Mateo 12
12
O Debleskro drom oun o phourengro drom
1Ap yek Debleskro dives djas o Yezous peskre malentsa ap i tikno kotar them, kay o djob baro vas. Oun leskre malen his bok. Oun yon lan o djob an i vasta, te rhan le.
2Kova dikan i Farisarya oun penan ap o Yezouseste: “Dik, tire mala krenn ap o Debleskro dives, hoy hi gar pal o biboldengro čačepen.”
3Penas lo ap lende: Hoy kras o baro ray David oun peskre mala, har yon bokan? Draveran#12:3 draveran leseran t'mer kova gar an o Debleskro lab? 4Yob djas an o Debleskro kheer, oun rhas o Debleskro maro, yob oun kolla, kay pash leste hi. Pal i biboldengro čačepen his i mare i rashayenge kokres koy.#12:4 dik: 1. Samuel 21:2-7 5Oun t'mer djinenn ninna, hoy an o Moseskre lila tardo hi, te krenn i rashaya ap o Debleskro dives pengri boudi an o Debleskro baro kheer. Oun yaake krenn le o Debleskro dives praasedo. Ninna te krenn le kova, anenn le kek doosh ap pende.
6Kanna penau me t'menge: Kova, kay glan t'mende tardo hi, kova hi bareder har o Debleskro baro kheer. 7T'mer hayvan kol laba gar, hoy o Devel penas: Me kamau, te han t'mer lačo ap i vavarende. Me kamau gar, te marenn t'mer mange firhen.#12:7 dik: Hosea 6:6
Te hayvans t'mer, hoy kova kharella, palle anans t'mer kek doosh ap mire malende. Yon anan kek doosh ap pende.
8Me, o Mensheskro Čavo, hom ninna o ray pral o Debleskro dives.
O Yezous oun o Debleskro dives
9Oun yob djas peske, oun djas an i biboldengri kangri. 10Koy his i morsh, koles his i bango vast. Yon kaman i doosh ap o Yezouseste pre te anell, te anenn le les nay glan i čačepangre. Doleske poučan le lestar: “Nay krah mer yekes ap o Debleskro dives sasto?”
11Penas lo ap lende: “Te hi yekes t'mendar i bakro, oun kova perell ap o Debleskro dives an i rheb an i phoub, kek t'mendar moukals les kote. Na-a, yob djals kote, taprals les, oun lals les kote vin.
12I mensho hi boudeder moldo har i bakro. Yaake hi kova čačo, te krah mer i menshes ap o Debleskro dives sasto.”
13Oun ap ko morsheste penas lo: “Hade tiro vast pre!” Oun yob hadas peskro vast pre. Oun leskro vast vas sasto, har ko vavar vast.
14Koy djan i Farisarya vin, oun rakran khetne, har yon les nay marenna.
O Debleskro boudepaskro
15Oun o Yezous hayvas kova, oun djas peske. Oun boud menshe djan leske palla. Oun yob kras hakenes lendar sasto. 16Oun yob penas zoreles ap lende, te penenn le kova kekeske. 17Oun yaake vas kova čačo, hoy o Debleskro rakepaskro, o Yesaya, glan i rah tsiro penas: 18O Devel penella: Dik, kova hi miro boudepaskro, kay me mange vin rodom. Koles kamau o djiyestar. Pral leste hom barhtelo. Me čivau miro Dourho ap leste. Oun yob penell i tsele menshenge, hoy me lendar kamau. 19Yob čingrell pes gar, oun dell gar bari gole. Oun yob krell kek baro rakepen ap o drom. 20Yob hi lačo ap koleste, kay hi les bouder gar boud zoor. Yob phagell les gar har i kasht, kay hi an-phagedo. Ninna i momeli, hoy gomme i tikno kotar rhačella, krell lo gar vin. Yaake hi lo, bis te hi peskro čačepen pral halauter tardo. 21Oun i tsele menshe ap i phoub dikenn ap leste.#12:21 dik: Yesaya 42:1-4
O Yezouseskri zoor vell o Deblestar
22Palle anan le i morshes pash o Yezouseste. Kova his korelo, oun nashte rakras gar. Oun i beng his an leste. Oun o Yezous kras o morshes sasto, yaake te nay rakras lo, oun dikas lo pale. 23Oun i tsele menshe, kay troul leste tardo his, kran bare yaka. Oun yon penan: “Hi kava nay o Davideskro čavo?”
24Har i Farisarya kova shounan, penan le: “O pralstouno beng das les i zoor. Dran kova nay tradell yob i bengen vin.”
25O Yezous hayvas, hoy an lengro shero trouyel djas. Oun yob penas ap lende: Hako them oun hako foro djal paash, kay douy bare raya kourenn pen. Oun an yek kheer nashte venn gar douyen penepaske. Kova djal gar. 26Te tradell o beng i vavar benges vin, hi kova yaake, har te kourell pes ko yek o vavareha. Palle nashrenn yon pengri zoor. 27Te dals o pralstouno beng mande peskri zoor, te nay tradoms i bengen vin, koon dals t'mare menshen i zoor, te tradenn le i bengen vin? Vell yek dives, kay yon penenn t'menge, kay kova gar čačo hi, hoy t'mer pral mande rakran.
