Mateo 17
17
O Yezouseskre mala dikenn leskro raylepen
1Oun pal shob divessa djas o Yezous ap i bari berga. Leha khetne djas o Petro oun kol douy phrala, o Yakobo oun o Yohanni. Kek vavar djas lentsa. 2Oun glan lengre yaka las lo i bolepaskro raylepen. Leskro mouy vas har o kham. Oun leskro ripen vas biyalo har i bari momeli. 3Oun ap yek kopo dikan le o Moses oun o Eliyas koy tardo, kay leha rakrenn.
4Koy penas o Petro ap o Yezouseste: “Ray, hi mishto, te ham mer kate. Tou te kameh, krau me triin tikne khera kate, yek touke, yek o Moseske, oun yek o Eliyeske.”
5Oun har yob yaake rakras, vas i parni folka pral lende tele. Oun dran koy folka vas o rakepen, hoy penas: “Kava hi miro čavo! Koles kamau o djiyestar. Yob krell man barhtelo. Shounenn ap leste!”
6Oun har yon kova shounan, vitsran le pen i bari daryatar ap i phoub.
7Oun o Yezous djas pash lende, čivas peskre vasta ap lende, oun penas: “Stenn pre! Ma darenn!”
8Oun yon dikan pre, oun dikan kekes bouder, har o Yezouses kokres.
9Oun o Yezous djas lentsa koy berga tele, oun penas zoreles ap lende: “Penenn kekeske, hoy t'mer dikan, yaake rah har o Mensheskro Čavo gar i moulendar pre stas!”
10Oun leskre mala poučan lestar: “Hoske penenn mare čačepangre, kay o Eliya hounte vell glan ko tsiro, kay kova lauter vella?” #17:10 dik: Malachie 3:23-24
11Penas lo: “Kova hi čačo: O Eliya vella, oun anell o Debleskre menshen lauter pale khetne. 12Čačepah, me penau t'menge: O Eliya vas pale. Yon prindjran les gar, oun kran leha, hoy yon kaman. Oun yaake hounte lell ninna o Mensheskro Čavo boud douka ap peste.”
13Kote hayvan leskre mala, te rakras lo o Yohannestar, kova, kay taufras i menshen.
O Yezous krell i čaves sasto
14Oun har yon pash kol tsele menshende van, kay kote tardo hi, vas i morsh pash o Yezouseste. Kova vitsras pes glan leste ap i phoub, 15oun penas: “Ray, kre tiro dji miro čaveske pre! Yob hi yaake nasselo, har te vals lo dinelo, oun yob perell ap i phoub. Boud kope peras lo an i yag, oun boud kope peras lo an i pani. 16Me anom les pash tire malende, te krenn le les sasto. Oun yon nashte kran kova gar.”
17Koy penas o Yezous: “T'mer čilače menshe, t'men hi kek patsepen! Har rah hounte ačap pash t'mende? Har rah marap man t'mentsa tele? Anenn les pash mande!”
18Oun o Yezous das o benges trad, oun penas leske, te djal yob dran koleste vin. Oun o beng djas dran leste vin. Oun ko čavo vas sasto.
19Koy van o Yezouseskre mala pash o Yezouseste, har yob kokres his, oun poučan lestar: “Hoske tradam mer les nashte gar vin?”
20-21Penas lo ap lende: “T'maro patsepen hi tikno. Čačepah, me penau t'menge: Te vals t'maro patsepen ninna tikno har i senftikro djob, nay penans t'mer ap kay berga: Čip tout ap koy vavar rig! Oun koy berga čivals pes ap i vavar rig. Oun či nashte vals, hoy t'mer nashte gar krans.”
O Yezous rakrell o douyto kopo pral peskro merepen
22Oun o Yezous djas peskre malentsa an o them Galilea trouyel. Ap o drom penas lo ap lende: “O Mensheskro Čavo vell an i menshengre vasta dino. 23Oun yon marenn les. Pal triin divessa vell lo o Deblestar djides kerdo.”
Oun ko lab doukas len an o dji.
O Yezouseskre mala oun i pralstoune
24Oun yon djan an o foro Kapernaum. Kote his kolla, kay lenn o Debleskro khereskre love khetne. Kolla van pash o Petreste, oun poučan lestar: “Dell t'maro sikepaskro kol Debleskro khereskre love?” “Ava,” penas lo, “kova playsrell yob.” 25Oun o Petro djas an o kheer dren, te penell lo kova o Yezouseske. Har o Yezous dikas, te vell o Petro pash leste, poučas lo lestar: “Petro, koon hounte dell kol love i bare rayende ap kay phoub? Hounte denn lengre menshe lende kol love? Hounte denn i vi-themarya lende kol love?” #17:25 An ko phouro tsiro kouras yek baro ray i vavareha, oun las o them ko vavarestar dren. Oun palle hounte playsrenn i menshe an ko them, hoy dren lino vas, boud love ap ko zorleder baro rayeste.
26Penas o Petro: “I vi-themarya hounte denn kol love ap i bare rayende.”
“Mishto,” penas o Yezous, “yaake hounte playsrenna lengre menshe či ap lende.
27Ninna te hi kova yaake, kamah gar, te venn le rhoyedo ap mende. Doleske dja pash o baro pani, oun vitse i raan an o pani! Ko mačo, hoy tou tapreh, koleske kre o mouy pre! Oun tou hatseh an leskro mouy i roupeni bema. Le koy roupeni bema, oun de koy bema kolende, kay len kol love dren! Kova hi doha mange oun touke.”
Currently Selected:
Mateo 17: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
