Matsiyù 9

Yesù mùrùkù kpiri sɔn cɛrɛmabeu min niì

(Marikì 2.1-12; Lukì 5.17-26)

1Àyìwà, Yesù yè dɔ̀n konkoron sɔn doùn tɔ̀un, è yu blàa sèè fuu, è dɔ̀n be e re wɔ̀ rɔ̀n. 2À bèu dzi mɔn, yè kpiri murùkuuma sɔn sen na à re, tɔ ɲɛɔ̀n ɲaange tsɛ. Yesù y'à jàu ci twɛy mòdzin neè ɲɛun wò ra tà tsuru min niì, è dzin mùrùkù kpir'là rà ci: «Maà a duungoo do waa n dzin, wo re gooɲaantsiɛ mɛɛy bou wo vu ra.» 3Tɔ̀un, Sàrìryà Kaamoo reè swey yè dzin e duùn ci: «Nèe Ŋaablà tsoo bar'la dɛ !» 4Yesù yè è duùn naà jàu tà tsuru min niì, è dzin ci: «Feera nèe duungoo ɲaan kaatsi rèe ni ye duùn ? 5Àwà min ye tey ɔ, e dzin ci: "Wo re gooɲaantsiɛ mɛɛy bou wo vu ra", tà ko "Fù e jìì", kɛ̀n ni de dzi twɛy fiɛ̀ ɲàn ? 6Àwà, ye nà à tɔ̀, ci à dzi ni Adamà dziàn nà, è gooɲaantsiɛ mɛɛy bo mòò vu ra dzɔ̀nxɔɔ̀ tsɛ.» Tɔ̀un, Yesù yè dzin mùrùkù kpir'là rà ci: «Fù, a re ɲìnìnkɔ̀ɔ̀n seen gèè sen, e b'à re tsii !» 7Kpir'la yè fù, è dɔ̀n be e re tsii. 8Jàmaà tɔ̀ jàu min niì, yè shi. Yè tsoo dzi ɲɛn Ŋaa tsɛ, kàtsu, à tɔ̀ tsuru dzibaabe siun adamàdzin mòdzin neè rà.

Yesù Matsiyù kiriu min niì à y'à bà e re kàràndzin

(Marikì 2.13-22; Lukì 5.27-32)

9Àyìwà, Yesù bou mɔn tɔ̀un, à dɔ̀n bokɔɔn min sɔn, è xɔnsɔɔntsibaa sɔn tsuuŋma jà xɔnsɔɔntsigbaà doùn, tɔ̀ tsoo Matsiyù. È dzin à ra ci: «A gban n kpɛyn.» Tɔ̀ yeè fù, è gban à kpɛyn. 10#Luk 15.1,2.Àwà, è bè wɔ Matsiyù rè tsii. Tɔ̀un, à tsùuŋmaà ɲwɛɛ̀n nà gbàà doùn, xɔnsɔɔntsibaa giri, ko mòdzin faadzii ɲaan neè giri sa na ni ɲwɛɛ̀n nà à ko e re kàràndzin neè ka. 11Faridziɲɛn rèè tɔ̀ jàu, y'à re kàràndzin neè tey ci: «Feera ye kàrànfaà, ko xɔnsɔɔn tsi reè, ko mòdzin faadzii ɲaan neè yè bà ɲwɛɛ̀n ɲɔɔ̀n esire ?» 12Yesù tɔ̀ myɛ̀un, è dzin ci: «Cɛrɛma reè màgoo na ni janfabaà rà waa, ɲìnìnkɔɔn reè rìì màgoo ni à ra. 13#Mat 12.7; Ukk 6.6.À deò Ŋaablà re Goomaa doùn ci: "sani ye saaka bo mun ne, ye màtsuru. Mun gaa tɔ̀ rii là." Tɔ̀ goomaa dzuɔn nìi dèe, ye bè tɔ̀ gaa tɔ. Nìì reè y'à jàa ye tereòn, mun nà kuàn na twɛy waa. Ŋà, gooɲaantsiɛ ni nìì reè vu ra, mun naɔ̀ twɛy rìì kiri yè tsi.»

Yesù teroun sun goo mà min niì

(Marikì 2.18-22; Lukì 5.33-39)

14Tà doùn, Mòdzìn Jààràfoobaa Yùxanà rè kàràndzin neè yè nà e kpɛrɛ̀ Yesù rà, Y'à tey ci: «Feera ɲe ko Faridziɲɛn rèè sun giri wɔɔ̀, ŋà, wo raa kàràndzin neè na wɔɔ̀ waa ?» 15Yesù yè dzin è ra ci: «Kɔnɲɔn kpir'là ko e dzyeèsi rèè ni dzi ba ni esire à dzyèèsi rèè taama yè ŋununbe o ? Ŋà jisee nàa, nìi doùn, kɔnɲɔn kpir'là nà sen bo è ɲan. Tɔ̀ sii sèè, è nà sun wɔ.

16Mòò pɛn na vya ye ka vya bɔrɔɔ tsyɛɛ̀rɛɛ waa. Tɔ̀ ye fa, yeu riì ka bɔrɔɔ tsyɛ̀ɛ̀rɛɔ̀, tɔ bɔrɔɔ sɔ̀ɔ̀n vyɛ̀ɛ, à vyɛ̀maà si yè tsi. 17Mòò to na dɔ̀ɔ̀ yɛy jia yu vɔrɔ bɔrɔɔ ì doùn waa. Tɔ̀ ye fa, vɔ̀r'leè vyɛ̀ɛ, dɔ̀ɔ̀ yè kon, vɔ̀rɔ̀ goo dòu. Ŋà, dɔ̀ɔ̀ yɛɛ̀ jia vɔ̀rɔ̀ ye ì rìì doùn, tɔ̀un, gèsɔn na boò è pɛn ne waa.»

