Luukas 20

Yeesus reeza esseriman

(Maatiyos 21:23-27; Markos 11:27-33)

1Wuli max, Yeesus maqhdas caredde xiyaw aydurusuk kee Mece Wari aybissiruk, sheekhat manabottit kee sercat dhiiceenit naba maraalih yekkinyaako yemeetiinih: 2“Tayim awlih reezah abaa tanitom noh warish, hido lel ta reeza miyatti koh yoxoye” akko yerhxin. 3Usuk: “Anu lel wuli essero sin essero kiyo. Kado yoh warisha, 4Yohannis aythammaq carsheeko kuuk yine woole xiyawko?” yerhxeh alle yedebbe. 5Sinne-sinneh lel tahe arhxuk adde zatteyen: “‘Carsheeko’ akko nerhxemko: ‘Aymih kaa aamine wayteeni?’ nok yarhxo kinni. 6‘Xiyawko’ akko nerhxemko laakin, Yohannis nabii kuuk yinem yeemeniinimhi sabbatah xiyaw inkoh dhayitih ni yagdafoona kinon.” 7Amaymih, awlaako kinam maarhaginnoonimih radde akah yoxoyin. 8Yeesus lel: “Anu gantah tayim awlih reezah abak aniyom sinah warisho makiyo” akko yerhxe.

Uma cinab dhageh baclaysheenitti aymassal

(Maatiyos 21:33-46; Markos 12:1-12)

9Xiyawah lel ta aymassal akah warisho erherhishe: “Wuli xiyawti cinab dhage yizriyeyaako cinab dhage baclaysheenitidde yeskeereh dherh waqhteh aki baarho kallaaxe. 10Waqhti gufe gedda lel amaa cinab dhageh baclaysheenit fanah cinab dhageh darooko kaa gide akah yaxawna ciloh wuli garuzzo alle dhirhiye. Amaa cinab dhage baclaysheenit laakin kaa yootokinyaako foyya kin gabah kaa dhirhiyen. 11Usuk lel aki garuzzo alle dhirhiye. Usun laakin, kaa yootokinyaako xoolaysha araxah kaa kabbaateenih foyya kin gabah kaa dhirhiyen. 12Usuk maddaxa yakkeedo alle dhirhiye. Usun tatiya gantah biyaakishenyaako kaa hadanen. 13Sarrah amaa cinab dhagehi wanna: ‘Ayim abo yolle tane? Kixiniyo inni barha alle dhirhiyo kiyo, usun kaa tu xishmatando’ yerhxe. 14Cinab dhage baclaysheenit kaa yublin gedda laakin: ‘Tati waarish kinni. Kata haye kaa nagdafowaa, miiraas nottah tu yakkeedo’ sinne-sinnek yerhxin. 15Cinab dhageeko irolle kaa cideenih lel kaa yigdifin. Ta gedda, amaa cinab dhagehi wanna ayim ten isho kinni? 16Usuk ten yeyleeh amaa cinab dhage garoh akko yaxaw yamaato kinni.” Tayim yoobbin gedda: “Taye caduruh akke wayto!” yerhxin. 17Usuk laakin nif kee nifih kulux adde yerhxeh: “Amayim yakkeedo:

‘Siraaxa mari xinen

dhayitti ongolot dhaa yekkeh yane’#Zaabur 118:22

terhxeyaako ta tunkuttubeh tanem ayim kinni? 18Amaa dhayittolle radinnanti yeggedeedeleh butur yakko kinni. Akkinnan tiyalle rademko lel kaa yagdalo kinni.”

