Louka 6
6
O Yezous hi o ray pral o Debleskro dives
1Ap o Debleskro dives djas o Yezous ap i kotar them, kay o djob bares vas. Oun leskre mala lan ko djob an i vasta, oun kran ko djob pre, te rhan le. 2Kote his ninna Farisarya, kay penan ap lende: “Hoske krenn t'mer ap o Debleskro dives kova, hoy hi gar pal o biboldengro čačepen?”
3Penas o Yezous: “Draveran#6:3 draveran leseran t'mer gar an o Debleskro lab, hoy kras o David oun leskre mala, har yon bokan? 4Yob djas an o Debleskro kheer oun las kol mare, kay kote čiddo hi, oun rhas len peskre malentsa? Pal i biboldengro čačepen his i mare i rashayenge kokres koy.”
5Oun o Yezous penas: “Me, o Mensheskro Čavo, hom ninna o ray pral o Debleskro dives.”
6Oun ap i vavar Debleskro dives djas o Yezous an i biboldengri kangri, te penell lo kote i menshenge o Debleskro lab. Oun yob dikas kote i morshes, koleskro čačo vast his bango. 7I biboldengre čačepangre oun i Farisarya dikan ap o Yezouseste, oun poučan pendar: “Krell lo kava morshes ap o Debleskro dives sasto?”
Yon kaman čomone ap leste pre te anell, te anenn le les nay glan i čačepangre.
8O Yezous hayvas, hoy an lengro shero trouyel djas. Oun yob penas ap ko morsheste, koles i bango vast hi: “Ste pre oun am kay!”
Oun yob stas pre, oun djas pash leste.
9Penas o Yezous ap lende: “Me poučau t'mendar: Nay krah mer lačo koova ap o Debleskro dives pal maro čačepen? Nay krah mer i menshen sasto ap o Debleskro dives? Nay moukah mer len te merell?”
10Oun yob dikas ap kolende, kay troul leste tardo his, oun penas ap kava morsheste: “Sike tiro vast!”
Oun yob sikras peskro vast, oun ko vast vas sasto.
11Koy van yon rhoyedo ap o Yezouseste, oun rakran khetne, hoy yon o Yezouseha nay krans.
O Yezouseskre mala
12His i dives, kay djas o Yezous ap i berga, te rakrell lo o Debleha. Oun yob ačas i tseli rat oun rakras leha. 13Har dives vas, das lo peskre malende gole, oun rodas deesh-te-douyen lendar vin, te venn le leskre bičepangre. 14Oun kolla his: O Simon, – koleste das yob ninna o lab Petro, oun leskro phraal Andreas, o Yakobo, oun o Yohanni, o Filipo, o Bartolomeo, 15o Mateo, o Thomas, o Yakobo, koleskro dad hi o Alfeo, oun o Simon, kay hi kol menshendar, kay kharenna Zelotarya#6:15 I Zelotarya his bibolde, kay kaman i Remaryengre lourden dran o them Israel i zilah vin te vitsrell. 16oun o Youdas Iskariot, ko phoukepaskro.
Boud menshe venna sasto
17Pal kova djas o Yezous lentsa i berga tele. Oun yon van ap i bourhlo kotar them. Koy his boud kolendar khetne, kay leske palla djan, oun ap leste shounan. Ninna boud vavar menshe his kote. Oun kolla van dran o tselo them Youdea oun dran o foro Yerusalem, ninna dran o them, kay i forya Tirus oun Sidon čiddo hi.
18Kolla van lauter, te shounenn le o Yezouses te rakrell, oun kaman sasto te vell. Ninna lauter kolla van sasto, kay his i beng an lende. 19I tsele menshe kaman les an te taprell. I bari zoor vas dran leste, oun kras lauteren sasto.
Koon hi barhtelo
20Oun o Yezous dikas ap peskre malende oun penas:
Barhtele han t'mer čorvele! T'mer djivenna o Debleha khetne an o bolepen oun lenn leskro bravlepen.
21Barhtele han t'mer, kay kanna bokenna. T'mer venna čalo.
Barhtele han t'mer, kay kanna rovenna. T'mer san pale.
22Barhtele han t'mer, te venn i menshe rhoyedo ap t'mende, oun čivenn t'men pale, oun praasenn t'men, oun rakrenn čilačes pral t'mende, oun kova lauter krenn le doleske, te patsenn t'mer ap o Menshengro Čaveste!
23Avenn barhteles ap ko dives, oun khelenn i barhtyatar! O Devel dell t'men i baro bravlepen an o bolepen. Kova, hoy i menshe kanna t'mentsa krenna, kova kran ninna lengre phoure ap o Debleskre rakepangre an o phouro tsiro.
Koon hi bibarhtelo
24Bibarht vell ap t'mende, kay kanna bravelo han. T'mer lenna či bouder.
25Bibarht vell ap t'mende, kay kanna čalo han. T'mer bokenna.
Bibarht vell ap t'mende, kay kanna sana. T'mer rovenna, oun denn gole.
26Bibarht vell ap t'mende, te rakrenn i tsele menshe t'mendar lačes. Kolengre phoure rakran ninna lačes pral i rhorhene rakepangre, kay penan, te van le o Deblestar, oun van gar lestar.
