

14Usuk lel saaca gufte gedda fartottitlih maaddille defeye. 15Usuk: “Umaatih geyamko basolle ta Faasigi dirar sinlih beeto mangum duumuteh aniyo. 16Amayim lel tayimhi macna Yallih nigsinnadde takmilendah tayim beeto makiyomhi sabbatah kinni” akko yerhxe. 17Kobbaaya yibbirheyaako cawwatoyshitek sarralle: “Tatiya beyteenih sinne-sinneh maasirita. 18Amayim lel kadooko Yallih nigsinna tamiitem fanah cinab darohimko aacabo makiyomhi sabbatah kinam sinak arhxiyuk ane” akko yerhxe. 19Kinnas yibbirheyaako cawwatoyshitek sarrah lel yigdileyaako tenah yoxoyeh: “Tati sinah yomxoye yi nabse kinni. Tayim yi xunsusuh abanta” akko yerhxe. 20Amayim balih lel usun beeteenik sarrah amaa kobbaaya beyeh: “Ta kobbaaya lel sinah arhxuk xarhitak yane yi biilohi cusub cahde kinni. 21Taykinna lel, amaa yi yasxayetiih gaba ta maaddille yottaalih tane. 22Amayim lel Xiyawti Barhi tamaa akah abaasimteekah yadiye, amaa kayya yasxayeti laakin kaa careyta!” akko yerhxe. 23Usun lel awlihti tenko tayim abo yakkemidde sittiya essesseroona erherhishen.

Miyatto kinni nabati?

24Tenko miyatti ummanimko naba tiya yakkeh yambulluwemhi sabbatah lel ten fanadde zagaxa ugutte. 25Usuk lel: “Aki-marih nuguusa ten bukalle maddarit yakkiinih, amaa yangizziye mari lel tenak mece mara akko yarhxin. 26Atin laakin amayim balih akkekkah, sinadde ummanimko nabatiyah yaneti ummanimko cindha tiya balih, manabotti lel khaddaam balih yakkoo. 27Amayim lel, miyatto kinni nabati, thawlalle cikkishiteh beeta tiya woole yakhdume tiya? Thawlalle cikkishiteh beeta tiya makiho? Anu laakin yakhdume tiya balih sin fanadde aniyo.

28Sina kinni yi cakanadde yottaalih daw-terhxem. 29Anu yi Abba nugus balih akah yi reezisheekah sin reezisho kiyo. 30Amayim lel Yi nigsinnadde yi maaddidde yottaalih betteenih taacaboona kee nugus-kursitille defeyteenih Israa-eel lamman kee taman kishotya tafradoona ciloh kinni.

Yeesus Bithroos xinnan yaakumeh warisha

(Maatiyos 26:31-35; Markos 14:27-31; Yohannis 13:36-38)

31Simcoon, Simcoon, taykinna, Sheethan sinraa balih sin yanfawo ciloh sin farhe. 32Anu laakin ku imaan radamko koh dhaaciteh aniyo. Atu malammih gaxta gedda lel ishi sacul iysirii” akko yerhxe. 33Usuk lel akko yerhxe: “Maddara, anu inkoh xabshe kee rabih kottaalih adaw inqirribeh aniyo.” 34Yeesus: “Bithroos, atu yi taarhigem adooxa gedda yi xintandah kaafa dor-hotti andhaxo makinam kok arhxiyuk ane” akko yerhxe.

Kutuub Yeesuslih yakmalo alle tane

35Usuk lel: “Anu maxfaza hido lakoota hido kabel hinnim sin dhirhiye gedda wayteenim leho?” akko yerhxe. Usun lel: “Walaa inkim” akko yerhxin 36Usuk: “Kado laakin maxfaza leti bishshiito, lakoota lel amayim balih. Sef aallinnixeti lel ishi natsala yeebexeh inketta dhaamo. 37Amayim lel ta yottalle akkuk tanem tamaa: ‘Usuk lel sercat malitidde loyyiime’#Isayas 53:12 terhxeh tunkuttebeh tanem yottadde abayshimto alle tanemhi sabbatah kinam sinak arhxiyuk ane. Yi sabbatah tunkuttubem lel ishi abayshima lemhi sabbatah kinni” akko yerhxe. 38Usun lel: “Ubul, Maddara, talle lamma sef yane” akko yerhxin. Usuk lel: “Dhiica!” akko yerhxe.

Yeesus Oolac koomalle yassilliye

(Maatiyos 26:36-46; Markos 14:32-42)

39Usuk lel yedeeyaako, ishi amalah, Oolac koomalle yewce, kaa katattaynit lel adde katayen. 40Amaa caralle yemeete gedda lel: “Cakanadde orobtanki issilliya” akko yerhxe. 41Usuk lel tenko wuli dhayitti cidima takkem mirix-yerhxeyaako, gululluubuweh yissilliye. 42“Abba, ku farhi yekkemko, ta kobbaaya asac yok ish. Laakin yi farhi makiiki, ku farhi takko” yerhxe. 43Carsheeti malaykatti akah yumbulluweh lel kaa yiysiriye. 44Cawlak lel sirii ginah dhaacite. Kaa dimbi lel biili dhimmii balih baarholle radak tine. 45Salaatko uguteh katattaynitille yemeete gedda lel xazanah taaneenih dhiinak akah sugen. 46Usuk lel: “Aymih dhiinak taniini? Cakanadde orobtanki ugutteenih issilliya” akko yerhxe.

