Luukas 19

Yeesus kee Zakkay

1Yeesus Yerikhodde orobeyaako amakkeeko tillaabak yine. 2Taykinna lel, Zakkay decsiita xiyawti amalle yine. Usuk miiri yaskattitti naba tiya kee gaddaale kuuk yine. 3Usuk lel Yeesus miyatto kinam yaarhago farhak yine. Wardeh urhurh tiya kuuk yinemhi sabbatah lel mango xiyawhi fanadde akah takko mirhiicinna. 4Amaa gedda, nifti gabolle yerdeyaako Yeesus amaa araxko tillaabo luuk yinemhi sabbatah kayya yablo subultok kore. 5Yeesus amaa makaanolle yemeete gedda lel aganalle kulux-yerhxeh: “Zakkay, kaafa ku carelle aso kiyomhi sabbatah iba lacaaki ob” akko yerhxe. 6Amaa gedda, usuk lel iba laceh oobeyaako xedenak kaa kabbaate. 7Xiyaw amayim yublin gedda lel: “Zambi-wannah careh gerhentaatinoh yedee” arhxuk inkoh yongoroozomin. 8Zakkay lel daw-yerhxeh Maddarak: “Ubul, Maddara, inni iraarooko abrha baaxentitih axaye. Akkinnan tiya akkinnannimih doolabemko lel affara amayidhdhah adabbe” akko yerhxe. 9Yeesus lel: “Usuk yakkeedo Abraahim barha yekkek sarrah, kaafa ta carelle garger yemeeteh yane. 10Amayim lel Xiyawti Barhi teleem wagiyo kee gargeero yemeetemhi sabbatah kinni” akko yerhxe.

Tamana minah aymassal

(Maatiyos 25:14-30)

11Usun tayim aabbuk, Yeesus Yerusaalemih kab-yerhxeh yinemhi sabbatah kee usun Yallih nigsinna akkanih tamballaw le akkaluk yiniinimhi sabbatah kataysheh wuli aymassal akah warishe. 12Amaa gedda akko yerhxe: “Wuli makaabanto kin xiyawti nigsinna yadhdhabarho wuli dherh baarho yedeeh gaxe. 13Ishi garuuzaako tamanah deecimeh: ‘Anu gaxandah bicishra aba’ yerhxeh babbarhi tamana mina #19:13 Mina Adooxa shaqqaalatti maahiya takkem kuuk tine akah yoxoye. 14Kaa dik hi cindham kaa yincibiinih lel: ‘Tati nodde reezam mifandhaa’ arhxuk simaagille kaa sarradde dhirhiyen. 15Usuk nigsinna kabbaateh gaxe gedda lel amaa fiddat solaadi akah yoxoyeh yine ishi garuuza, bicishra abenyaako ayim yiksibiinim akko yaarhago ciloh, kayyalle yamaatoona yeemere. 16Erherhti kaa nifidde yemeeteyaako: ‘Maddara, ku mina tamana mina osseh tane’ akko yerhxe. 17Usuk lel: ‘Mecem abte, agiro kin garuzzo! Dagumulle umun tekkemhi sabbatah tamana daafohi reezanto takko kito’ akko yerhxe. 18Malammi lel: ‘Maddara, ku mina koona mina osseh tane’ arhxuk yemeete. 19Usuk lel: ‘Atu lel koona daafoh manabotta takko kito’ akko yerhxe. 20-21Sarrah lel aketti: ‘Maddara, birthic xiyawto kitomhi sabbatah kok mashshiite. Obsiitinnixitom beyta, azriinnixitom lel orbishittamhi sabbatah, mandiilidde oobisheh iniyo ku mina taykinna’ arhxuk yemeete. 22Usuk lel: ‘Ko sharren kin garuzzo, ku waanih ku afrado kiyo. Anu birthic xiyawto kiyom, obsiitinnixiyom beyam kee azriinnixiyom orbishitam teerhege? 23Anu inni mumutulle dhalaalih bishshiite dhaarhek, yi fiddat solaadi aymih kinni bankadde oobishe waytem?’ akko yerhxe 24Kaa agaagalle daw-yerhxeh yine marak lel: ‘Kaa mina akko beyteenih amaa tamana mina le tiyah uxuwa’ akko yerhxe. 25Usun lel: ‘Maddara, tamana mina le maka!’ akko yerhxin. 26‘Le tiyah ziyaada akah tamxawo kinni. Hin tiyaako laakin, leyam gantah akko tadaw kinam sinak arhxiyuk ane. 27Too yi nacabtoolit yekkemko laakin, tamaa anu adde reezo farhinnixeya, ten bahteenih yi afalle urxuda.’”

