Yohannis 3

Malammih taabakoona sinalle tane

1Kado, wuli Yahuud reezanto kin Niqhodiimos akko yarhxin Faarisiiti yine. 2Ta xiyawti bar Yeesusulle yemeeteh: “Mudarris, atu abak tanito ishaarar Yalli aalih yane tiyaako beexinti abo mirhiicamhi sabbatah, atu Yallaako yemeete mudarris kitom naarhige” akko yerhxe. 3Yeesus lel: “Rummah, rummah malammih aabukinnixeti, Yallih nigsinna yablo mirhiicam kok arhxiyuk ane” yerhxeh alle yedebbe. 4Niqhodiimos: “Naba xiyawti aaginah yaabako dhiica? Malammit gedda ishi inah garbadde orobeh yaabako dhiica?” akko yerhxe. 5Yeesus: “Rummah, rummah, laye kee Ufayeko aabukinnixeti Yallih nigsinnadde orobo mirhiicam kok arhxiyuk ane. 6Amayim lel, xazooko yooboketi xazo kinni, Ufayeko yooboketi lel ufaye kinni. 7‘Malammih taabako kolle tane’ kok erhxemih mibexsiitin. 8Xaaxatti isheh alle farhinnan gabolle kinni xaaxaysham, kaa andhax lel taabbe. Awlaako yamiitem, awlalle lel yadiyem laakin mitaarhige. Ufayeko aabukinnantii lel amayim balih kinni” yerhxeh alle yedebbe.

9Niqhodiimos lel: “Tayim aaginah takko dhicta?” akko yerhxe. 10Yeesus: “Atu Israa-eel mudarris kito hanuk tayim kodde moobta? 11Rummah, rummah, nanu naarhigemih waanishnam kok arhxiyuk ane, nubleh nanemih lel nashhide, ni shahaada lel mikabbattaana. 12Baarhootim sinah warishe hanuk akko aamine waytenya, carshim sinah warisha gedda aaginah taaminiini?” 13Carsheeko oobe, Xiyawti Barhaako bextih, carshelle korteh tanem male. 14Moosa zibolle caroora akah takareeka balih, Xiyawti Barhi lel takarimo kinni. 15Amayim lel kayyah aamininnanti umman geedit aniina yaallo ciloh kinni.

Yalli caalam mangum yikxine

16“Yalli caalam mangum yikxinemhi sabbatah, kayyah aamininnanti yalayemko, umman geedit aniina geyo ciloh, inkettak le ishi Barha yoxoye. 17Yalli ishi Barha dhirhiyem, caalam kaa araxah gargeerimto ciloh kibah, caalam yafrado ciloh maki. 18Kayyah aamininnanti miyamfirrideeki, kayyah aamininnixeti laakin inketta kin Yallih Barhahi migacalle aaminekkah yanemhi sabbatah mece geddaako yimfirrideh yane. 19Firdi lel tatiya kinni: ifi caalamalle yemeeteh yane, xiyaw lel ten abitto umaani kinamhi sabbatah ifi idhdhah dite yikxinin. 20Umaani abinnanti ifo niciba, kaa umaani akko tamidhdhigemko lel ifolle miyamiite. 21Rumma kinam abinnanti laakin, Yallih araxah tekkemhi sabbatah, kaa abitto akah tamballaw ciloh ifolle yamiite” yerhxeh alle yedebbe.

22Taymik leddelle, Yeesus ishi katattaynitlih Yahuudiyaati barrelle yedeeyaako amalle tenlih defeyeh aythimmiqhuk yine. 23Yohannis yakkeedo mango laye amalle tinemhi sabbatah Salim agaaga kin Enoonulle aythimmiqhuk yine. Xiyaw lel amiituk yinthimmiqhin. 24(Yohannis lel amxibbishekkah yine).

25Kado lel Yohannis katattaynitko garo kee wuli Yahuuddi fanadde thahaarat zacabah zagaxa ugutte. 26Yohannisille yemeetiinih lel: “Mudarris, Yordaanos tabsolle kottaalih yineti, tamaa atu akah tishhideya, ubul, aythimmiqhuk yane. Xiyaw lel inkoh kaa fanah aduuk yanin” akko yerhxin. 27Yohannis lel: “Xiyawti carsheeko akah amxawwe waytemko, walaa inkim kabbaato mirhiica. 28‘Anu Masiix makiyo, kaa nifidde laakin farritimeh aniyo’ erhxemih atin sinneh yolle tashhadoona dhictan. 29Cibna leti marcawwi kinni. Marcawwit carki, daw-yarhxeyaako kaa yaabbeya lel marcawwit dhawalle mangum xedena. Amaydo, ta yi xeden kado yikmileh yane. 30Usuk feero alle tane, anu lel anqaso yolle tane.

31Aganaako yamiiteti umman tiyaako agana kinni. Baarhottii baarhottiya kinni, baarhootim lel waanisha. Carsheeko yamiiteti umman tiyaako agana kinni. 32Usuk yublem kee yoobbemille yashhide, walaa inketti laakin kaa shahaada mikabbatinna. 33Kaa shahaada kabbaatinnanti lel tayim yaxtume, amaa Yalli lel rumma kinni. 34Ufaye qiyaas maleh yaxayemhi sabbatah Yalli fareti Yallih waani waanisha. 35Abba Barha kixina, ummannim lel kaa gabadde hayeh yane. 36Barhah aamininnanti umman geedit aniina leya, Barha aabbinnixeti, aniina yablo maki, Yallih kura lel kaalih marta” yerhxeh alle yedebbe.

Currently Selected:

Yohannis 3: SCC

Highlight

Copy