28Na-a, gar o beng das man koy zoor. O Debleskro Dourho das man koy zoor, te nay tradap i bengen vin. Koy pre dikenn t'mer, kay ko tsiro vas, kay o Devel i menshen dran o čilačepen vin lella, oun leskri zoor mank t'mende hi.
29Kova, kay kamell an o kheer i zorelo morshestar dren phagell, te lell lo leskro bravlepen, kova hounte pandell ko zorelo morshes. Oun palle randell lo leskro tselo bravlepen. 30Koon gar ap miri rig hi, kova hi ap ko vavareskri rig. Oun koon gar i menshe pash mande anella, kova tradell len mandar.
31Čačepah, me penau t'menge kanna: O Devel nay bistrell hako čilačo koova, hoy i menshe kran. Oun yon te rakrenn djoungele laba pral leste, yaake nay bistrell lo kova ninna. Yek penell djoungele laba pral o Debleskro Dourho, palle bistrell lo kova gar. 32Oun yek te penell djoungele laba pral o Menshengro Čaveste, yaake nay bistrell lo kova. Yek te rakrell djoungele laba pral o Debleskro Dourho, kova bistrell lo an kek tsiro, gar an kava tsiro, oun vitar gar an ko tsiro, kay vella.
Dran i lačo dji vella lačo koova
33Te hi t'men i lačo phabyengro rouk, hi t'men ninna lače phabya. Te hi t'men i phabyengro rouk, kay gar lačo hi, hi t'men ninna phabya, kay gar lačo hi. Ap kova, hoy o roukestar vella, dikenn t'mer, har ko rouk hi. 34T'mer han sapa! T'mer han čilačo oun nay rakrenn gar lačo koova. I mensho penell kova, hoy an leskro dji dren hi. 35Dran i lačo mensheskro dji vella lačo koova. Dran i čilačo dji vella čilačo koova. 36Me penau t'menge: Vell ko dives, kay rakrell o Devel o čačepen pral i tsele menshende ap i phoub vin. Kote poučell lo lendar pal hako čilačo lab, hoy yon penan. 37Tou te penal i lačo oun čačo koova, leh tou kek phagi. Tou te penal kova, hoy gar lačo oun čačo hi, leh tou i phagi.
I menshe an kava tsiro hi čilačo
38Palle penan i biboldengre čačepangre oun i Farisarya ap leste: “Sikepaskro, kre menge i baro koova, hoy sikrell mende, te vell tiri zoor o Deblestar!” 39Kote penas lo ap lende: Har čilačo hi kol menshe, kay djivenn an kava tsiro. Yon moukan o Debles, oun kamenn i baro Debleskro koova te dikell. Oun o Devel sikrell len či vavar har kova, hoy i menshe ninna ap o Debleskro rakepaskro, o Yona, dikan.
40O Yona ačas triin divessa oun triin rati an o baro mačeskro per.#12:40 dik: Yona 2:1 Oun yaake hounte ačell o Mensheskro Čavo triin divessa oun triin rati an i phoub paskedo.
41Ap ko dives, kay o Devel o čačepen pral i tsele menshende vi-rakrella, stenna ninna i menshe dran o foro Ninive pre. Oun yon penenna, te hi kol menshe čilačo, kay kanna djivenna. Glan i rah tsiro penas o Yona i menshenge an o foro Ninive o Debleskro lab. Oun yon moukan pengro čilačo drom, oun djan ap o Debleskro drom. Kova, kay glan t'mende tardo hi, kova hi bareder har o Yona.
42Ap ko dives, kay rakrell o Devel o čačepen vin pral i tsele menshende, stella ninna i bari rani#12:42 rani rayetsa dran o foro Saba pre. Oun yoy penella, te hi kol menshe čilačo, kay kanna djivenna. Glan i rah tsiro, vas yoy dran i dour them, oun vas pash o baro ray Salomo, te shounell li leskre goseve laba. Kava, kay glan t'mende tardo hi, kava hi bareder har o baro ray Salomo.
O beng, kay pale vella an peskro kheer
43Te djas i beng dran i mensheste vin, nashell yob an i them trouyel, kay kek djipen hi, oun rodell peske, kay ačell yob nay, oun hatsell či. 44Palle penell lo ap peste: Me kamau pale an miro kheer te djal, dran hoy me vin djom. Oun te vell lo pale, hi ko kheer djoudjo oun shoukar, oun kek djivell kote. 45Koy rodell lo peske vavar efta benga, kay čilačeder hi har yob. Oun yon djan an ko mensheste dren, oun djivenn an leste. Yaake hi ko mensheha djoungleder har glan kava tsiro. Oun yaake djal ninna kal čilače menshenge, kay kanna djivenna.
O Yezouseskri day oun leskre phrala
46Oun har yob kova kol menshenge penas, kay troul leste tardo his, koy vas leskri day oun leskre phrala. Yon his vin tardo, oun kaman leha te rakrell.
47Oun yek penas ap leste: “Shoun, tiri day oun tire phrala hi vin tardo oun kamenn touha te rakrell.”
48Penas lo ap koleste: “Me kamau touke te sikrell, koon miri day oun mire phrala hi.” 49Oun palle sikras lo ap peskre malende oun penas: “Dik, kalla hi miri day oun mire phrala! 50Kova, kay krella, hoy miro dad an o bolepen kamella, kova hi miro phraal, oun miri pheen, oun miri day.”
Currently Selected:
Mateo 12: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
