Fartottit hi Abittot 7

Istifaanos madare

1Naba shekh Istifaanosuk: “Tayim taginah kinni?” yerhxeh kaa essere. 2#Erhedhdhö 12:1 Istifaanos lel: “Sacul kee abbubuk yi oobbaanta. Ni abba kin Abraahim Xaaraanalle maro yadiyemko basolle, Mosobbotaamiyalle anuk, nabnet Yalli akah yumbulluweh: 3‘Ishi dik kee ishi zamadko ewecaaki, anu ku ayballaw liyo baarholle amo’ akko yerhxe. 4#Erhedhdhö 11:31; 12:4 Sarrah Khaldayaati marih baarhooko yewceh Xaaraanalle sige. Kaa abba rabek sarrah lel Yalli amakkeeko ta kado atin alle martan baarholle kaa yezgeeceze. 5#Erhedhdhö 12:7; 13:15; 15:18; 17:8 Yakko kibah amalle waarish takkemih walaa ibi maacato takkem akah maaxayinna. Usuk laakin dhalaa luuk miyine hanuk amaa baarho kaa sarralle kaa zarah yaxaw kinamah wacde akah saye. 6#Erhedhdhö 15:13-14Yalli laakin taginah waanishe: ‘Ku zari marin baarholle affara bool iggidiya godobo yakkoona kinon, amaa baarhoh mari lel garuuza akko abeenih umaatih ten yabbarhoona kinon. 7#Muuca 3:12 Anu laakin garuuza yakkiinih usun yakhdumin dikille alle afrado kiyo, yerhxe Yalli. Taymik sarrah amakkeeko yewciinih ta makaanolle yoh yacbadoona kinon.’ 8#Erhedhdhö 17:10-14; 21:2-4; 25:26; 29:31—35:18 Yalli Abraahimih cahdi askok kalum akah yoxoye. Amaymih Abraahim Isxaaq baahe gedda baxar-ya lellecille askok kalum akah abe. Isxaaq lel Yacqoob baahe, Yacqoob lel Israa-eel lamman kee taman kishohiyahi abbub baahe.

9 # Erhedhdhö 37:11,28; 39:2,21 Yacqoob dhaylo Yoosufulle ashshiineenimhi sabbatah Masridde kaa yeebexin; Yalli laakin kaalih yineyaako, 10#Erhedhdhö 41:39-41 umbuka waqhaaqhacko kaa yeyyeeceh, Masriiti nugus kuuk yine Fircawun intidde macruuf kee kas akah yoxoye. Usuk lel Masri kee umbuka ishi xawazhi manabotta akko abe. 11#Erhedhdhö 42:1-2 Sarrah umbuka Masri kee Kancaanalle culul kee naba cazaab yekkeyaako ni abbub beetaanam wayen. 12Sarrah Yacqoob Masrille ilaw yanem yoobbe gedda, ni abbub erherhih amalle ten fare. 13#Erhedhdhö 45:1,16Malammit mumutulle lel Yoosuf ishi sacul ishe ten yiyshidhdhigeyaako Yoosuf dik Fircawunlih yemeerhegin. 14#Erhedhdhö 45:9-10,17-18; 46:27 Yoosuf lel ishi abba kin Yacqoob kee malxintomon kee koon yakke kaa zamad inkoh yamaatoona farto akah dhirhiye. 15#Erhedhdhö 46:1-7; 49:33 Yacqoob Masri oobeh rabe, ni abbub lel inkoh raben. 16#Erhedhdhö 23:3-16; 33:19; 50:7-13; Yehooshuca 24:32 Shekhem fanah yooqhociinih ten baahenyaako Abraahim Xamoor dhaylooko fiddat solaadiiko dhaameh yine qabredde ten yoocogin.

