Matsiyù 10

Yesù nìì reè bou, à yè è bà e re kɛɛradzin ì

(Marikì 3.13-19; Lukì 6.12-16)

1Àyìwà Yesù yè e re kàràndzin teeŋ fiɛ̀ dzyèèmaa kiri tɔ̀un, è dzi sin è ra, nìi dzia à to, yè kwey rèè kaa bo mòdzian kpɛyn, yè ɲìn'nà kaatsià sapɛ cɛrɛmabe, ko mòdzian byɛɛn goò sapɛ. 2Twɛy mòkun teeŋ fii nìì reè kiriu kɛɛradzin neè, twɛy tsoo rèè rìì siin nèe: jɔ̀naà tsoo Shimɔ̀n, à tsoò sɔn, ci Piyɛrì. Tɔ̀ raa tseyn nìi tsoo Andère, tɔ̀ yeè gban. Zhebedè dzin kpiri Yàkubà ko Yùxanà yè gban. 3Tà shɔ̀ùn Fìlipù yè gban, ko Batelemin, ko Tomà, ko Matsiyù, tɔ xɔnsɔɔntsibaa, ko Àlifù raa dzin kpiri Yàkubà, ko Tadè, 4ko Shimɔ̀n, fàtsiɛ kùùnkààfabaà. Yudasì Sikariyɔtsì yè ɲɛn twɛy dzyèèmaa tsɛ, tɔ̀ riì nàu bà Yesù jàànfabaà.

Yesù yè e re kàràndzin neè kau vu nìi ka

(Marikì 6.7-13; Lukì 9.1-6)

5Yesù twɛy mòkun teeŋ fiɛ̀ rìì kau, è bà nèe goo rèe rèè dè wɔɔ è suun, nìì reè yɛ ci: «Nìì reè na Dzyèèsìbee mòdzin ì waa, e maà bè twɛy kpàkèrè waa. E to mà dɔ̀n Samarika reè raa wɔ̀ rèè pɛn tsu doùn waa. 6Ye bè Isirayɛlidzin neè rìì kpàkèrè, twɛy nìì reè ni a ci sàà fìriuma ì. 7E bekɔɔn, y'a gbango fa beè, ci Ŋaablà re Màsàbee fa waatsi tsyɛnbeò. 8Ye ɲìnìnkɔɔn reè cɛrɛmabe, ye fùn nèè kpunan bo saàn ɲàn, ye byèèma reè cɛrɛmabe, yè fɛnɛbe, ye kwey rèè kaa bo mòdzian kpɛyn. Y'a tàrau maana, y'a sìn maana. 9Jìɛ̀ doùn, e maà sɛnu ji e kuùn, e maà warifyɛ ji e kuùn, arì ɲɛynii, e maà tɔ̀ tsu sen waa. 10#Kor1 9.14; Tsim1 5.18.E maà jìì faa bɔ̀tɛ sen, e maà mɛ̀yɛ̀ dzin fii sen, e maà seereyn ì sen, e maà kɔ̀n sen. Àwà faagoofadzian wù e ɲwɛyn dziɛ ka. 11Ye be dɔ̀n wɔ̀ blà ge o ge, tàmafa wɛ̀ɛ̀rìì ge o ge doùn, ye tɔɔnsi wuu gaa, ye e jaà tɔ̀ re. Ye to mɔn, fɔ è bè suu e beè dzu. 12E dɔnkɔɔn fɔɔn doùn, ye tswɛ̀y fa, ye jaanciàn dzwɛ ji. 13Tɔ̀ fɔɔn ye ba wù jaancin ka, arì she, e re dzwɛɛ̀ yè kun è mà. À to ma ba wù jaancin ka, e re dzwɛɛ̀ yè sèè e ma. 14#Kɛf 13.51.Mòò ma e tsiì è ye ladɔn fɔɔn o fɔɔn doùn, tàmafa wɔ̀ o wɔ doùn, è to mà e toro wɔ ye re gooma reè rè waa, e bokɔɔn tɔ̀ fɔɔn rè, tàmafa tɔ̀ wɔ̀ɔ̀ doùn, ye e san nà kpankpaàn ban ji to mɔn. 15#Mat 11.24; Gok 19.24-28.#Luk 10.4-12.Sààben na, mun nì ci e ra, tsìɛ̀ sii sèè, Sodomùn ko Gomɔrɔ̀n wɔ̀ùndzin neè kuun'n kur'la nà fyanbe è geren tɔ̀ wɔ̀ɔ̀ mòdzin neè raà tsɛ.»

