Mateo 7
7
O vavareskri doosh
1Ma sikrenn ap i vavarengri doosh! Oun o Devel dikell gar ap t'mari doosh. 2Te hi t'men i baro dji i vavarenge, hi o Debles ninna i baro dji t'menge. Hi t'men kek baro dji lenge, hi o Debles vitar gar i baro dji t'menge.
3Hoske kameh tou i tikno kasht dran tiro phraleskro yak vin te tserdell, oun tou dikeh gar o baro kasht an tiro yak? 4Har nay peneh tou ap leste: Miro phraal, am kay! Me kamau ko tikno kasht dran tiro yak vin tserdell. Oun tou dikeh gar o baro kasht an tiro yak. 5Tou rhorheno! Tou kreh, har te vals tou lačeder har yob. Le ko baro kasht dran tiro yak vin, palle nay leh tou o tikno kasht dran tiro phraleskro yak vin!
6Ma vitsrenn gar o Debleskro bravlepen glan i djouklende, te djan yon gar ap t'mende pre! Ma vitsrenn gar i kouč barra glan i balende, te stakrenn le len gar i pirentsa khetne.
O Devel shounell t'men
7Mangenn o Debles! Oun o Devel dell t'men! Rodenn les! Oun t'mer hatsenn les. Denn ap o voudar, oun kova vell t'menge pre kerdo!
8Koon mangella, kova lella. Koon rodella, kova hatsella. Oun koon ap o voudar della, koleske vell pre kerdo. 9Mashkral t'mende hi kek morsh, kay dell peskro čaves i bar, te mangas yob lestar i kotar maro. 10Vitar gar dell kek dad peskro čaves i sap an o vast, te mangas yob lestar i mačo.
11Ninna te han t'mer čilače menshe, denn t'mer t'mare čaven lačo koova. Har boud boudeder dell t'maro dad an o bolepen lačo koova kolen, kay les mangenna.
12Lauter, hoy t'mer kamenna, te krenn i menshe t'menge, kova krenn t'mer lenge ninna! Te krenn t'mer kova, yaake krenn t'mer lauter kova, hoy o Mose oun i Debleskre rakepangre penan.
Douy dromma
13Djan an o tikno voudar dren! Nashedo hi kolla, kay djan an o baro voudar ap o bourhlo drom. Oun boud djan koy. 14Tikno hi ko voudar oun gar bourhlo hi ko drom, kay i menshe hatsenn o djipen. Oun gar boud hi kolla, kay ap ko drom djana.
I rhorhene rakepangre
15Denn yak, te patsenn gar kol rhorhene rakepangren, kay penenn, te vans le o Deblestar bičedo! Yon krenn, har te vans le t'mare phrala. An lengro dji hi le divye djoukle, kay marenna. 16Ap kova, hoy yon krenna, dikenn t'mer, har yon hi. Ap i soubyengro rouk venna kek drake baro. Vitar gar venna fayge baro ap soubyengre bourra. 17Yaake vell lačo koova dran i lačo rouk, oun djoungelo koova dran i nasselo rouk. 18Dran i lačo rouk vell kek djoungelo koova. Oun dran i nasselo rouk vell kek lačo koova. 19Hako rouk, kay vell kek lačo koova dran leste, vell tele dino, oun an i yag vitsedo. 20Ap kova, hoy dran lende vella, dikenna, har yon hi.
O Debleskro tsiro vella
21Kolen, kay penenn ap mande Ray, ray lell o Devel gar lauter pash peste an o bolepen. Na-a! Kolla kokres, kay krenna, hoy miro dad an o bolepen kamella, kolen lell lo an o bolepen. 22Vell ko dives, kay o Devel o čačepen pral i tsele menshende vi-rakrella. Ap ko dives penenna boud ap mande: Ray, ray, an tiri zoor penam mer i menshenge, hoy o Devel menge penas. An tiri zoor tradam i bengen#7:22 I bibolde patsan, kay his yek pralstouno beng oun ninna boud tikne benga, kay leske koy hi. vin, oun kram boud baro zorelo koova. 23Palle penau lenge: Me prindjrau t'men gar. Djan mandar, t'mer čilače!
O gosevo oun o dinelo
24Hakeno, kay mire laba shounella oun kova krella, hoy me penau, kova hi yaake har i gosevo morsh, kay peskro kheer ap i zorelo baro bar kras. 25Har das zorelo brishin, oun boud pani vas, oun i zorelo dourho phourdas ap ko kheer, koy peras o kheer gar khetne. Kova his ap i zorelo baro bar tardo. 26Hakeno, kay mire laba shounella oun kova gar krella, hoy me penau, kova hi har i dinelo, kay peskro kheer ap i čik kras. 27Har das zorelo brishin, oun boud pani vas, oun i zorelo dourho phourdas ap ko kheer, koy peras ko tselo kheer khetne.”
28Oun har o Yezous kova lauter penas, kran kol boud menshe, kay troul leste his, bare yaka. 29Yob rakras bari zoryah, oun gar yaake har lengre čačepangre rakran.
Currently Selected:
Mateo 7: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