Avenn lačes kolenge, kay hi čilačo ap t'mende!
27T'mer, kay man shounenna, t'menge penaua: Avenn lačes kolenge, kay hi čilačo ap t'mende! Krenn kolenge lačepen, kay hi rhoyedo ap t'mende! 28Penenn kolenge lače laba, kay t'men koshenna! Mangenn o Debles kolenge, kay doukrenn t'men!
29Kova, kay das tout ap yek čam, koleske rike i vavar čam ninna koy, te dell lo tout! Te lell yek toutar tiri plaashka, de les ninna tiro gad!
30De hakenes, kay toutar mangella! Oun te lell yek toutar čomone, hoy tiro hi, ma mang les pale!
31Lauter, hoy t'mer kamenna, te krenn i menshe t'menge, kova krenn t'mer lenge ninna! 32Te venn t'mer lačes kolenge, kay hi lačes ap t'mende, patsenn t'mer, kay sharell t'men o Devel? Na-a! Ninna i čilače hi lačes ap pengre malende. 33Te krenna t'mer kolenge lačepen, kay t'menge lačepen kran, patsenn t'mer, kay sharell t'men o Devel? Na-a! Ninna i čilače krenn kolenge lačepen, kay lenge lačepen kran. 34T'mer te patsenn t'mare love vin ap kolende, kay denn t'men kol love pale, patsenn t'mer, kay sharell t'men o Devel? Na-a, ninna i čilače patsenn pengre love kolenge vin, kay denn len kol love pale.
35Me penau t'menge: Avenn lačes kolenge, kay hi čilačo ap t'mende! Krenn kolenge lačepen! Patsenn t'mare love vin ap kolende, kay t'mer gar djinenna, te lenn t'mer lendar čomone pale! Te krenna t'mer kova lauter, palle dell o Devel t'men peskro bravlepen an o bolepen, oun t'mer venn o baro Debleskre čave. O Devel hi ninna lačes ap kol menshende, kay čilače hi, oun kay parkrenn pen gar pash leste.
36T'men hounte vell hakeneske i baro dji, yaake har o Debles hakeneske i baro dji hi.
Ma sikrenn o goushteha ap o vavareskri doosh
37Ma sikrenn ap o vavareskri doosh! Oun o Devel dikell gar ap t'mari doosh. Ma penenn: Kova hounte lell i phagi! Oun o Devel dell t'men kek phagi. Bistrenn ko čilačepen, hoy i vavar menshe ap t'mende kran. Oun o Devel bistrell ko čilačepen, hoy t'mer kran. 38Denn i menshen lačo koova! Oun o Devel dell t'men lačo koova! Ava, yob dell t'men yaake boud, te hi t'men boudeder har doha. Yob dell t'men yaake boud, te nay lenn kova gar lauter. Doleske penau t'menge: T'mer te denn boud, palle dell o Devel t'men boud. T'mer te denn gar boud, palle dell o Devel t'men gar boud.
39Oun o Yezous penas lenge laba, kay i khatedo čačepen dren hi, oun penas: Te lell yek korelo i vavar koreles ap o vast, palle perenn yon hake douy.
40Yek, kay djal an o sikepaskro kheer, djinell gar boudeder har o sikepaskro. Yob te djinell boud, palle hi lo yaake gosevo har peskro sikepaskro.
41Hoske kameh tou i tikno kasht dran tiro phraleskro yak vin tserdell, oun dikeh gar o baro kasht an tiro yak? 42Tou peneh ap leste: Miro phraal, am kay! Me kamau ko tikno kasht dran tiro yak vin tserdell. Oun tou dikeh gar o baro kasht an tiro yak. Tou rhorheno! Tou kreh, har te vals tou lačeder har yob. Le ko baro kasht dran tiro yak vin, palle nay leh tou ko tikno kasht dran tiro phraleskro yak vin!
I lačo dji hi har i lačo rouk
43Kek lačo phabyengro rouk hidjrella djoungele phabya. Oun kek nasselo rouk hidjrella lačo koova. 44Tou prindjreh nay o rouk ap kova, hoy ap leste baro vella. Ap i soubyengro rouk venna kek fayge baro. Vitar gar venna drake baro ap soubyengre bourra.
45Dran i lačo mensheskro dji vell lačo koova. Dran i čilačo dji vell čilačo koova. I mensho penell kova, hoy an leskro dji dren hi.
O kheer ap o zorelo baro bar
46Hoske penenn t'mer: Ray, ray! ap mande oun krenn gar, hoy me t'menge penaua? 47Koon vell pash mande, oun shounell mire laba, oun krell, hoy me penaua, 48kova hi har i mensho, kay kras peske i kheer. Yob hadas i phoub vin, bis te vas lo ap i zorelo baro bar. Kote čivas yob peskro kheer pre. Oun o baro pani vas, oun kamas ko kheer paash te krell. Oun kova djas gar. Ko kheer his ap o zorelo bar tardo.
49Koon shounell mire laba, oun krell kova gar, hoy me penaua, hi har i mensho, kay kras peskro kheer ap i čik, oun gar ap i zorelo baro bar. Oun o baro pani vas, oun o tselo kheer peras khetne. Oun i bibarht his baro.
Currently Selected:
Louka 6: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
