Mateo 16
16
I Farisarya kamenn i baro Debleskro koova te dikell
1Oun i Farisarya oun i Sadducarya van pash o Yezouseste. Yon kaman te taprenn le les leskre labentsa oun penan ap leste: “Kre menge i baro koova, hoy sikrell mende, te vell tiri zoor o Deblestar!”
2Koy penas lo ap lende: Te djal o kham tele, oun o bolepen vell lolo, penenn t'mer: Taysar vell shoukar!
3Oun te hi o bolepen taysarlake lolo, penenn t'mer: Vella brishin! Yaake dikenn t'mer ap o bolepen, oun djinenn, hoy vella. Kova, hoy kanna mashkral t'mende djala, kova hayvenn t'mer gar. 4Har čilačo hi kol menshe, kay djivenn an kava tsiro! Yon moukan o Debles, oun kamenn i baro Debleskro koova te dikell. Oun o Devel sikrell len či vavar har kova, hoy i menshe ninna ap o Debleskro rakepaskro, o Yona, dikan. Oun o Yezous moukas len, oun djas peske.
I Farisarya oun i Sadducarya
5Oun o Yezouseskre mala van ap i vavar panyeskri rig, oun hayvan, te bistran le o maro lentsa te lell.
6Oun o Yezous penas ap lende: “Denn yak! O shoutlo yarro hi gar mishto, hoy vell i Farisarendar oun i Sadducarendar!”
7Har yon kova shounan, rakran le pral leskre laba oun penan: “Mer lam kek maro mentsa. Doleske penas lo kova menge.”
8O Yezous hayvas, hoy yon penan, oun yob penas ap lende: “Hoske rakrenn t'mer pral o maro, hoy t'mer bistran? Havo tikno patsepen hi t'men! 9T'mer hayvan man gar. Bistran t'mer kol panč mare, hoy dom kol panč zerya menshende te rhal? Oun pal ko rhapen hadan t'mer deesh-te-douy marengre gone pherdo maro pre, hoy pral ačas. 10Oun bistran t'mer ninna kol efta mare, hoy dom kol star zerya menshende te rhal? Oun pal ko rhapen hadan t'mer efta marengre gone pherdo maro pre, hoy pral ačas. 11Hayvenn t'mer kanna, kay me rakrom gar pral o maro, har penom: Denn yak! O shoutlo yarro hi gar mishto, hoy vell i Farisarendar oun i Sadducarendar!”
12Oun koy hayvan le, te rakras lo gar pral o shoutlo yarro, hoy lenn le, te pekenn le maro. Yob rakras pral kol laba, hoy i Farisarya oun i Sadducarya i menshenge penenna.
Koon hi o Yezous?
13O Yezous djas pash o foro Cesarea Filipi. Oun kote poučas lo peskre malendar: “Hoy penenn i menshe pral o Menshengro Čaveste?”
14Oun leskre mala penan ap leste: “Yon penenna, tou hal o Yohanni, kova, kay taufras i menshen. Vavar penenna, kay tou hal o Eliya. Oun vavar penenna, kay tou hal o Yeremia. Oun pale vavar penenna, kay tou hal i Debleskro rakepaskro, kay i moulendar pre stas.”
15Penas lo: “Oun hoy penenn t'mer, koon me hom?”
16Penas o Simon Petro: “Tou hal o baro ray, kolestar o Devel penas te vell yob. Tou hal o čavo o djido Deblestar.” 17Penas o Yezous ap leste: “Barhtelo hal tou, Simon Bar-Yona#16:17 Bar-Yona hi o Simoneskri familyakro lab.. Kol laba, hoy tou pral mande penal, kolla van gar toutar, vitar gar vavar menshendar. Miro dad an o bolepen sikras tout kova. 18Doleske penau touke: Tiro lab hi kanna Petro#16:18 Kova kharella zorelo bar.. Kova, hoy tou kate penal, hi har i zorelo bar, ap koleste čivau miro kheer. Oun miro kheer hi kolla, kay patsenn ap mande. Oun kek nashte lell len dran mire vasta vin, ninna kek merepen. 19Me dau tout i klidepaskro, hoy krell o voudar pre, te venn i menshe ap miro drom. Ap koleste, kay tou peneh: O Devel las tiri doosh toutar, kolestar hi li krik lino. Ap koleste, kay tou peneh: Tiri doosh ačell ap toute, ap koleste ačell leskri doosh čiddo.”
20Pal kova penas lo peskre malenge, te penenn le kekeske, te hi lo ko baro ray, kolestar o Devel penas, te vell yob.
O Yezous rakrell pral peskro merepen
21Oun ap ko tsiro penas o Yezous peskre malenge, te hounte djal lo an o foro Yerusalem. Oun yob penas lenge: “Me hounte lap boud douka ap mande. I bare rashaya, oun i biboldengre phoureder oun čačepangre, kolla marenn man. Oun pal triin divessa krell man o Devel djido.”
22Koy las o Petro les ap i rig, oun čingras ap leste oun penas: “Mo ray, ko nashte vell gar. Ma mouk kova pral toute te vell!”
23O Yezous rissras pes trouyel, oun penas ap o Petreste: “Dja touke, tou beng! Tou kameh man o Debleskro dromestar tele te anell. Tou kameh gar, hoy o Devel kamella. Na-a, tou kameh, hoy i menshe kamenna.”
O Yezouseskro drom
24Palle penas o Yezous ap peskre malende: Koon ap miro drom mantsa djala, kova hounte bistrell, hoy leske kokres mishto hi, oun hounte lell peskro troushel ap peste, oun djal mantsa. 25Koon peskro djipen zoreles kamella, kova nashrell les. Koon peskro djipen mange nashrella, lell les mandar pale. 26I mensheske vals kova gar mishto, te lals lo o tselo bravlepen ap kay phoub, oun nashrals o djipen. I mensho nay dell či o Debleste, te lell lo ko djipen pale. 27Me hom o Mensheskro Čavo. Oun me vau pale ap i phoub an o raylepen, hoy das man miro dad an o bolepen. Oun mantsa venna mire bolepangre. Oun palle dikau ap hakeneste, hoy yob kras. Oun me dau lačo koova kolen, kay lačo koova kran. Oun me dau i phagi kolen, kay čilačo koova kran.
28Čačepah, me penau t'menge: Mashkral t'mende hi save menshe, kay merenn gar, bis te dikenn le o Menshengro Čaves, har yob o baro ray hi.
Currently Selected:
Mateo 16: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
