Luk 3
3
Ia Jon Na Tinoni Lesovi Tabu e vangaraua na sala vania ia Jisas
(Matiu 3:1-12; Mak 1:1-8; Jon 1:19-28)
1Tana sangavulu chehena uvi ia Taebirias te tinoni taovia boroha, ma ia Pontias Paelat te tinoni taovia i Jiudia, ma ia Herod Antipas te tinoni taovia i Galili, ma na tasina ia Pilip te tinoni taovia i Ituria mi Trakonaetis, ma ia Lisanias te tinoni taovia i Abilin. 2Tahuna vahai nia, ia Anas ma ia Kaeapas koera nidira lehona ira na tinoni ni kere ira na Jiu. Ma ia God e kori vania ia Jon, na dalena ia Sekaraea, tahuna te toha ia tana talu mangu. 3Me dia ia Jon tana vera nira lihilihi ni kolo i Jodan, me kori vanira na tinonina vera nira nia, me kori vahai de, “Hamu kode kamu tu pililiu basiaa hamiu seko ma kamu lesotabu, me ke ni hanaa ia God na kori kenihua hamiu seko.”
4Ia vahai te mare nohaa ia Aesaea i sau, me kori vahai de,
“E chikai tinoni te huhuu tana talu mangu me kori vahai de,
‘!Kamu onioni ma kamu rati malea nina sala Taovia,
ma kamu hotosia na meana ia te ke liu!
5Punua visa na bilobilona,
ma kamu joraa visa na vuvungana,
ma kamu hotosia visa na meana te kekeu,
ma kamu ajangahania na meana te bilobanga.
6E visa kode na tinoni ba kara haea na mauri sali te liu mai tatana ia God.’ ”
7Me tuu ia Jon me kori vanira ira tara mai na lesotabu me kori vahai de, “!Lohamu amu vahai na poli hahala! ?Sei te kori vanilohamu kovahai ba kamu tangomana choho basiaa nina kore ia God te ke mai? 8Kamu agosia lohamu na omea talana ta kamu tihisi lengaa lohamu kamu hanaa tuu pililiu basiaa lomiu seko, ma kamu mai tatana Taovia. Kamu vu padaa lohamu amu hoto tana matana God matengana amu liu mai tana lilivuna ia Ebraham. Teha siki omea ke vahai ia. Inau u kori vanilohamu kalavata, ia God e hanaa leoana na makara nira de kara lia na kukuana ia Ebraham. 9Ia tahuna de, na rarati e toha noha tana lamuna na hai. Me visa na hai tara teha tamani siki vuadira odo ia ba ke kali vutira me ke choni sivora tana lake.”
10Tahuna nia, na tinoni nira ara gesuaa ia Jon, “?Ia te vahai nia, ma na hua ta kami gonia lohami?”
11Ma ia Jon e kori vahai vanira de, “Sei te tamani e ruka na kalekona, ke vatasa vania isei te teha tamani kalekona. Misei te tamani hana hahani, ke sahadira ira tara teha tamani hadira.”
12Kesana tinoni taha takisi tara mai lakamu na lesotabu mara gesuaa ia Jon, “?Ticha, na hua kalavata ta kami gonia lohami?”
13Ma ia Jon e tuhu visu vaniloera me kori vahai de, “Toha volo lohamu na nongi liungiana na mate ni takisina na tinoni.”
14Mara mai lakamu kesana na malahai mara gesuaa ia Jon, “?Mi lohami kami vahai vei, na hua ta kami gonia lohami?”
Ma ia Jon e tuhu visu vaniloera me kori vahai de, “Kamu basia na para voloana ma na suhutiana tinoni ma na tahaa nina golo. Kamu mahe matena bamu lohamu visa tara voli lohamu tana matena lomiu ago.”
15Me danga na tinoni ara pipitua na maiana na Mesaea, mi tahuna tara haea ira ia Jon mara padaa ira ia kanau na Mesaea de. 16Ma ia Jon e kori lenga talana vanira ira me kori vahai de, “Inau tu lesovitabuhamu hamu tana kolo bamu, me chikai tinoni ba ke mai bukegu nau e leho liungisiu nau, me teha tihilau nau seisuge ku chua chonia na halona nina sadolo. Ma ia ngeni ba ke lesovitabuhamu hamu kolu na Tarunga Tabu mi kesana tana lake. 17Ma ia ngeni ba ke vilira na tinoni talana tahanira na tinoni sekoseko, vahai na tinoni te tahaa nina hila me kichi tahania na kekevu ni wit me toha na lakana. Me livu talanaa na lakana tana nina ava-ava, me chonia na kekevuna tana lake te vovo hanaa na mate.” 18Me danga lakamu na kori te tuhutuhu te kori vanira ia Jon tahuna te kori vanira na saurongo talana de.
19E chikai tahu bukena, ia Jon e tai matana ia Herod Antipas, na tinoni taovia leho, matengana te taulahinia koi Herodias, na tauna tasina ia, me agosi lakaa danga na omea sekoseko. 20Ma ia Herod e ruri leho laka ba matengana te soria ia Jon me livua tana vale peresini.