Yeesus Nugus balih Yerusaalem oroba

(Maatiyos 21:1-11; Markos 11:1-11; Yohannis 12:12-19)

28Yeesus tayim yerhxeyaako lel Yerusaalem yawco nifti gabolle yedee. 29Beetfage kee Beetcaniyah kab-yerhxe gedda, Oolac koomalle, katattaynitko lamma dhirhiyeh, 30akko yerhxe lel: “Tamaa sin nifidde suganta dikille tedeyinyaako, orobtan gedda wuli yumudhdhuwe cindhaa okolotta, kaddih walaa inketti akko korinnixeya geytoona kitin. Iftixantaaki talle baha. 31Akkinnanti: ‘Aymih kaa aftixuk taniini?’ yerhxeh sin esseremko: ‘Maddari kaa farheh yane’ akko tarhxoona kitin”. 32Amayim lel amaa farritime mari yedeynih tamaa usuk tenak akah yerhxeekah kaa geyen. 33Usun amaa cindhaa okolotta aftixuk lel kaa wannun: “Ta cindhaa okolotta aymih aftixuk taniini?” akko yerhxin. 34Usun lel: “Maddari kaa farheh yane” akko yerhxin. 35Kayya Yeesus fanah baaheenih lel, sinni bukah sara amaa cindhaa okolottak haynih, Yeesus akko korishen. 36Usuk aduuk lel sinni bukah natsul araxadde akah sidishen. 37Oolac koomahi zoxoh kab-yerhxe gedda lel inkoh amaa mango kaa katattaynit xayla-le abittot yubliinimhi sabbatah, wac-yerhxiinih xedenoona kee Yalla faylishoona erherhishen. 38“Maddari migacalle yamiite Nugus dhaacole kinni!#Zaabur 118:26 Carshelle maaxiyo, agana lel nabne!” lel yerhxin. 39Faarisiinko gari lel mango xiyawhi fantaako: “Mudarris, ishi katattaynit oskoolof” akko yerhxin. 40Usuk lel: “Ta mari sik-yerhxiinimko, ta dhayit zeero kinni” yerhxeh alle yedebbe.

Yeesus Yerusaalemille weeca

41Usuk kab-yerhxeyaako daafo yuble gedda bukalle akko weeceh, 42yerhxe lel: “Ta atu, inkinnah atu, ta lellecidde salaamah takkem teerhegeh takkeedo! Kado laakin, ku intitko sucuteh yane. 43-44Amayim lel Yalli koh yamiite max maarhagitomhi sabbatah, ku nacabtoolit difaac ku lamma galelle abenyaako, ku makaraanah, umman gabooko ku alifaanah, koo kee ku cindhamah baarholle ku cidaanah, dhayitto lel dhayitti bukalle kok xabe wayoona lon maaxi yamaato kinni.”

Yeesus maqhdas care yatsrige

(Maatiyos 21:12-17; Markos 11:15-19; Yohannis 2:13-22)

45Usuk maqhdas caredde orobeh lel amaa atteebixuk yine mara yayyaaco erherhishe. 46“‘Yi cari salaat care yakko kinni’ yarhxiinim tunkuttubeh kinni, atin laakin garaacenti gonna akko abteenih tanin” lel akko yerhxe.

47Max yeenim lel maqhdas caredde aydurusuk yine. Sheekhat manabottit, sercat dhiiceenit kee xiyawko fadhdhishima mari akah kaa yaylayniikah wagiyaa yinin. 48Xiyaw inkoh kaa waanille qath-yerhxiinimhi sabbatah laakin usun inkim aboona mirhiicinnooni.

Currently Selected:

Luukas 19: SCC

Highlight

Copy