Luk 2

Na bocha ia Jisas

1Tana tahu vahai ia Sisa Ogastas te taovia boroha i Rom, ma ia e kejalira visa na tinoni kode te taovia vanira ia kara marea na asadira. 2Ide na chikainina na mare asa#2:2 Ira ara agosia na mare asa matena na taha takisi ma na suhutira ira na tinoni ma kara ago vania na taovia ni Rom. te laba tana tahu vahai ia Kurinias te tinoni taovia vanira na provins i Siria. 3Me visa na tinoni ara dia na mare asadira tana verana na kave kukuadira.

4Mi tana tahu vahai nia, ia Josep e basiaa na vera i Nasaret tana provins i Galili, me dia i Betlehem tana provins i Jiudia, na vera tara vasua ia Deved, na tinoni taovia leho, matengana ia Josep na lilivuna ia Deved. 5E dia na mare asa kolu koi Meri, nina vangavanga te mahara noha. 6Tahuna tara ko toha koera i Betlehem, me chau mai nina tahu ni vasusu koi Meri. 7Me teha siki vale te ke mangamanga vanikoera lalona tana valedira ira na mamaina. Ba, mara ko sahe lalona chikai na vale ni sipsip ma na buluka, me vasua koi Meri na dalena mane luhi, me pulia tana kaleko me jaroa tana diho ni hana na sipsip ma na buluka.

Ira na enjol ara laba lenga vanira na tinoni pitu sipsip nira

8Mi tana putina nia, kesana na tinoni tara toha levu bukena na vera i Betlehem, mara rerei pitura nidira sipsip. 9Me chikai nina enjol ia God e laba lenga vaniloera, ma na nina talana ia God e marara talihu laba tatalodira, mara matahu mate tinoni loera. 10Ma na enjol e kori vahai vaniloera tinoni loera de, “!Kamu basia lohamu na matahu! Nau u taha mai vanilohamu e chikai na saurongo talana, na mamahela leho te ke mai vania visa kode na tinoni. 11I ngeni de tana verana ia Deved, ara vasua nimiu tinoni Tahamauri. Ia Kraes na Taovia. 12Ba kamu hae vagoa lohamu na gari nia tara pulia tana kaleko mara jaroa tana diho ni hana na sipsip ma na buluka.”

13Taora ba ia, mara laba mai na ala-alana na enjol ni heven kolu na enjol nia, mara livu kaea ia God mara linge mara pachaa, 14“!Livu kaea ia God i hotu vasau, ma na nina rapo ke toha kolura nina tinoni te mamahela kolura tana pari de!”

Ira na tinoni pitu sipsip ara dia i Betlehem

15Mi tahuna tara visu dato na enjol nira i heven, mara tuu na tinoni pitu sipsip loera mara vaikorihi mara kori vahai vanihi de, “Ngida ma kalu dia i Betlehem ma kalu morosia na omea te laba inge, vahai noha te kori lenga vanilohita na Taovia.”

16Mara dia tangochaku tinoni loera mara ba haea koi Meri ma ia Josep ma na gari pepechi te jajaro tana diho ni hana na sipsip ma na buluka. 17Tahuna tara haea tinoni loera na gari pepechi te jajaro inge, mara kori potona na hua te kori vaniloera noha na enjol tana didiana na gari pepechi nia. 18Mi ira kode tara valingea nidira kori tinoni pitu sipsip loera, ara makai kodea. 19Ma koi Meri e pada taonia visa na omea me livu kodea tana tobana. 20Mara visu na tinoni pitu sipsip loera, mara livu kaea ia God rongona tana hua tara valingea mara morosia e mana vahai te kori vaniloera na enjol.

Ara tabua ia Jisas tana Vale Tabu Leho

21Tana alunina na dani#2:21 Tana nidira iju ira na Jiu e alu dani, mi tana iju ni hita ba ke vitu dani, matengana ira ara tuturiha na iju tana dani tara vasua na gari. na gari pepechi nia, tahuna vahai ta kara pari papadana ia, mara soloa asana ia Jisas, na asa te kori luhi nohaa na enjol tahuna te teha vata tinana na mahara.

22Mi tahuna te chau tana tahu ni kere me ke ni male koi Meri vahai te koria tana nina keja ia Mosis, ba, mara ko taha dia koera na gari pepechi nia i Jerusalem mara ko sau vania ia God. 23Mara ko agosi taonia na hua tara mare luhi nohaa tana nina keja ia God, “Visa na garimane luhi ke lia ninana ia God.” 24Ma nina keja laka ia God e kori vahai de, “Kere kolu hamu ke ruka na manu vahai na kavuku teha me ke ruka na dale ni marui,” me ke ni male na daki vasusu. Ba, mara ko agosia koera na kere nia.

