Luukas 21

Gubnat muttuxuwa

(Maatiyos 24:1-2; Markos 13:1-2)

1Yeesus foorolle kulux-yerhxe gedda gaddaalit yoxoynim maqhdas carih muttuxuwat sanduqhudde oobishak yuble. 2Wuli baaxenta kin gubna lel lamma santiim axayik yuble. 3Usuk yerhxe lel: “Ta baaxenta kin gubna umman maraako ziyaada toxoyeh tanem rummah sinak arhxiyuk ane. 4Tayim lel inkoh sinni mangumko yoxoyin, ishe laakin ishi waytooko inkoh akah marritimto taarhigem toxoye.”

Yeesus maqhdas carih dumnan yaakumeh warisha

(Maatiyos 24:1-2; Markos 13:1-2)

5Wuli mari maqhdas care mece dhayit kee Yallih muttuxuwah aaginah bilciteh yanemidde waanishak anih, Yeesus yerhxe: 6“Ta abluk taniinimko dumekkah walaa inki dhayi bukaa-bukak adde raace wayo le max yamaato kinni.” 7Usun lel kaa esseren: “Mudarris, tayim manda takko kinni, tayim takko le geddahi tuumar lel ayim yakko kinni?” 8Usuk lel: “Atin doolabimtaanamko selita. Yi migacalle: ‘Usuk yotta kinni!’, ‘Waqhti lel orobeh yane’ arhxuk mango mari yamaatoona kinoonimhi sabbatah, ten lakadde maadayna. 9Dhiba kee cigirgir taabbin gedda, tayim tookomeh takko alle tanemhi sabbatah migilixina, laakin abayshima akkanih takko maki” akko yerhxe.

Wathan wathanti diddeh uguto kinni

10Amayek sarrah lel usuk: “Wathan wathanti diddeh, nigsinna lel nigsinnat diddeh ugutto kinni. 11Naba kirdidimom amayim balih barhsime wakaliilalle culul kee taba laxuu yakko kinni. Carsheeko lel birriigishsham kee naba tuumar yakko kinni. 12Umbuka tayimko basolle laakin, gabub sinadde hashshiiteenih sin hadanoona kinni. Sunagoogit kee xabshit fanah sin beyeenih lel yi migac hi sabbatah nuguusa kee masxadaadaritille sin baahoona kinon. 13Tayim shaahid takkoona sin caashir yakko kinni. 14Radde aaginah tadabboona kitiinim lel tookomiinih taxaasaboona sinalle mitanem sinni afcaadodde haya. 15Amayim lel sin qarimko walaa inketti daw sinlih yarhxemko hido sin yaceeredemko Anu af kee kas sinah axawo kiyomhi sabbatah kinni. 16Dhaltoyya, sacul, zamad kee soxoba tillaabisheenih sin yasxawna kinon, sinko garo lel yagdafoona kinon. 17Yi migac hi sabbatah umman wathunuh tamnaccaboona kitin. 18Laakin, sin amoh dagarko walaa inketti yalaw maki. 19Sinni curtayyoh sinni aniina taksaboona kitin.

Yeesus Yerusaalem dumnan yaakumeh warisha

(Maatiyos 24:15-31; Markos 13:14-27)

20Yerusaalem mango maxaarhoh maklalitteh tablin gedda laakin tee dumnan kab-yerhxeh yanem irhiga. 21Amayek sarrah, Yahuudiyalle yane mari koomamalle kudoonaa, daafot addadde yane mari lel yawcoonaa, tamaa zibolle yane mari lel amaa daafodde orobe wayoonaa. 22Amayim lel inkoh Kutuubudde tunkuttubem takmalo ciloh ta waqhti firdi tiya kinni. 23Baarholle naba masiiba, ta xiyawalle lel naba kura obto kinamhi sabbatah amaa maxadde soono kee dhoyishsha sayyo lel ten careyta! 24Usun lel sefih radoona kee umbuka wathunhi fanadde maxbuushiin balih ten beyoona kinon. Aki-marih waqhti yakmilendah lel Yerusaalemidde Aki-mari adde yacatcatoona kinon.

Xiyawti Barhih mumut

25Ayro, alsa kee xutukulle lel mango tuumar yakko kinni. Baarholle lel badti gorox kee goomadhdhet sabbatah wathunulle tsabaaba tekkeh abaanam sorhoona kinon. 26Carshitti xayli qinqin-yarhxo kinamhi sabbatah, xiyaw ta udduuniyalle amiituk tanemhi gilixih himma xaboona kee sikif-yarhxoona kinon. 27Amaymik sarrah, Xiyawti Barhi darurudde xayla kee naba nabneelih amiituk yabloona kinon. 28Kado, tayim takko erhedhdha gedda sin muuca kab-terhxeh tanemhi sabbatah daw-terhxiinih aganalle amo xaf-ishita” akko yerhxe.

Indacartooko nadrusem

(Maatiyos 24:32-35; Markos 13:28-31)

29Wuli aymassal lel akah warishe: “Indacartö kee aki xorh inkoh ubula. 30Usun dharhaak yabqhulin geddaakoh, sinneh tabliinih karma mece geddaakoh kab-terhxeh tanem taarhigin. 31Amayim balih, tayim akkuk tablin gedda, Yallih nigsinna kab-terhxeh tanem taarhigin. 32Tayim inkoh takkendah, ta ijo tillabto makinam rummah sinak arhxiyuk ane. 33Caran kee baarho inkoh tillaaboona kinon, yi waani laakin tillabto maki.

Selita!

34Cayne, sakar kee nawashshiga afcaadolle sinak yaclishinyaako, amaa lellec gahreeko machchawaadiya balih bardag sinadde yarhxek selita. 35Amayim lel ta lellec umbuka ta baarhot garballe yane maradde yamaato kinamhi sabbatah kinni. 36Amaydo, ta takko lemko sinni rooxe tassaacoona kee Xiyawti Barhahi nifidde daw-tarhxoona xayla geytoonak assilluuk, umman gedda himma-abita.”

37Max-yeenim lel maqhdas caredde ten aydurusuk yine, bar laakin yadiyeyaako Oolac koomak yawceh dhiinak yine. 38Maaxalle lel xiyaw kayya yaabboona inkoh maqhdas carelle kaa fanah amiituk yinin.

Currently Selected:

Luukas 21: SCC

Highlight

Copy