17 # Muuca 1:7-8 Yalli Abraahimih sayeh yine wacdehi waqhti kab-yerhxe gedda, xiyaw manga Masrille ziyaadak ziyadde. 18Amayek sarrah Masrille Yoosuf sorha aki nugus reeze. 19#Muuca 1:10-11,22 Ta nugus amaa ni xiyaw yicizzibe raxma male kuuk yineyaako, ni abbub sinni zabul raboona ten xabeenih akko yadawna ten qasbishe. 20#Muuca 2:2 Moosa lel ta waqhtedde yooboke, Yallih intidde lel carha mecuk yine. Adooxa alsa lel ishi abbah caredde suge. 21#Muuca 2:3-10 Zibolle kaa xaben gedda lel Fircawun barhä kaa carishsheh ishi barha akko abto kaa beyte. 22Moosa inkoh Masriiti xikma labcaade, ishi waani kee abittoh lel agiro yekke.

23 # Muuca 2:11-15 Usuk barah marootom yekke gedda, kaa sacul kin Israa-eel cindham yablo ishi afcaadodde yexeesebe. 24Tenko inketta umaatih acimmijuk yuble gedda, akah caareyaako amaa Masriita yigdifeh xane akah yeyyeece. 25Yalli kaa gabah abeh ten gargeero farhem kaa xiyaw yeerhegiinim yekkele, usun laakin mafhaminnooni. 26Leddi max amaa kaa xiyawko wuli lamma angaacuk ten geyeyaako ten wagarisho yicikkineh: ‘Ko xiyawo, atin sacul kitin, aymih sitta caggabossaana?’ akko yerhxe. 27Amaa ishi zoobatto caggaboosak yineti laakin Moosa wuli carhalle dufuu-isheyaako: ‘Atu ni bukalle manabotta kee daaniya takko miyatti ku doore? 28Kumal Masriita akah tigdifeekah yi tagdafo farhak tanito?’ akko yerhxe. 29#Muuca 18:3-4 Moosa ta waani yoobbe gedda kudeyaako Miidiyanti baarholle duleena yekke. Amalle lel lamma barha baahe.

30 # Muuca 3:1-10 Kado, marootom iggidiyak sarrah, Siinaati Koomah saxralle Yallahi malaykatti xararta keenan-le xarhahi boladde akah yumbulluwe. 31Moosa tayim yuble gedda cibrah rabe, yablo kab alle yerhxe gedda lel Maddari dhaw yemeeteh: 32‘Anu ku abbubhi Yalla, Abraahim, Isxaaq kee Yacqoob Yalla kiyo’ yerhxe. Moosa lel arharheyaako kulux adde yarhxo madbalinna. 33Sarrah Maddari: ‘Ta daw alle terhxeh tanitokke quddus kin makakaano kinamhi sabbatah ishi ibaako kabel eyyec’ akko yerhxe. 34‘Tamaa Masrille tane yi xiyawhi uma aniina rummah ubleh ane, ten araado oobbeh ane, ten ayyaaco lel oobeh aniyo. Atu lel kado amo, Masri ku faro kiyo’ akko yerhxe.

35 # Muuca 2:14 Ta Moosa: ‘Ni bukalle manabotta kee daaniya miyatti kok abe?’ yerhxiinih xinak yininya, Yalli kayyah amaa xarhalle yumbulluwe malaykattohi gabah abeh manabotta kee mayyaaca yakko kaa fare. 36#Muuca 7:5; 14:21; Cadad 14:33Ta xiyawti lel marootom iggidiya, Masri, Casa Bad kee saxralle bexsishsham kee cibra kin ishaarar abak ten yeyyeece. 37#Gabbaacime Sercat 18:15,18Ta Moosa kinni lel Israa-eel xiyawak: ‘Yalli yottah higgidin nabii sin saculko sinah baaho kinni’ akko yerhxeh yineti. 38#Muuca 19:1—20:17; Gabbaacime Sercat 5:1-33 Teketteh tine xiyawlih, Siinaati Koomalle kaalih waanishe malaykattoolih kee ni abbublih yineti kayya kinni. Nottah yaxaw lel aniinat waani kabbaateti kayya kinni. 39Ni abbub kaa yaabboona xineenih wasan akko gaxen, sinni afcaadooko lel Masrille gaxen. 40#Muuca 32:1Haaruunuk lel: ‘Ta Masriiko ni yeyyeece Moosa ayim yekkeh yanem minaarhigeeki, afadde nok yadiye yallit noh ab’ akko yerhxin. 41#Muuca 32:2-6 Amaa waqhtedde rugi misleeko asnaamto abeenih, sadaqha akah abenyaako, sinni gabubuh aben ciyyo yikxinin. 42#Caamoos 5:25-27 Yalli lel tenko mirix-yerhxeyaako caranti xutukuh yacbadoona ten xabe. Tayim lel nobowat kitaabadde tunkuttubeh tane:

‘Israa-eel meelaw, zibolle marootom iggidiya takkem,

tamruxxudem yakko sadaqha yoh bahteenih taarhigiiniho?

