Mateo 10
10
O Yezouseskre deesh-te-douy mala
1Oun o Yezous das peskre deesh-te-douy malen#10:1 O Yezous rodas peske deesh-te-douy morshen vin, kay leha djan oun leha djivan. Yob penas lenge o Debleskro lab oun bičras len pash i menshende, te penenn le les lenge doureder. pash peste gole, oun das len i zoor pral i benga, te nay tradenn le len dran i menshende vin, oun te nay krenn le lauteren sasto, kay nasselo hi.
2Kolla hi i laba kol deesh-te-douyendar, kolen o Yezous pash i menshende bičras: O glanstouno his o Simon, kay kharas ninna Petro, oun leskro phraal Andreas, oun o Yakobo oun leskro phraal Yohanni, – kolengro dad his o Zebedeo, 3o Filipo, oun o Bartolomeo, o Thomas oun o Mateo, kay i biboldendar love i Remaryenge dren las, oun o Yakobo, – koleskro dad his o Alfeo, oun o Tadeo, 4oun o Simon, kay his kol menshendar, kay kharenna Zelotarya#10:4 Kol Zelotarya his bibolde, kay kaman gar kol themeskre love i Remaryenge te playsrell. Yon dikan ap ko tsiro, kay o baro ray vella, kolestar o Devel penas, te vell yob. Doleske kaman le i Remaryengre lourden dran o them Israel i zoryah vin te tradell. oun o Youdas Iskariot, ko phoukepaskro.
O Yezous dell peskre malen i bari boudi te krell
5Kolla deesh-te-douy morsha bičras o Yezous pash i menshende, oun penas zoreles ap lende: Ma djan pash kolende, kay kek bibolde hi! Ma djan an i forya, kay i Samaritarya djivenna! 6Djan pash i Israelitarya! Yon hi har nashede bakre! 7T'mer te venn pash lende, palle penenn lenge: O tsiro vell sik, kay lell o Devel i menshen dran o čilačepen vin. 8Krenn i nasselen sasto, oun krenn i moulen djido! Oun kolla, kay i djoungelo nasslepen ap o mass hi, kolen krenn ninna sasto! Tradenn i bengen dran i menshende vin! Kay zoor dom t'men čičeske. Doleske krenn kova ninna čičeske, oun lenn kek love lendar! 9Ma lenn love t'mentsa ap o drom, vitar kek sonakay, kek roup, oun vitar kek tikne love! 10Lenn kek possita t'mentsa, kek douyto gad, kek kirrha, vitar kek kasht! I boudepaskro lell peskro rhapen kolendar, kolenge yob boudrella.
11T'mer te venn an i foro oun an i gab, palle poučenn pal yekeste, kay moldo hi, te ačenn t'mer an leskro kheer. Pash leste ačenn yaake rah har t'mer ačenn an ko foro. 12Te venn t'mer an i kheer dren, palle rakrenn o Debleskri barht pral kol menshende vin! 13Oun yon te lenn t'men an lengro kheer dren, palle vell o Debleskri barht ap lende. Yon te lenn t'men gar an lengro kheer dren, palle vell o Debleskri barht gar ap lende. 14Kote, kay lenn le t'men gar pre, oun kamenn t'men gar te shounell, kote djan t'menge dran ko kheer oun dran ko foro vin! Oun denn koy čik t'mare pirendar tele!
15Čačepah, me penau t'menge: Ap ko dives, kay o Devel o čačepen pral i tsele menshende ap i phoub vi-rakrella, lenna kol menshe, kay lan t'men gar pre, i bareder phagi har kolla, kay djivan an i forya Sodom oun Gomorra.
I menshe venna rhoyedo ap o Yezouseskre malende
16Djinenn, me bičrau t'men har bakre mank i divye djouklende. Doleske venn gosevo har i sapa oun djoudjo har i parne čirkle, an kolende kek rhorhepen hi!
17Denn yak, hoy i menshe t'mentsa krenna! Yon anenn t'men glan i čačepangre, oun moukenn t'men an lengre kangria i čoupniyah#10:17 čoupni fouet dava te dell.
18T'mer patsenn ap mande. Doleske anenn le t'men glan i pralstunende oun glan i bare rayende, te rakrenn yon i phagi vin pral t'mende. Kova vell ap t'mende, te rakrenn t'mer mandar glan lende oun glan kolende, kay o Debles gar prindjrenna.
19Kova te vell, palle ma darenn, hoy t'mer hounte penenna! O Devel sikrell t'mende, hoy t'mer hounte penenna ap ko dives. 20T'mer han gar kolla, kay rakrenna. Kova hi o Debleskro Dourho, kay dran t'mende rakrella.
