Fartottit hi Abittot 8

Shaa-uul kaniisa hadana

1Shaa-uul Istifaanos gidfo yossokoote. Amaa maxadde lel amaa Yerusaalemille tine kaniisalle sirii hadaano tekke. Fartottitko beexin mari kaniisatiya lel inkoh Yahuudiya kee Samaariyaati zoobälle yimbittinin. 2Yalla mashshiita mari lel Istifaanos yoocogiinih sirii ginah alle xazzanoyen. 3#Fartottit hi Abittot 22:4-5; 26:9-11Shaa-uul lel amaa kaniisat xiyaw yaylawo, care careh aduuk labha kee sayyo gototayaako xabshedde ten orbishak yine.

Filibboos Samaariyalle Masiix warroysha

4Tamaa yimbittine mari alle adiinnanille waanitta warroyshak yinin. 5Filibboos wuli Samaariyaati daafolle Masiix zacabah ten yiybissire. 6Amaa mango xiyaw lel amaa Filibboos abe cibra kin ishaarar yoobbiinih yublin gedda, inki afcaado yekkiinih kaa macalsiiten. 7Najaasa-le ufayit le maraako wac-yarhxe dhawlih zeerak akko awcuk yine. Kafe mara kee yixinkishe mari lel urak yinin. 8Amaymih amaa daafolle naba xeden yekke.

Sharraax kin Simcoon yaamine

9Amaa daafolle wuli sharraax kin Simcoon akko yarhxin xiyawti yine, naba tiya ishek abah lel Samaariyaati xiyaw bexsiishak yine. 10Cindha tiyaako naba tiya fanah lel: “‘Naba’ akko yarhxin Yallahi xayli ta xiyawto kinni” arhxuk inkoh kaa macalsiitak yinin. 11Dherh waqhte ishi shirxeh ten bexsiishak yinemhi sabbatah kaa macalsiitak yinin. 12Yallih nigsinna kee Yeesus zacabah Filibboos mece ware akah warroyshemhi sabbatah laakin yeemeniinih inkoh labha kee sayyo yinthimmiqhin. 13Simcoon gantah isheh yeemeneh yinthimmiqheyaako Filibboosudde kataye. Ishaarar kee xayla-le abittot yubleyaako lel cibrah rabe.

14Kado, Yerusaalemille yine fartottit Samaariyaati xiyaw Yallih waanitta kabbaateenim yoobbin gedda, Bithroos kee Yohannis alle faren. 15Usun lel oobeenih Quddus kin Ufaye kabbaatoona akah dhaacimen. 16Amayim lel Maddara kin Yeesus migacalle bisa kinni yinthimmiqhiinim kibah Quddus kin Ufayi tenko walaa inkettalle oobeh miyinemhi sabbatah kinni. 17Sarrah usun gabub alle hayenyaako Quddus kin Ufaye kabbaaten. 18Kado, Simcoon Quddus kin Ufayi amaa fartottitti araxah gaba alle hayenyaako yomxoyem yuble gedda, tahe arhxuk solaadi akah yoxoye: 19“Anu gaba alle hayinnanti Quddus kin Ufaye kabbaato ciloh, ta xayla yottah gantah yoh uxuwa.” 20Bithroos laakin: “Yallih muttuxuwa solaadih dhamto texeesebemhi sabbatah ku fidda kottaalih talawo. 21Ku afcaado Yallih nifille meceetih mitanemhi sabbatah ta gondodde agle hido caashir malito. 22Amaydo, otoob, ta ishi umaaniiko, Yalli ta ku afcaadohi niya kolle tu xabaado lel kaa dhaacim. 23Dhacuma ashshiino kee zambi madhdhuwadde ku abliyuk ane” akko yerhxe. 24Simcoon lel: “Ta terhxe xaajaako walaa inkim yolle tamiitemko, Maddara yoh dhaacim” akko yerhxe.

25Taykinna lel, Bithroos kee Yohannis yishhidiinih Maddari waanitta warroysheenih, Samaariyaati mango diikalle mece ware yiybissiriinimko sarrah Yerusaalem fanah gaxen.

Filibboos kee Itobbiyatto

26Sarrah Maddari malaykatti Filibboosuk: “Ugutaaki, Yerusaalemko Qaazza fanah junuub gabolle beya araxalle ob” akko yerhxe. Takke sahra kinni. 27Usuk lel uguteh yedee. Amalle lel Kandake akko yarhxin Itobbiyaati nigistit gerille naba reeza luuk yine xarge kin xiyawti yine. Usuk lel umbuka gaddahi masxadaadara kuuk yine. Usuk Yerusaalemille yacbado yemeeteyaako, 28ishi karrossak defeyeh ishi dik gaxak lel nabii Isayas kitaab aqhruuk yine. 29Quddus kin Ufayi lel Filibboosuk: “Ta karrossa mataraaki adde engel” akko yerhxe. 30Amaymih Filibboos yerdeh adde katayeyaako usuk nabii Isayas kitaab aqhruuk kaa yoobbe gedda: “Aqhruuk tanitom kodde oobak yane?” yerhxeh kaa essere. 31Usuk lel: “Yi santisha tiya hinnim aaginah yodde oobo kinni?” akko yerhxe. Usuk Filibboos koreh kaalih defeyo akah deecime. 32#Isayas 53:7-8Usuk aqhruuk yine Kutuub faqhra lel tatiyä kuuk tine:

“Ciidotta balih marxadde fanah wakkayme,

akah yaruuzin leema balih lel sik-yerhxe,

amaymih ishi af mifaako.

33Caybishti osah cadle migeyinna.

Kaa aniina baarhooko beyeenimhi sabbatah

kaa zara miyatti warisho dhiica?”

34Amaa xargi lel Filibboosuk: “Oobbaye ku essero, amaa nabii tayim arhxuk yanem miyak kinni, ishek kinni woole akettoku?” akko yerhxe. 35Sarrah Filibboos lel ta Kutuub faqhra yaqhraw erherhisheyaako, Yeesus zacabah mece ware akah warishe. 36Araxalle aduuk lel wuli layelle yemeetin gedda amaa xargi: “Ubul koye, talle laye tane! Anthimmiqhemko yi dessamah ayim tane?” yerhxe. [ 37Usuk lel: “Umbuka ishi afcaadooko teemenemko dhicto kito” akko yerhxe. Itobbiyatti lel: “Yeesus Masiix Yallih Barha kinamah aamine” akko yerhxe.] 38Amaymih usuk amaa karrossa daw-ishoona yeemereh, Filibboos kee amaa xarge inkoh layedde oobeenih Filibboos kaa yiythimmiqhe. 39Kado usun amaa layeko yewcin gedda, Maddari Ufayi Filibboos yooqhoceh kaa beye. Amaa xargi lel kaa abluk miraaco, usuk lel xedenak ishi arax katattayshe. 40Filibboos laakin Azootos akko yarhxin daafolle ishe geye, Qayseeriya fanah yamiitendah lel ishi nifille umbuka daafofulle hel-arhxuk mece ware warroyshe.

Currently Selected:

Fartottit hi Abittot 8: SCC

Highlight

Copy