Roomaati naba nugusuh miiri yakfiliinim

(Maatiyos 22:15-22; Markos 12:13-17)

19Sercat dhiiceenit kee sheekhat manabottit lel ta aymassal tenak yerhxem yeerhegiinimhi sabbatah amaa waqhteeko gaba alle hayoona farhen, laakin xiyaw mashshiiten. 20Amaymih lel usun kaa macalsiitenyaako usuk arhxinnannimidde kaa yibbirhiinih masxadaadari reeza kee mas-uuliyal kaa yaxawna ciloh “xaqqi-wannun kino” yarhxe idhdhiteenit dhirhiyen. 21Taginah lel kaa esseren: “Mudarris, xaqqeh waanishshah taydurusem naarhige, babbarhishnan lel malito, laakin rummaahit Yallih arax tayduruse. 22Roomaati naba nugusuh wirko naxayem arax kinni, maki?” 23Usuk laakin ten siixo duheyaako tahe akko yerhxe: 24“Diinaar yi uybulluwa. Miyatti gina kee kataaba leya?” Usun: “Roomaati naba nugus him” yerhxin. 25Usuk: “Amaydo, Roomaati naba nugus-him, Roomaati naba nugusuh uxuwa, Yallihim lel Yallah” akko yerhxe. 26Xiyaw nifille usuk yerhxemih kaa yabbarhoona mirhiicinnooni, laakin kaa raddelle cibrah rabeenih sik-yerhxin.

Tsadduuqhiim rabaako hi ugut esseriman

(Maatiyos 22:23-33; Markos 12:18-27)

27Wuli Tsadduuqhiim amaa rabaako hi ugut yanem xinteya lel alle yemeetin. 28Tahe arhxuk lel essero kaa esseren: “Mudarris, Moosa taginah noh yuktube, labhatti sacal cindham hinnim numa luuk yinemko rabemko, labhatti amaa gubna nagarah dhalaa ishi sacalah carisha. 29Kado, malxina sacal yinin. Aftiti numa beeteh cindham xabekkah rabe. 30Malamma kee 31maddaxi lel tee nagaren, amayim balih lel inkoh malxinik cindham xabekkah raben. 32Amaymik sarrah amaa numa yakkeedo rabte. 33Amaydo, malxinik numah tee luuk yiniinimhi sabbatah, rabaako ugutulle amaa numa miitiya takko kinni?”

34Yeesus lel: “Ta waqhtih mari marcishitan marcishiman. 35Amaa yamiite waqhte kee rabaako hi ugutudde garawo akah eedda mari laakin mimarcishitaana mimarcishimaana. 36Amayim lel malaykut balih kinoonimhi sabbatah, kamboh raboona makinooni. Usun lel rabaako hi ugutti cindham kinooniyaako, Yallih cindham kinon. 37Rabtem laakin uguteenim, Moosa yakkeedo tamaa Maddari zacabah: ‘Abraahim Yalla, Isxaaq Yalla kee Yacqoob Yalla’#Muuca 3:6 adde yarhxe keenan-le xarhah sabbatah tane faqharadde yuybulluweh yane. 38Ummanti kayyah maramhi sabbatah lel usuk tanemhi Yalla kibah rabtemhi tiya maki” akko yerhxe. 39Amaymik sarrah sercat dhiiceenit: “Mudarris, rumma waanishsheh tanito” yerhxiinih alle yedebbin. 40Amayimko ferta essero kaa esseroona mafdabinnoonimhi sabbatah lel kinni.

Masiix miyatti Barha kinni?

41Usuk laakin: “Masiix Dawud barha kinni yarhxoona dhiicaanam aaginah kinni? 42-43Dawud isheh Zaabur Kitaabadde tahe yarhxe hanuk:

‘Maddari yi Maddarak akko yerhxe:

“Ku nacabtoolitik ku ibih dokka akko koh abandah

yi mizgi gabooko defee.#Zaabur 110:1”’

44Dawud isheh Maddara akko yarhxeya, usuk aaginah kaa barha yakke?” akko yerhxe.

Sercat dhiiceenitko zeelita

(Maatiyos 23:1-36; Markos 12:38-40)

45Usuk lel xiyaw inkoh aabbuk ishi katattaynitik: 46“Mece dherh saradde hel-yarhxiinim, cadaagalle salaam akko yarhxiinim, sunagoogudde naba defeena, cidih lel xishma le carur kixin sercat dhiiceenitko zeelita. 47Usun gubonti carwa yundhucinyaako takaleh salat yayrheerhin. Ta mari mangum sirii firde geyoona kinon” akko yerhxe.

Currently Selected:

Luukas 20: SCC

Highlight

Copy