Yohannis 4

Yeesus kee Samaariyat numa

1Yeesus Yohannisko ziyaada aythimmiqhuk kee mango katattaynit abaa yanem Faarisiin yoobbiinim Yeesus yeerhege gedda, 2(aythimmiqhuk tinem Yeesus isheh akkekkah kaa katattaynit kuuk yinin haaki) 3Yahuudiya xabeh malammih Galiila fanah yedee. 4Samaariyaati fantaako lel yadaw alle tine. 5Amaymih lel Suykhar akko yarhxin, Yoosuf ishi barhah Yacqoob yoxoyeh yine dhageh agaagalle tine Samaariyaati daafolle yemeete. 6Amalle lel Yacqoob ceeli yine, Yeesus lel arax gerhodde taaneh yinemhi sabbatah, amaa ceeli agaagalle defeyak yine. Lellecti abrha takkem lel kuuk yine.

7Amalle lel Samaariyaati numa laye culutto temeete. Yeesus lel: “Macaba yoh uxuu” akko yerhxe. 8(Kaa katattaynit lel beetaanam dhaamoona amaa daafo fanah yedeyinih yinin.) 9Amaa Samaariyaati numa: “Atu Yahuuddok, Samaariyaati numa kin yotta aaginah macaba esserta?” akko terhxe. Amayim lel Yahuud Samaariyaati xiyawlih walaa inkim miyangaliinimhi sabbatah kinni. 10Yeesus lel: “Yallih muttuxuwa kee kado: ‘Macaba yoh uxuu’ kok arhxuk yane tiya teerhegeh takkeedo, atu kaa essere dhadhdhe, usuk lel aniinat laye koh axaye dhaarhe” akko yerhxe. 11Amaa numa lel: “Maddara, atu laye akah culaanamko inkim malito, ta ceeli lel mangum sam-yarhxe tiya kinni. Amaa aniinat laye awlaako geyta? 12Atu ni abba kin Yacqoobko nabito? Usuk ceela noh yoxoye, kaa cindham kee kaa saca balih lel isheh akko yoocobe” akko terhxe. 13Yeesus: “Ta layeko yaacubeti malammih bakhaarito kinni. 14Anu akah axawo liyo layeko yaacabo aallinnanti laakin caduruh umman geddah bakhaarito maki. Anu akah axawo liyo laye illa adde tekkeh umman geedit aniina fanah adde raxto kinni” akko yerhxe. 15Amaa numa: “Maddara, talle layeh arakamko kee tayek sarrah bakhaaritamko ta laye yoh uxuu” akko terhxe.

16Yeesus: “Aduwaaki ishi baclah deecimteh talle amo” akko yerhxe. 17Amaa numa lel: “Bacla maliyo” akko terhxe. Yeesus: “‘Bacla maliyo’ tarhxe gedda meceetih tanito. 18Amaye lel baacilko koon liituk tinemhi sabbatah kinni. Kado litoti lel ku bacla maki. Terhxeh tanitom rumma kinni” akko yerhxe. 19Amaa numa: “Maddara, atu nabii kitom ubleh ane. 20Ni abbub ta koomah acbuduk yinin. Atu laakin: ‘Xiyaw yacbadoona alle tanem Yerusaalemille kinni’” tarhxe. 21Yeesus: “Te numa, yi imin, hido ta koomalle, hido lel Yerusaalemille Abbah adde acbude waytoona litin saaca amiituk tane. 22Atin sodhdhaanam tacbudin, nanu laakin garger Yahuudko kinamhi sabbatah naarhigemih nacbude. 23Abba ta gina-le xiyaw akah yacbadoona farhak yanemhi sabbatah, rummah yacbude mari ufaye kee rummah Abbah adde yacbudin saaca amiituk tane. Kado lel talle tane. 24Yalli ufaye kinni, kayyah yacbude mari lel ufaye kee rummah yacbadoona alle tane” akko yerhxe. 25Amaa numa lel: “(Kiristoos akko yarhxin) Masiix amiituk yanem aarhige. Yamiite gedda ummannim noh warisho kinni” akko terhxe. 26Yeesus: “Anu kottaalih waanishaya, kayya kiyo” akko yerhxe.