25Mi tana tahu nia, e chikai na tinoni te toha i Jerusalem, na asana ia Simion. Ia na tinoni te hoto me tamani kukunina ia God, me toha pitua maiana na Mesaea te ke taha maurisira ira na Israel. Ma na Tarunga Tabu e sivolia ia, 26me tihisi lengaa vania ia ba ke teha ke vu mate diadia me ke hae matana kalavata ia na Mesaea, vahai noha te kori vania ia God. 27Ma na Tarunga Tabu e udungia ia Simion me dia levu kulina mai tana Vale Tabu Leho nia. Mi bukena, mara ko mai na tinana ma na tohana ia Jisas, mara ko tahaa ia Jisas ma kara ko agosi vania na hua te kori labatia tana nina keja na Taovia. 28Ia Simion e tabalaa ia Jisas me livu kaea ia God me kori vahai de,

29“Tahuna de, God, hoe o manalia nimu kori tabu vaniu nau,

me talana ko tala sangau nau, nimu tinoni ago, ku mate tana rapo,

30rongona inau u morosi matagu noha na tinoni Tahamauri to sau maia hoe,

31ia ta kara morosi kodea visa na tinoni.

32Ia ke vahai na ruu te ke tihisi lengaa ia God vanira ira na Jentael,

me ke vahanira ira ma kara pada lehora nimu tinoni nira hoe i Israel.”

33Na tinana ma na tohana ia Jisas ara ko makai tahuna tara ko rongosia koera na hua te koria ia Simion tana rongona ia Jisas. 34Ma ia Simion e tabuloera me kori vahai vania koi Meri na tinana ia Jisas de, “Ia God e vili nohaa na gari de me ke ni taha maurisira danga na tinoni ni Israel. Mi ngeni ba ke danga lalodira ira na Israel ba kara mate, matengana ia ba ke taha maia e chikai na sau rongo ta kara hoso tahania ira 35me ke ni vahania nidira manasa sekoseko ira ke lenga. Mihoe ba ko sasahavi solehana te vahai chikai na isi vavanga te toroa na tobamu.”

36-37Me toha lakamu e chikai na daki propet, na asana koi Ana, na dalena ia Peniuel te vota mai tana lilivuna ia Asa. Ma na gosi nia e alu sangavulu vati uvina, me tauhaa e vitu bamu uvi me mate na tauna, me toha chamu bamu. Me toha savaliu ia tana Vale Tabu Leho, me livu kaea ia God tana toha ngalo hahani ma na nonginongi vania ia God tana puti ma na dani. 38Na gosi nia e laba tatalodira me livu kaea ia God me kutu na sau korina na gari nia vanira visa na tinoni tara moro naho pitua tahuna ia God ngeni ba ke taha maurisira ira na Jiu.

39Tahuna vahai ia Josep ma koi Meri tara ko agosi kodea na hua te koria tana nina keja ia God, mara visu loera tana veralodira i Nasaret tana provins i Galili. 40Ma ia Jisas e leho mai me susuliha, me dangalia na manasa talana, ma na nina talana ia God e toha tatana ia.

Ia Jisas tana Vale Tabu Leho

41Visa na uvi, koera na tohana ma na tinana ia Jisas ara ko dia i Jerusalem, mara ko sanga na kabu ni Liu Salihi. 42Tahuna te chau e sangavulu me ruka na uvina ia Jisas, mara dia loera na sanga na kabu nia, vahai noha nidira naunau ira na Israel. 43Bukena te kode na kabu nia, mara visu loera i veralodira, mara ko teha koera hanaa ia Jisas te toha visu i Jerusalem. 44Mara ko pada vahania koera ia Jisas e sahe lalo kolu tana ala-ala tara vivisu nia. Diadia ira, me chau te levau mara ko tuturiha koera daiana ia Jisas tana levuhana na kamakodira ma na kodira papi nira. 45Mi tahuna tara ko teha nimu koera haeana ia, ba, ara ko visu hoto laka daia ia Jisas i Jerusalem. 46Tana tolunina dani, mara ko chaulia koera ia tana Vale Tabu Leho i levuhadira ira na ticha tara hanaa nidira keja ira na Jiu, te tohotuu ia Jisas me vavalinge vata me gesuara kesana na gesugesu. 47Ira kode tara valingea nina valagu ia, ara makai kodea tana nina hanana ia ma na tuhu visuana nidira gesu ira. 48Ma na tohana ma na tinana ara ko taora solehana tahuna tara ko haea ia. Me laba na tinana ia me kori vahai vania de, “?Dalegu, vahai sahata vei o vu gonia hoe na naunau vahai nia vanikohami kohami? Kohami na tohamu hoe ami ko pochoa na daiho hoe.”

49Ia Jisas e tuhu visua nina valagu tinana me kori vahai vanikoera de, “?E vahai vei amu ko vu daiu nau kohamu? ?Amu ko teha kohamu hanaa na malengagu nau tana valena Tohagu?” 50Mi koera ara ko teha pada manasana nina kori ia Jisas.

51Ba, mara visu loera i Nasaret, me rongo mangana savaliu ia Jisas na tohana ma na tinana. Ma na tinana ia e livua visa na omea kode tana tobana. 52Ma ia Jisas e leho, me dangalia na manasa, ma ia God ma ira na tinoni ara mamahela kolua ia.

Currently Selected:

Luk 2: mln

Highlight

Copy