Tàan sɔn ne tsììnàban dòu min niì, ko Yesù tàànmɛ̀yn sɔn fun kpunaun min niì

(Marikì 5.21-43; Lukì 8.40-56)

18Àwà Yesù ni twɛy gooma reè dèè rà è ra, Dzyèèsìbee mòdzin neè kùntsii sɔn yeè nà, è kunun gban à bììn, è dzin à ra ci: «Mun dzin taan yè e xɔn bou dòonen ɲan, ŋà nà, e nà a si rèè tsùù à tsɛ. Tɔ̀un à nà sèè bà jaama.» 19Tà doùn, Yesù yè fù è gban à kpɛyn, à ko e re kàràndzin neè. 20Tàan sɔn na ni mɔn, tsììnàbaan tɔ̀ byɛɔ̀n, è bè tàrà fɔ jii teeŋ fii. Tɔ̀ yeè e kpɛr'na Yesù bònè, è nà e dzyɛn à re vyaà dziikuan nà. 21Taàn na dziàn e duùn ci: «Min dzyɛunma tàrà à re vyaà bàsɔùn nà, mun nà cɛrɛmabe.» 22Yesù yè e jaa kereu à y'à jà min niì, è dzin ci: «Maà a duungoo do waa n dzin taan, wo ɲɛunmaà mun na tɔ wo cɛrɛmabeu.» Tɔ̀ waatsi rɔn ko e sa, taàn yè cɛrɛmabe. 23Àyìwà Yesù bèu dzi kùntsiɛ̀ rè tsii rɔ̀n, è gwɛ̀yn fyɛ reè jà, tà ko jàmaà, yè bà ni màànkaan nà. 24È dzin ci: «Ye bo mìin ! Tàànmɛ̀yniɛn na saɔn waa, à ciɛ̀ rìì.» Tɔ̀un mòdzian yè jiraàn à mà. 25Jàmaà boumaà shɔ̀ùn da rɔn, Yesù yè dɔ̀n, è tàànmɛ̀yniɛn kun e si ra, à y'à kpunan. 26Tɔ̀ goò goomaa yè dzi jàmaàn min niì sapɛ.

Yesù jaana kpiri fii jaa dzii saun min niì

27Àwà Yesù bou mɔn, à bèkɔɔn jaana kpiri fii yè e gban à kpɛyn, yè dziàn à ra fààn na ci: «Màsà kpiri Dawudà tsua dziàn, màtsuru mùn na.» 28Yesù wɔumaà tsii rɔ̀n, twɛy jaana reè yè e kpɛrɛ̀ à ra. Tɔ̀un, à yè è tey ci: «Ye ɲɛɔ̀n à ra ci mun dzia ye jaa rèè dzii san ɔ ?» È ci à ra ci: «Ɔ̀ɔn Tsìfaà.» 29Yesù yè e dzyɛn è jaa rèè rà tɔ̀un, è dzin ci: «È fa e re a ci ye ɲɛun à ra nìi tsuru.» 30Tɔ̀ nɔ̀nkɔɔrɔn ko e sa, è jaa rèè yè san. Tɔ̀ ɲan à y'à dè màxɔbe è ra ci: «E maà à to mòò pɛn y'à tɔ̀.» 31Ŋà è dziu bo min niì, Yesù nìi fau, yè tɔ̀ goomaa ka jàmaàn sapɛ labo.

Yesù bobo kpiri kweykɔɔn sɔn cɛrɛmabeu min niì

32Àwà, twɛy kpiri fiɛ̀ bokɔɔn y'à wa, yè nà bobo kpiri kweykɔɔn sɔn ka Yesù rè. 33Tɔ̀ kweè kaa boumaà kpir'la kpɛyn, è maa è goomaa. À goò yè ji jàmaà dzii tsɛ, fɔ yè bè dziàn ci: «Nèe tsuru na ja jà Isirayɛli jamaan doùn ŋe fyeu !» 34#Mat 10.25; 12.24; Mar 3.22; Luk 11.15.Ŋà Faridziɲɛn rèè, twɛy na dziàn ci: «Kwey rèè kùntsii blàa rìì baraka ɲan, à kwey rèè kaa boò mòdzian kpɛyn.»

Jàmaà ɲììɲii Yesù kuun min niì

(Marikì 6.34; Lukì 10.2)

35 # Mat 4.23; Mar 1.39; Luk 4.44. Yesù na tsyeere beè wɔ̀ blà bla reè ko wɛ̀ɛ̀rìì reè sapɛ doùn, è mòdzian kàràn beè è re ŋaablabegba rèè doùn. À Ŋaablà re Màsàbee kùnàgoo dziɔ̀ dè beè, è mòdzian rè ɲìn'nèè kuan sapɛ cɛrɛmabeè, ko è byɛnma rèè sapɛ. 36#Dɛk 27.17; Mak1 22.17; Mbk2 18.16; Ezk 34.5; Mar 6.34.Àwà Yesù jaadzin ɲɛun jàmaà mà, è ɲììɲii y'à kun. È ɲììɲii y'à kuun, kàtsu è na byɛɔ̀n, è gɔn yè bà vuɔ̀ a ci sàà kuru, kplatsuubaa na ni nìì reè rà waa. 37#Luk 10.2.Tɔ̀un è dzin e re kàràndzin neè rà ci: «Shìmaan gaaramaà giri, ŋà faagoo fa reè dzyɛ̀n. 38Ye dzùtsià màfyɛ̀n, è faagoo fa reè tɛ̀y gaa be dzù rɔ̀n, y'à re shìmaan gaa.»

Currently Selected:

Matsiyù 9: BDZU

Highlight

Copy