Ia Jon e lesovitabua ia Jisas
(Matiu 3:13-17; Mak 1:9-11)
21Tana tahuna ia Jon te teha vata dia tana vale peresini, me lesovi tabura ira na tinoni, me lesovi tabu lakamua ia Jisas. Mi tahuna Jisas te nonginongi dato vania ia God, me haruharu i heven 22ma na Tarunga Tabu e sivo mai vahai na manu te moro vahai na kavuku me sivolia ia. Tahuna vahai nia, me tangi sivo mai i heven chikai na valagu me kori vahai de, “Ihoe na dalegu nau tu sahaviho, minau u mamahela tatamu hoe.”
Na lilivuna ia Jisas
(Matiu 1:1-17)
23Tihilana vahai ke tolu sangavulu na uvina ia Jisas, me tuturihaa ia nina ago. Tana nidira papada ira na tinoni, ia Jisas na dalena ia Josep,
te liu mai ia Heli,
24ma ia Heli te liu mai tatana ia Matat,
ma ia Matat te liu mai tatana ia Livae,
ma ia Livae te liu mai tatana ia Melki,
ma ia Melki te liu mai tatana ia Janai,
ma ia Janai te liu mai tatana ia Josep,
25ma ia Josep te liu mai tatana ia Matataeas,
ma ia Matataeas te liu mai tatana ia Emos,
ma ia Emos te liu mai tatana ia Neiham,
ma ia Neiham te liu mai tatana ia Esli,
ma ia Esli te liu mai tatana ia Nagai,
26ma ia Nagai te liu mai tatana ia Maat,
ma ia Maat te liu mai tatana ia Matataeas,
ma ia Matataeas te liu mai tatana ia Semein,
ma ia Semein te liu mai tatana ia Josek,
ma ia Josek te liu mai tatana ia Joda,
27ma ia Joda te liu mai tatana ia Joanan,
ma ia Joanan te liu mai tatana ia Resa,
ma ia Resa te liu mai tatana ia Serubabel,
ma ia Serubabel te liu mai tatana ia Sealtiel,
ma ia Sealtiel te liu mai tatana ia Neri,
28ma ia Neri te liu mai tatana ia Melki,
ma ia Melki te liu mai tatana ia Adi,
ma ia Adi te liu mai tatana ia Kosam,
ma ia Kosam te liu mai tatana ia Elmadam,
ma ia Elmadam te liu mai tatana ia Ere,
29ma ia Ere te liu mai tatana ia Josua,
ma ia Josua te liu mai tatana ia Eliesa,
ma ia Eliesa te liu mai tatana ia Jorim,
ma ia Jorim te liu mai tatana ia Matat,
ma ia Matat te liu mai tatana ia Livae,
30ma ia Livae te liu mai tatana ia Simion,
ma ia Simion te liu mai tatana ia Juda,
ma ia Juda te liu mai tatana ia Josep,
ma ia Josep te liu mai tatana ia Jonam,
ma ia Jonam te liu mai tatana ia Elaeakim,
31ma ia Elaeakim te liu mai tatana ia Melea,
ma ia Melea te liu mai tatana ia Mena,
ma ia Mena te liu mai tatana ia Matata,
ma ia Matata te liu mai tatana ia Natan,
ma ia Natan te liu mai tatana ia Deved,
32ma ia Deved te liu mai tatana ia Jesi,
ma ia Jesi te liu mai tatana ia Obed,
ma ia Obed te liu mai tatana ia Boas,
ma ia Boas te liu mai tatana ia Salmon,
ma ia Salmon te liu mai tatana ia Nason,
33ma ia Nason te liu mai tatana ia Aminadab,
ma ia Aminadab te liu mai tatana ia Admin,
ma ia Admin te liu mai tatana ia Arni,
ma ia Arni te liu mai tatana ia Hesron,
ma ia Hesron te liu mai tatana ia Peres,
ma ia Peres te liu mai tatana ia Juda,
34ma ia Juda te liu mai tatana ia Jekob,
ma ia Jekob te liu mai tatana ia Aesak,
ma ia Aesak te liu mai tatana ia Ebraham,
ma ia Ebraham te liu mai tatana ia Tera,
ma ia Tera te liu mai tatana ia Nehoa,
35ma ia Nehoa te liu mai tatana ia Serug,
ma ia Serug te liu mai tatana ia Riu,
ma ia Riu te liu mai tatana ia Pileg,
ma ia Pileg te liu mai tatana ia Eba,
ma ia Eba te liu mai tatana ia Sela,
36ma ia Sela te liu mai tatana ia Keinan,
ma ia Keinan te liu mai tatana ia Apaksad,
ma ia Apaksad te liu mai tatana ia Siem,
ma ia Siem te liu mai tatana ia Noa,
ma ia Noa te liu mai tatana ia Lamek,
37ma ia Lamek te liu mai tatana ia Metusela,
ma ia Metusela te liu mai tatana ia Inok,
ma ia Inok te liu mai tatana ia Jared,
ma ia Jared te liu mai tatana ia Mahelalel,
ma ia Mahelalel te liu mai tatana ia Kenan,
38ma ia Kenan te liu mai tatana ia Enos,
ma ia Enos te liu mai tatana ia Set,
ma ia Set te liu mai tatana ia Adam,
ma ia Adam te liu mai tatana ia God.
Currently Selected:
Luk 3: mln
Highlight
Share
Copy
Want to have your highlights saved across all your devices? Sign up or sign in
© 2024 (active), Wycliffe Bible Translators, Inc. All rights reserved
