Mateo 18
18
Koon hi mendar o pralstouno?
1Ap ko tsiro van leskre mala pash leste oun poučan lestar: “Koon hi o bareder mashkral kolende, kay djan ap o Debleskro drom?”
2Koy das o Yezous i tikno čaves pash peste gole, oun čivas les glan lende, 3oun penas: Čačepah, me penau t'menge: T'mer te moukenn gar t'maro drom, oun venn gar har i čave, palle nashte venn gar ap o Debleskro drom. 4Koon krell pes gar bares oun vell har kava čavo, kova hi o bareder mank kolende, kay djan ap o Debleskro drom. 5Oun kova, kay lell savo čavo pash peste pre, kova lell man pash peste pre.
6Kova, kay anell yekes kal tiknendar, kay patsenn ap mande, miro dromestar tele, koleske vals feteder, te vell leske i pharo bar troul i meen pandlo, oun te vell lo tassedo an o baro pani. 7I bibarht hi kova, kay della ap kay phoub boud koova, hoy anell i menshen ap o čilačo drom. Havo bibarht vell ap koleste, kay anell i vavaren ap o čilačo drom!
8Te kamell tiro vast, te kress i čilačo koova, de les tele oun vitse les toutar! Te kamell tout tiro piro ap o čilačo drom te anell, de les tele, oun vitse les toutar! Hi touke lačeder, te nashreh tou yek vast oun yek piro, oun leh ko djipen, hoy o Devel tout della, har te djas tou douy vastentsa oun douy pirentsa an i yag, hoy hako tsireske rhačella.
9Oun te kamell tiro yak čomone te dikell, hoy anell tout ap o čilačo drom, palle čin les vin, oun vitse les toutar! Hi touke feteder, te nashress yek yak, oun leh o djipen, hoy o Devel tout della, har te djas douy yakentsa an o bengeskri yag.
O nashedo bakro
10Ma čivenn kol tiknen ap i rig, har te vans le či moldo.
Me penau t'menge: I bolepangre, kay ap lende yak denna, kolla nay djana hako tsiro glan miro dadeste an o bolepen, te mangenn le les lenge.
11O Mensheskro Čavo vas ap i phoub, te anell lo kolen ap o Debleskro drom pale, kay nashedo hi. 12Kova hi yaake, har te hi i morshes sheel bakre, oun yek lendar djal nashedo. Palle moukell lo kol enya-deesh-te-enya (99) bakre ap i pralstouno them tardo, oun rodell ko yek bakres, hoy nashedo hi.
13Čačepah, me penau t'menge: Oun te hatsell lo les, palle hi lo barhtleder pral ko yekeste, har pral kol tsele vavar, hoy khetne ačan. 14Oun yaake kamell miro dad an o bolepen gar, te djal yek kol tiknendar nashedo.
An tiro phrales pale ap o čačo drom!
15Te krell tiro phraal čilačo koova ap toute, palle dja pash leste kokres, oun pen leske, kay kova gar mishto hi, hoy yob kras. Oun te dikell lo, kay kova čačo hi, hoy tou leske penal, palle anal tou tiro phrales pale ap miro drom. 16Yob te shounell gar ap toute, palle le douy vavar phralen touha, oun dja pash leste, te shounenn le, hoy tou leske peneh. Yaake djinenn douy, triin, hoy yob kras. 17Te shounell lo kava kopo vitar gar ap t'mende, palle pen les i patslenge an i kangri. Oun te shounell lo gar ap kolende, palle vell lo t'menge har i morsh, kay prindjrell o Debles gar oun har i pale-čiddo.
18Čačepah, me penau t'menge: Ap koleste, kay t'mer penenna: O Devel las tiri doosh toutar, kolestar hi li krik lino. Ap koleste, kay t'mer penenna: Tiri doosh ačell ap toute, ap koleste ačell leskri doosh čiddo.
19Me penau t'menge ninna: Te mangenn douy t'mendar khetne čomone o Deblestar, palle dell len miro dad an o bolepen kova, hoy yon lestar mangan. 20Oun kote, kay douy, triin menshe khetne venna an miro lab, kote hom me mashkral lende.
Biste ko čilačepen, hoy yek ap toute kras!
21Koy djas o Petro pash leste, oun poučas lestar: “Ray, te hi miro phraal boud kope čilačo ap mande, kitse kope hounte bistrap ko čilačo koova, hoy yob ap mande kras? Hi efta kope doha?”
22Penas o Yezous ap leste: Na-a, me penau touke, efta kope hi gar doha. Tou hounte bistress kova efta-deesh kope oun pale efta-deesh kope, yaake rah har yob ap toute čilačo koova krella.
23Me kamau te sikrap t'mende har pash kolende hi, kay djan ap o Debleskro drom. O Devel an o bolepen hi har i baro ray. Kova moukell peskre boudepangren glan peste te anell, te lell lo lendar kol love, hoy yon leske khetne anan dran pengri boudi. 24Kote vas i morsh glan leste anlo. Koles his deesh zerya roupene beme siyaan pash leste. 25Kova nashte playsras kova gar pale. Koy penas o ray: Bikrenn les peskri romyah, oun peskre čaventsa, oun lauterentsa, hoy les hi! Oun denn man kol love, hoy t'mer lenge dren lenna! 26Koy vitsras pes ko morsh glan leste ap i phoub, oun penas: Ray, me mangau tout: Ab lačes ap mande! De man i tsiro, te nay playsrap miri siyaan pash toute! 27Oun o rayes khaytas kova, oun yob moukas leske leskri tseli siyaan te perell, oun moukas les te djal.
28Oun o morsh djas dran ko kheer vin, oun tapras i vavar boudepaskres ap o drom. Kales his sheel beme siyaan pash leste. Koy čivas lo peskre vasta troul koleskri meen, te tassrell lo les, oun penas ap leste: De man kanna mire love pale! 29Koy vitsras pes kava morsh glan o vavareste ap i phoub oun penas: Me mangau tout: Ab lačes ap mande, oun de man i tsiro, te nay playsrap me touke len pale! 30Ko vavar morsh kamas či te shounell, oun vitsras les an o stilepen, te ačell yob kote yaake rah, har yob gar koy siyaan pale playsras.
31Oun har shounan kova kol tsele vavar boudepangre, kay o rayeske boudrenna, doukas kova len an o dji. Oun yon djan pash o rayeste, oun penan leske lauter, hoy yon shounan. 32Koy das o ray ap o morsheste gole, oun penas ap leste: Tou hal i čilačo boudepaskro. Me moukom tiri siyaan touke te perell, har tou mandar mangal.
33Yaake har dikom lačes ap toute, yaake hounte dikals tou ninna lačes ap koleste, kay les hi i siyaan pash toute.
34Oun pherdo rholi das les o ray an i vasta kolendar, kay denn les dava an o stilepen. Kote hounte ačell yob yaake rah, har yob gar koy siyaan pale playsras.
35Oun o Yezous penas doureder: Te bistrenn t'mer gar o tselo djiyestar o čilačo koova, hoy i vavar phraal ap t'mende kras, yaake krell miro dad an o bolepen emligo t'mentsa.
Currently Selected:
Mateo 18: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