Yeesus yomxoyeh yumudhdhuwe

(Maatiyos 26:47-56; Markos 14:53-60; Yohannis 18:3-11)

47Usuk kaddih waanishak anih, amalle mango xiyaw yemeetin, lamman kee tamanko kin Yahuuda akko yarhxin labhatti lel santishak yine. Usuk kaa fuguto Yeesus gabolle kab-yerhxe. 48Yeesus laakin: “Yahuuda, Xiyawti Barha fugtoh asxaytuk tanito?” akko yerhxe. 49Kaalih yine mari ayim katayto lem yublin gedda: “Maddara, sefih akko naatako haye?” akko yerhxin. 50Tenko wuliti lel naba shekhti garuzzok akko yootokeh mizgi cokka akko yigrice. 51Yeesus laakin: “Dhiica, adde moosin!” akko yerhxe. Cokka akah dhageh lel kaa uruse. 52Amaymik sarrah lel, Yeesus amaa Kaa diddeh yemeeteh yine sheekhat manabottit, maqhdasti carih dhawrhenti manabottit kee naba mara: “Garceenak abaanam balih seefaafi kee gomaadiilih temeetiini? 53Max yeenim maqhdas caredde sinlih iniyo gedda, gaba yolle mihayinnitiini. Tatiya laakin sin saaca kee ditet reeza kinni” akko yerhxe.

Bithroos Yeesus xina

(Maatiyos 26:57-58,69-75; Markos 14:53-54,66-72; Yohannis 18:12-18,25-27)

54Amaymik sarrah, Yeesus yibbirhiinih, kaa beyenyaako naba shekhti caredde kaa orbishen. Bithroos lel mirixtaako adde kataa yine. 55Usun gira hadig-isheenih inkidde daggelle defeyak, Bithroos ten fanadde defeye. 56Amaymik sarrah, wuli garuzzö, usuk ifolle defeyak kaa tubleyaako, kab-terhxeh kulux adde terhxeh: “Tati gantah kaalih yine” terhxe. 57Usuk laakin: “Te numa, anu maarhige” arhxuk aluu-yerhxe. 58Dago waqhtek sarrah lel aketti kaa yubleh: “Atu gantah tenko kito” akko yerhxe. Bithroos laakin: “Ko xiyawto, makiyo” akko yerhxe. 59Wuli inki saaca takkemko sarrah lel wuliti gaxe gaxeh: “Usuk yakkeedo Galiilaako kinamhi sabbatah, ta labhatti gantah rummah kaalih yine” yerhxe. 60Bithroos laakin: “Ko xiyawto, ayimti zacabah waanishak tanitom maarhige” akko yerhxe. Amalle anuk lel, usuk kaddih waanishak anuk dor-hotti andhaxe. 61Maddari lel yufkuneh Bithroosudde kulux-yerhxe. Bithroos lel Maddari marhxo: “Kaafa dor-hotti andhaxekkah adooxa gedda yi xinto kito” akko yerhxeh yineya yizzikkire. 62Yewceyaako lel dhacumaatih weece.

Yeesusulle alle yaasulin

63Amaa Yeesus yibbirheh yine mari lel kaa sabacak alle tsaggarowak yinin. 64Kaa cummuseenih lel: “Miyatti kok yootoke, irhig iski?” arhxuk gaxen gaxeenih kaa esseren. 65Akah waatimak lel kaa diddeh aki mango xaaja akko yerhxin.

Yeesus akottat carelle

(Maatiyos 26:59-66; Markos 14:55-64; Yohannis 18:19-24)

66Baarho maxte gedda dikti naba marih akotta yekettin, usun lel sheekhat manabottit kee sercat dhiiceenit kuuk yinin. Sinni araba fanah kaa beyeenih lel: 67“Masiix tekkemko noh warish” akko yerhxin. Usuk laakin: “Sinah warishemko taamanoona maki, 68sin esseremko lel radde taxawna maki, 69Xiyawti Barhi laakin kadooko sarralle, Yallahi xaylahi mizgi gabooko defeyo kinni#Zaabur 110:1 ubul.” akko yerhxe. 70Amaymik sarrah inkoh: “Yallih Barha kito, ibal?” akko yerhxin. Usuk lel: “Anu kiyom arhxuk tanin” akko yerhxe. 71Sarrah usun: “Aymih tayimko feera shaahid farhne? Ninneh kaa afko noobbeh nane” yerhxin.

Currently Selected:

Luukas 22: SCC

Highlight

Copy