Mateo 8
8
O Yezous krell yekes sasto, koleskro mass tele merella
1Oun o Yezous djas i berga tele, oun boud menshe djan leske palla. 2Kote vas i morsh pash leste. Koles his i djoungelo nasslepen ap peskro mass. Oun yob vitsras pes glan o Yezouseste tele ap i phoub, oun mangas lestar: “Ray, te kameh tou, nay kreh man sasto.”
3Oun o Yezous čivas peskro vast ap leste, oun penas: “Me kamau, te vess sasto.” Oun ap yek kopo djas ko nasslepen lestar.
4Oun o Yezous penas ap leste: “Shoun, pen kekeske, hoy me touke krom! Dja an o Debleskro baro kheer pash o rashayeste oun sike leste, kay tiro nasslepen toutar djas! Oun an kova glan o Debleste, hoy o Mose penas#8:4 dik: 3. Mose 14:2-32, te djinenn i menshe, kay tou sasto val.”
O pralstouno lourdo an o foro Kapernaum
5Oun o Yezous djas doureder, oun vas an o foro Kapernaum. Kote vas i pralstouno lourdo#8:5 Kova his i Remari. pash leste, oun mangas les:
6“Ray, miro boudepaskro hi khere čiddo, oun hi bango, yaake te nay djal lo bouder gar. Oun les hi bare douka.”
7Penas o Yezous ap leste: “Me kamau touha te djal, oun kamau les sasto te krell.”
8Koy penas o pralstouno lourdo: “Me hom gar moldo, te vess tou pash mande. Te peneh tou yek lab, yaake vell miro boudepaskro sasto. 9Yaake har me ninna hounte shounap ap mire pralstunende, yaake hi man ninna lourde, kay hounte krenn, hoy me penau. Me te penau ap yekeste: Dja koy! palle djal lo. Me te penau ap i vavareste: Am kay! palle vell lo. Me te penau ap miro boudepaskro: Kre kova! palle krell yob kova.”
10Har o Yezous kova shounas, kras lo bare yaka, oun penas ap kolende, kay leha djan: “Čačepah, me penau t'menge: Savo patsepen hatsom pash kekeste an o tselo them Israel. 11Boud menshe venna dran boud vavar themma pash o Debleste an o bolepen, oun beshenn pen tele, te rhan le o Abrahameha oun o Isaakeha, oun o Yakobeha khetne.#8:11 dik: Yesaya 25:6-9 12Oun i biboldendar venna boud an i kali rat vin vitsedo. Oun yon rovenna, oun dandrenn i danda i doukatar khetne.”
13Oun palle penas o Yezous ap o pralstouno lourdo: “Dja khere! yaake har tou patsal, yaake vell kova.”
Oun ap kava tsiro vas leskro boudepaskro sasto.
O Yezous hi an o Petreskro kheer
14Oun o Yezous djas an o Petreskro kheer. Kote dikas lo koleskri romyakri day. Yoy his ap o čiben čiddo oun lakro shero his tato. 15Oun yob tapras lakro vast, oun ko nasslepen djas latar. Oun yoy stas pre, oun anas lenge i rhapen.
16Oun har i rati vas, anan le boud menshen pash leste, kay hi benga an lende. Oun yob rakras zoreles ap i bengende, te djan le dran i menshende vin. Oun yon van vin. Ninna kras lo lauteren sasto, kay nasselo hi.
17Yaake vas kova čačes, hoy o Debleskro rakepaskro, o Yesaya, glan i rah tsiro penas: Yob las mare douka, oun maro nasslepen mendar.#8:17 dik: Yesaya 53:4
Koon o Yezouseha djal, hounte dikell gar ap vavar koova
18Oun har o Yezous boud menshe troul peste dikas, penas lo peskre malenge: “Ouleras ap i vavar panyeskri rig!”
19Koy vas i biboldengro čačepaskro pash leste oun penas: “Sikepaskro, me kamau touha te djal, kay tou ninna djah.”
20Penas o Yezous ap leste: “I divye djouklen hi i čiben an i phoub, kay sovenn le. Oun i čirklen hi tikne khera ap i rouka. Me, o Mensheskro Čavo, man hi či, kay nay čivap man tele, te sovap.”
21Oun i vavar, yek leskre malendar, penas ap leste: “Ray, mouk man khere te djal, te paskrap miro dades! Pal kova vau touha.”
22Penas o Yezous: “Mouk i moule pengre moulen te paskrell! Dja tou mantsa!”
Ap o divyo pani
23Oun o Yezous djas an o bero#8:23 bero barque . Oun leskre mala djan leha. 24Har yon ap o pani his, phourdas ap yek kopo i baro zorelo dourho pral o baro pani. Oun o pani vas divyo, oun djas pre te tele, oun djas pral o bero vergel. Oun o Yezous sovas.
25Palle djan yon pash leste, djangran les pre, oun penan ap leste: “Ray! Le men kate vin! Mer tassah.”
26Koy penas lo: “Hoske trashenn t'mer? Kay hi t'maro patsepen?”
Oun yob stas pre, oun penas ap ko zorelo dourho, hoy phourdas pral o pani: “Ač kanna!” Oun ap o baro pani penas lo: “Mouk tele!”
Oun o zorelo dourho phourdas bouder gar, oun o pani his bouder gar divyo.
27Oun peskre mala kran bare yaka oun poučan pendar: “Havo morsh hi kova! Ninna o zorelo dourho oun o baro pani shounenn ap leste.”
O Yezous tradell i bengen dran douy morshende vin
28Oun yon van ap i vavar panyeskri rig, an o them Gadara. Oun douy morsha nashan dran i moulengre khera vin, oun van pash o Yezouseste. Kolen hi benga an lende. Oun yon hi yaake čilačo, te nay djas kek an lengro drom.
29Oun yon dan gole: “Hoy kameh tou mendar, Debleskro čavo? Val tou pash mende, te doukress men tou glan o tsiro, kay rakrell o Devel i phagi pral mende vin?”
30Dour lendar his boud bale ap i berga.
31Oun kol benga mangan les: “Tou te tradeh men dran kol morshende vin, palle mouk men an kol balende dren te djal!”
32Oun yob penas: “Djan t'menge!”
Oun yon van dran i morshende vin, oun djan an kol balende dren. Oun kol tsele bale van divyo oun nashan i berga tele, oun stan an o pani, oun tassan.
33Oun kote his morsha, kay ap i balende yak denna. Kolla nashan an o foro, oun penan kote halauter, hoy yon dikan, ninna, kay van kol douy morsha sasto, kay benga an lende his.
34Oun i tsele menshe djan dran ko foro vin, oun van pash o Yezouseste. Oun har yon les dikan, mangan le les, te djal lo dran lengro them vin.
Currently Selected:
Mateo 8: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