27Amaa geddadde lel kaa katattaynit yemeetin. Usuk amaa numaalih waanishaa yinemih inkoh yussuxuttutin, laakin: “Ayim fadhdha?” hido lel: “Aymih teelih waanishaa tanito?” tenko inketti marhxinna. 28Sarrah, ishi layet citro xabteh amaa daafo fanah tedeyeyaako xiyawakke: 29“Amowa, anu abem kinam inkoh yoh warishe xiyawto ubula. Tati kela Masiix yakke?” akko terhxe. 30Amaa daafooko yewciinih lel kaa fanah amiituk yinin.

31Amaa geddadde lel kaa katattaynit, “Mudarris, bet haye” arhxuk kaa afishak yinin. 32Usuk laakin: “Atin sodhdhan folo beetaya liyo” akko yerhxe. 33Amaa gedda, katattaynit: “Beetam akah baaheti yaneho?” sittiyak yerhxin. 34Yeesus: “Yi folo yi fareh yane tiyahi farhi abaanam kee kaa ciyyo yaskimiliinim kinni. 35‘Affara alsi yane, sarrah lel orba tamiite’ tarhxiinih makiho? Ubula, sinni intit fakteenih dhageg orobo caddoweh yaneya ubula, sinak arhxe. 36Yizriye tiya kee orbisha tiya inkoh inkidde xedenoona ciloh, orbishati ishi casbe kabbaatak kee umman geedit aniinah daro askattuk yane. 37Amaye lel: ‘Wuliti yazriye, wuliti lel orbisha’ tarhxe marhxo rumma tibbirheh tanemhi sabbatah kinni. 38Atin adde xawalinnixitiinim orbishshoona sin dhirhiye. Aki mari xawaleenih yanin, atin lel ten xawaladde orobteenih tanin” akko yerhxe.

39“Anu abem kinam inkoh yoh warishe” tarhxe numat shaahadah sabbatah lel mango Samaariyaati xiyaw kayyah yeemenin. 40Amaa Samaariyaati xiyaw kayyalle yemeetiinih, tenlih sugo kaa esseren, usuk lel amalle lamma lellec tenlih suge. 41Kaa waanih sabbatah mango mari yeemenin. 42Amaa numak lel: “Atu nok terhxemhi sabbatah bisa maki neemenem, ninneh noobbemhi sabbatah kinni, rummah lel tati caalamti Gargeereena kinam naarhige” akko yerhxin.

43Lamma lellecik sarrah Galiila fanah yedee. 44(Amayim lel ishi dik hi daafolle nabii xishma malem Yeesus isheh yimmiskireh yinemhi sabbatah kinni.) 45Amaymih lel Galiilalle yemeete gedda, usuk cidih inkoh Yerusaalemille abeh yinem yublinyaako Galiilaati xiyaw kaa kabbaaten. Usun gantah amaa cidih yedeynih yinin.

Yeesus nugus nabarahi barha urusa

46Malammih lel, amaa layeko wayni alle abe Galiilaati Qaanalle yemeete. Kafarnaxuumulle lel wuli barhi akko laxuute nugus nabara yine. 47Ta xiyawti Yeesus Yahuudiyaako Galiilalle yemeeteh yinem yoobbe gedda, kaa barhi rabit af gufeh yinemhi sabbatah, kaalle yemeeteyaako oobeh kaa barha akah uruso kaa essere. 48Amaymih Yeesus: “Ishaarar kee bexsishsham able wayteenimko taamanoona makitiini” akko yerhxe. 49Amaa nugus nabara: “Maddara, yi barhi rabekkah guballe ob” akko yerhxe. 50Yeesus: “Aduu, ku barhi maro kinnik” akko yerhxe. Amaa xiyawti Yeesus akko yerhxe waanitta yeemeneh ishi araxalle yedee. 51Usuk guballe oobak lel kaa garuuza akah garaynih kaa barhi ashshuk yinem akah warishen. 52Sarrah awlih saacadde yashsho erherhishem ten essere. Usun lel: “Kumal kasit saaca inikih lacna akah xabto erherhishshe” akko yerhxin. 53Amaa abba lel Yeesus: “Ku barhi maro kinni” adde akko yerhxe saaca kuuk tinem yeerhege. Usuk lel isheh yeemene, kaa dik yakkeedo amay balih. 54Tatiya lel kado Yeesus Yahuudiyaako Galiila fanah aduuk abe malammit ishaara kuuk tine.

Currently Selected:

Yohannis 4: SCC

Highlight

Copy