Mateo 19
19
I morsh oun peskri romni
1Oun har o Yezous kova lauter peskre malenge penas, djas lo lentsa dran o them Galilea vin, oun vas an o them Youdea vergel o pani Yordan. 2Oun boud menshe djan leske palla. Oun yob kras i nasselen kote sasto.
3Oun i Farisarya van pash leste, oun kaman les leskre labentsa te taprell. Oun yon poučan lestar: “Nay tradell i morsh peskri romyat pestar, ninna te kras li kek čilačepen?”
4Penas lo: “T'mer djinenn, hoy hi an o Debleskro lab činlo: O Devel kras o morshes oun i djouvyat. 5Oun yob penas: Doleske moukell i morsh peskro dades oun peskri dat, te djivell lo peskri romyah khetne. Oun kol douy venna har yek.#19:5 dik: 1. Mose 2:24
6Yaake hi le har yek oun bouder gar douy. Oun kova, hoy o Devel khetne anas, kova hounte krell i mensho gar paash!”
7Penan le ap leste: “Te hi kova yaake, hoske činas o Mose an peskro liil: Te kamell i morsh peskri romyat te moukell, palle hounte dell lo lat i liil, kay činlo hi, kay yob moukas lat?”
8Penas lo ap lende: “T'maro dji hi dran bar, kay o Debleskro lab gar dren djal. Doleske činas o Mose, kay nay moukenn t'mer t'mari romyat. Ap ko tsiro, kay o Devel i morshes oun i djouvyat kras, his kova gar yaake. 9Me penau t'menge: Te hi yekes i romni, kay rhorhras les gar i vavar morsheha, oun yob moukell lat, oun romedinerell i vavar djouvyat, kova anell doosh ap peste, te las lo i vavar romyat.”
10Penan leskre mala ap leste: “Te hi kova yaake, palle hi i morsheske feteder, te romedinerell lo gar.”
11Penas lo: “Kava lab, hoy me penom, hayvell gar hakeno. Kolen, kay o Devel kava lab an o dji čivas, kolla hayvenn les. 12Della menshe, kay van yaake boldo, kay hi lenge kova gar mishto, te romedinerenn le. Oun vavar van yaake ap o mass činlo, te romedinerenn le nay gar. Vavar kamenn o tselo djiyestar o Debleske te boudrell. Doleske romedinerenn le gar. Koneske kava lab mishto hi, kova te krell yaake.”
O Yezous oun i tikne čave
13Koy anan le čaven pash o Yezouseste, te čivell lo peskre vasta ap lende, te mangell lo o Debles, te dikell yob lačes ap lende. Har peskre mala kova dikan, čingran le ap kol menshende.
14Koy penas o Yezous ap lende: “Moukenn kol čaven pash mande te vell! Ma rikrenn len pale! Save har yon, kolen das o Devel gole, te djivenn le khetne leha an o bolepen.”
15Oun yob čivas peskre vasta ap lende, oun djas peske.
I bravelo terno morsh
16Oun i morsh vas pash leste oun penas: “Sikepaskro, havo lačo koova hounte krap, te vell man o djipen, hoy gar pre-herella?” #19:16 Kova hi o Debleskro djipen.
17Penas o Yezous: “Hoske poučeh tou mandar, hoy lačo hi? O Devel kokres hi lačo. Tou te kameh o Debleskro djipen, palle kre kova, hoy yob penas!”
18Koy poučas lo lestar: “Hoy hounte krap?” Penas o Yezous: “Ma mare kekes! Ma rhorhe tiri romyat i vavar djouvyah! Ma čore! Ma pen rhorhepen pral yekeste! 19Dik ap tiro dadeste oun ap tiri date, te djal lenge mishto! Oun ap koleste, kay pash toute hi hounte vess yaake lačes, har hal lačes ap toute kokres.”
20Koy penas ko terno morsh ap leste: “Kova lauter krom. Hoy hounte krap boudeder?” 21Penas o Yezous ap leste: “Te kameh tou o tselo Debleskro kamlepen te krell, palle bike lauter, hoy tout hi! Oun de kol love i čorvelende! Palle hi tout i bravlepen an o bolepen. Oun am oun dja mantsa!”
22Ko terno morshes his boud bravlepen. Har yob kal laba shounas, doukas kova les. Oun yob djas peske.
23Oun o Yezous penas ap peskre malende: “Čačepah, me penau t'menge: Pharo hi i braveleske, te vell lo ap o Debleskro drom. 24Me penau t'menge ninna: Hi gar yaake pharo, te djal i baro firho an i soubyakro kand#19:24 soubyakro kand trou d'une aiguille dren har te vell i bravelo ap o Debleskro drom.”
25Har leskre mala kova shounan, tapras len i daar. Oun yon poučan lestar: “Te hi kova yaake, koon lell nay o Debleskro djipen?”
26Oun o Yezous dikas ap lende, oun penas: “Hoy i menshe nay gar krenna, nay krell o Devel halauter.”
O Debleskro bravlepen
27Koy penas o Petro ap leste: “Djineh, mer moukam lauter oun djam touha. Hoy lah mer?” 28Penas o Yezous ap lende: “Čačepah, me penau t'menge: Ko tsiro vella, kay o Devel lauter neves krella. Ap ko tsiro hi o Mensheskro Čavo o ray pral lauterende, oun yob hi beshdo ap peskro rayeskro beshepaskro. Oun t'mer, kay mantsa djana, t'mer venn ninna raya, oun han beshdo ap deesh-te-douy rayeskre beshepangre, oun rakrenn o čačepen vin pral i tsele menshende, kay venna i deesh-te-douy Israeleskre čavendar. 29Oun hakeno, kay moukas peskro kheer, peskre phralen, peskre phenyen, peskro dades, peskri dat, peskre čaven oun peskro kotar them, te djal lo mantsa, kova lell sheel kope pale, hoy yob moukas. Oun o Devel dell les o djipen, hoy gar pre-herella. 30Oun boud, kay kanna glan tardo hi, kolla hi ap ko dives palla tardo. Oun boud, kay kanna palla tardo hi, kolla hi ap ko dives glan tardo.”
Currently Selected:
Mateo 19: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