43Atin akah tacbadoona terhxiinih abten mislit Molekh tenda kee sin yalla kin Rayfan xutukta kinni sinneelih bishshitteenim.

Anu lel Baabiloonko amulalle sin duluso kiyo.’

44 # Muuca 25:9,40 Ni abbub saxralle Yallahi reedo shahaada kinya luuk yinin, amaa tiyä lel Yalli Moosa tamaa akah yuble xibarah abo akah warishe tiyä kuuk tine. 45#Yehooshuca 3:14-17Ni abbub tee kabbaateenih lel Yehooshucaalih yekkiinih amaa baarholle baahen. Tayim tekkem lel Yalli aki xiyaw akko yeyyeeceh amaa baarho akah yoxoye gedda kinni. Amaa shahaadat tenda lel Dawud waqhte fanah amalle sugte. 46#2 Saamiyeel 7:1-16; 1 Warit 17:1-14 Dawud Yallih intidde nicma geyeyaako Yacqoob Yallah sigima takke cara abo Yalla dhaacime. 47#1 Nuguusa 6:1-38; 2 Warit 3:1-17 Kayyah care gineti laakin Suleymaan kinni. 48Yakko kibah, tamaa nabii akah yarhxeekah, Nabamko Nabati gabah tekke carwadde misiga:

49 # Isayas 66:1-2 ‘Carshi yi nugus-kurse kinni,

baarho lel yi ibih dokka kinni.

Aaginale care kinni yoh gintoona fadhdhaanam?

Hido lel anu alle acrufe makaano aaginale tiyä kinni?

50Tayim inkoh yi gaba makini abtem?’ yarhxe Maddari.

51 # Isayas 63:10 Ko kafnontit kin afcaadod kee cokkak adde alfiime marawo, umman gedda Quddus kin Ufayi didde takkin. Sin abbub akah abeeniikah abaa tanin. 52Sin abbub hadane wayenti nobowaako awlih tiya kinni? Usun lel tamaa atin kado tosxoynih tisgidifin Xaqqi-wannat mumut yookomeh warishe mara yigdifin. 53Atin ta sercat malaykutti araxah kabbatteenih tinin, laakin mirhawrhitiini” akko yerhxe.

Istifaanos gidfo

54Usun tayim yoobbin gedda yuxurtumiinih ikok xarqam alle ishen. 55Istifaanos laakin, Quddus kin Ufayeh yemmeegeh, carshelle kulux-yerhxeyaako Yallih nabne kee Yeesus Yallih mizgaako daw-yerhxeh yuble. 56Usuk lel: “Taykinna, carshi fakkiteh, Xiyawti Barhi Yallih mizgaako daw-arhxuk abliyuk ane” yerhxe. 57Usun laakin wac-yerhxiinih andhaxak sinni cokkak alifeenih inkidde tiya yekkiinih kaa gabolle yerdin. 58Amaa daafooko kaa yeyyeeciinih lel dhayit alle cidoona erherhishen. Amaa shohoda lel sinni natsul Shaa-uul akko yarhxin burguddahi ibih rigidille oobishen. 59Usun Istifaanos yagdafoona dhayitih kaa aatukuk: “Maddara kin Yeesus, yi wafa kabbat” yerhxeh deecime. 60Gululluubuweh lel wac-yerhxeyaako: “Maddara, ta zambe alle mabbarhin” yerhxe. Tahe yerhxeyaako lel ishi xaqqe geye.

Currently Selected:

Fartottit hi Abittot 7: SCC

Highlight

Copy