Mateo 11
11
O Yohanneskre mala
1Oun har o Yezous peskre deesh-te-douy malenge penas, hoy hounte krenn le, djas lo doureder an i vavar biboldengre forya, te sikrell lo kote i menshende o Debleskro drom.
2Ap ko tsiro his o Yohanni an o stilepen. Kote shounas lo, hoy o Yezous Kristo lauter kras. Oun yob bičras peskre malen pash leste, 3oun moukas lestar te poučell: “Hal tou kova, kay hounte vell? Hounte dikas mer ap i vavareste, te vell lo?”
4Penas o Yezous ap lende: “Djan pash o Yohanneste, oun penenn leske, hoy t'mer shounan oun dikan: 5I korele dikenna pale oun i bange nashenna pale. I nassele, kay lengro mass ap lende tele merell, kolla venna sasto. Kolla, kay nay shounan gar, shounenna kanna. I moule venna djido. I čorvele shounenn o Debleskro lačo lab.#11:5 dik: Yesaya 35:4-6 6Oun barhtelo hi kova, kay rhoyrell pes gar pral mande!”
O Yezous rakrell mishto pral o Yohanneste
7Oun har o Yohanneskre mala penge djana, rakras o Yezous ap kol boud menshende pral o Yohanneste, oun penas: Hoske djan t'mer an o moulo them? Kaman t'mer i morshes te dikell, kay hi har i patri, hoy i zorelo dourho pral i phoub phourdella? Na-a, savo morsh hi lo gar!
8Koon kaman t'mer te dikell? Kaman t'mer i morshes te dikell, kay an kouč koola rido hi? Na-a, savo morsh hi lo vitar gar! Kolla, kay rivenna kouč koola, djivenn an i rayengre khera. 9Hoske djan t'mer an o moulo them? Kaman t'mer i Debleskro rakepaskro te dikell? Ava, kova hi o Yohanni. Oun me penau t'menge: Yob hi bareder har i Debleskro rakepaskro.
10Lestar hi činlo an o Debleskro lab: O Devel penas ap peskro čaveste: Me bičrau i morshes glan toute ap o drom, te krell lo touke i drom, te nay vess pash i menshende.#11:10 dik: Malachie 3:1
11Čačepah, me penau t'menge: Kek vas boldo ap kay phoub, kay hi bareder har o Yohanni. Me penau t'menge ninna: O tikneder kolendar, kay moukenn man pengro ray te vell, kova hi bareder har o Yohanni. 12Har o Yohanni vas oun i menshen taufras, vas o Debleskro nevo tsiro. An kava tsiro dell o Devel i menshen pash peste gole, te djan le ap leskro drom. Oun bis kava dives kamenn čilače menshe i zoryah o Debleskri boudi paash te krell. Yon kamenn te vell len penepaske koy pral.
13Oun i tsele Debleskre rakepangre oun o Mose rakran glan i rah tsiro pral kava nevo tsiro. Kanna hi o Yohanni koy, oun ko nevo tsiro vas. 14Patsenn mange, o Yohanni hi o Eliya, kolestar penlo vas, te vell lo. 15Moukenn kova an t'maro shero trouyel te djal!
Boud menshe kamenn o Yezouses gar
16I menshe an kava tsiro hi har čave, kay khelenn an o foro. Oun yon denn gole yek ap o vavareste:
17Mer bashram t'menge. T'mer khelan gar. Mer givam moulengre gilya. T'mer rovan gar.
18O Yohanni rhas oun piyas gar. Oun yon penenna: “I beng hi an leste.” 19Oun me, o Mensheskro Čavo, me vom, rhom oun piyom, oun mandar penenn le: “Kova hi i baro rhapaskro oun i pipaskro. Kova hi i maal kolendar, kay lenn i biboldendar love i Remaryenge dren. Oun kova hi i maal kolendar, kay čilačo koova kran oun doleske pale-čiddo hi.”
Ninna te rakrenn le yaake, dikenn le ap o Debleskre menshende, kay kova čačo hi, hoy o Devel krella.
I forya Korazin, Betsayda oun Kapernaum
20Palle čingras lo pral kol forya, kay yob boud baro koova kras an o Debleskri zoor. I menshe kote moukan gar pengro čilačo drom, te djan le ap o Debleskro drom.
21Oun yob penas: Bibarhtelo venna t'mer menshe an o foro Korazin! Bibarhtelo venna t'mer menshe an o foro Betsayda! Te krals yek an i forya Tirus oun Sidon savo baro koova an o Debleskri zoor, har me pash t'mende krom, rivans i menshe kote i gono troul pende, oun čivans yagakri čik ap pengre shere, te sikrenn le, kay lengro čilačepen khaytell len. Oun yon moukans pengro čilačo drom, oun djans ap o Debleskro drom. 22Ap ko dives, kay rakrell o Devel o čačepen vin pral i tsele menshende ap i phoub, djal kol menshenge an i forya Sidon oun Tirus feteder har t'menge kate. 23Oun t'mer menshe an o foro Kapernaum, patsenn t'mer, kay venn t'mer an o bolepen hadedo? Na-a! T'mer djan an o moulengro them tele. O baro koova, hoy krom an o Debleskri zoor pash t'mende, te kroms kova an o foro Sodom, palle vals ko foro gomme kava dives.
24Me penau t'menge: Ap ko dives, kay rakrell o Devel o čačepen pral i tsele menshende vin, lenn t'mer i bareder phagi, har kol menshe an o foro Sodom.
O Yezous kokres prindjrell o Debles
25Oun ap kava tsiro penas o Yezous:
Tata, tou hal o ray pral o bolepen oun i phoub. Me sharau tout.
Kova, hoy tou kreh, sikral tou kolende, kay gar boud djinenna.
Kolla, kay gosevo hi oun boud djinenna, kolla hayvenn kova gar.
26Ava tata, yaake kamal tou kova.
27Lauter das miro dad an mire vasta. Kek djinella, koon o čavo hi, har kokres o dad.
Oun kokres o čavo djinella, koon o dad hi. Oun o čavo sikrell kolen, kay patsenn ap leste, koon o dad hi.
Avenn pash mande!
28T'mer marenna t'men tele, te krenn kova, hoy t'mare phoure ap t'mende penan. Avenn pash mande! Me lau ko pharo koova t'mendar, te lenn t'mer pale nevi zoor. 29Me hom t'menge i lačo ray, oun dikau ap kekeste tele. Shounenn ap mande oun krenn, hoy me t'menge penaua! Oun t'maro dji vell pale zorelo. 30Kova, hoy me t'menge penaua, hi t'menge lačo. Oun t'mer hounte marenn t'men gar tele.
Currently Selected:
Mateo 11: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