21Ap ko tsiro dell i phraal peskro phrales an lengre vasta, te vell lo maredo. Oun o dad dell o čaves an lengre vasta, te vell yob maredo. Oun i čave hi midjak ap pengre dadende oun pengre dayende, oun denn len an i vasta kolendar, kay marenn len. 22T'mer patsenn ap mande. Doleske venn i menshe rhoyedo ap t'mende. Kova, kay ačell zoreles tardo an o patsepen, yaake rah, har yob djivella, kova lell o Debleskro djipen.
23Te lenn le t'men an yek foro palla, palle nashenn an i vavar foro! Čačepah, me penau t'menge, t'mer venna gar an hako foro an o them Israel yaake rah har o Mensheskro Čavo gar pale vas.
24Yek, kay djal an o sikepaskro kheer, djinell gar boudeder har o sikepaskro. Oun i boudepaskro hayvell gar boudeder har peskro ray. 25Yek, kay djal an o sikepaskro kheer, koleske hi doha, te djinell lo yaake boud har peskro sikepaskro. Oun i boudepaskro, koleske hi doha, te hayvell lo yaake boud har peskro ray. Oun te penenn le ap o rayeste pral o kheer: Beng! palle kharenn le ninna kolen yaake, kay an leskro kheer djivenna. Doleske ma darenn lendar!
Ma darenn i menshendar!
26Vell o dives, kay vell kova diklo, hoy kanna khatedo hi. Vell o dives, kay djinell hakeno kova, hoy kanna kek djinella.
27Kova, hoy me t'menge čorrhanes penau, kova penenn i menshenge yaake, te shounell les hakeno! Oun kova, hoy t'menge an o kand penlo vella, kova penenn i tsele menshenge! 28Ma trashenn kol menshendar, kay nay marenn t'men! Yon nay marenn gar o djipen an t'mende, hoy ninna pal o merepen djivella. Trashenn o Deblestar, kay nay čivell t'men pal o merepen an o bengeskri yag, kay han hako tsiro nashedo!
29Douy tikne čirkle hi glan i menshende gar boudeder moldo har yek bema. Oun kek lendar perella ap i phoub, te kamell o Devel kova gar. Yob hi t'maro dad an o bolepen. 30Oun yob djinella, kitse balla ap t'maro shero hi. 31Doleske ma darenn! T'mer molenn boudeder har boud čirkle.
32Me penau t'menge: Koon glan i menshende penella: O Yezous hi miro ray! kolestar penau me glan miro dadeste an o bolepen: Yob hi miro! 33Koon man bourhoste della glan i menshende, koles dau me ninna bourhoste glan miro dadeste an o bolepen.
Koon peskro djipen kamell te rikrell, kova nashrell les
34Ma patsenn, te lap o čingepen ap kay phoub krik. Na-a! Kova krau gar. Mantsa vell o kourepen. 35Mange čingrenn pen i menshe. O čavo čingrell pes peskro dadeha. Oun i čay čingrell pes peskri dah. Oun o čaveskri romni čingrell pes peskro romeskri day. 36Oun kova, kay ap o vavareste rhoyedo hi, djivell leha an leskro kheer khetne.
37Koon kamell peskro dades oun peskri day boudeder har man, hi gar moldo, te vell lo miro maal. Oun koon kamell peskro čaves oun peskri čat boudeder har man, hi gar moldo, te vell lo miro maal.
38Oun koon lell gar peskro troushel ap peste oun djal pal mande, hi gar moldo, te vell lo miro maal.
39Koon kamell peskro djipen te rikrell, kova nashrell les. Koon peskro djipen mange nashrella, kova lell les pale.
Koon t'men an peskro kheer lella, lell man an peskro kheer dren
40Koon t'men an peskro kheer lella, lell man an peskro kheer. Oun kova, kay man an peskro kheer lella, kova lell koles an peskro kheer, kay man bičras.
41Koon i Debleskro rakepaskres an peskro kheer lella, oun krell kova doleske, kay kova o Debleskro lab penella, koles dell o Devel yaake boud bravlepen, har yob peskre rakepangren della. Koon i Debleskro morshes an peskro kheer lella, oun krell kova doleske, kay kova i Debleskro morsh hi, koles dell o Devel yaake boud bravlepen, har yob i Debleskro morshes della.
42Koon della yekes mire malendar i khoro shilo pani te piyell, koles dell o Devel čačepah ko lačepen pale, hoy yob kras.
Currently Selected:
Mateo 10: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