16 # Luk 10.3. Tà shɔ̀ùn, Yesù yè dzin kɔn ci: «À siin, mun ye ka bèe a ci saa ì, kparan ì fi. Tà doùn ye e yɛrɛ kun a ci myɛn ì, ye bà fyɛɔ a ci màsàkere ì. 17#Mar 13.9-11; Luk 12.11,12; 21.12-15.Àwà ye e yɛrɛ kaàwɔ mòdzian nà, kàtsu è nà ye wɔ kitsi kunun kuru ì mòdzin ì suun, è to nà ye dɔrɔ e re ŋaablabegba rèè doùn. 18Mun kamà, è nà bè ye ka jàmààntsi ì ko màsa ì rè, ye yè bà ni kitsi. Tɔ̀ saabu ɲan, ye nà mun shɛɛrɛbe fa è ko kun kpɛrɛ mòdzin neè rè. 19È ye e wɔ è suun waatsi riì bwèy, ye nà nìi dè, tà ko ye nà à dè dèù'n kur'liì rà, e maà tɔ̀ ka e vyɛɛ̀y waa. Nìi wù è dè, tɔ nà wɔ ye dzu tɔ̀ waatsia yɛ̀r'la ɲàn. 20Àwà, à fa bà ye goomakɔɔn waa, ŋà à nà bà ye Fà Ŋaablà re Dzia rìì goomakɔɔn ye ɲan. 21#Mar 13.12; Luk 21.16.Keresi nà e keresi wɔ mòdzin ì suun y'à vu, fà yè e dzin wɔ mòdzin ì suun y'à vu. Dzin ì yè fù e fa ì kpɛyn, y'à to yè vu. 22#Mat 24.9; Mar 13.13; Luk 21.17; Mat 24.13; Mar 13.13.Mun tsoò kamà, ye goo nà xɔbe mòdzian sapɛ ma. Ŋà mòò riì sàn gbaunma nà to è bè suu fɔ à lataan dzu, tɔ nà tsi. 23Àwà, yè byɛnbee shì e ra nèe wɔ̀ rèe ɲan, ye vwɛ̀yn be nèe ɲan. Sààben na, mun nì ci e ra, sani ye yè Isirayɛli jamaan wɔ̀ rèè sapɛ dzii tsi dò, Adamà dziàn nà sèè na.

24 # Luk 6.40; Yux 13.16; 15.20. Àwà kàràndzian na ni e karànfaà kùùn waa, jòòn to na ni e tsifaà kùùn waa. 25#Mat 9.34; 12.24; Mar 3.22; Luk 11.15.Kàràndzian dààn nì yɛ è bà e karànfaà tsuru, jòòn dààn yè bà yɛ, è bà e tsifaà tsuru. Yè ba gbàtsià kir'là ci Baalizebulì, kwey rèè kùntsii blàa, à re gbàdòùndzin neè raà fa ɲanbe fyeu ɔ ?

26 # Mar 4.22; Luk 8.17. Tà doùn, e maà shi è jɔun waa, kàtsu goo o goo mɛnɛɔn, à sapɛ nà bo da. Goo o goo to gòndo, à sapɛ nà tɔ̀. 27Àwà mun nìi dèe e ra tsitsiɛ̀ dzuun, y'a dè bo bwèy rɔ̀n. È to nìi ŋùnùnŋun'na e tor'le, ye tɔ̀ gbango gbàma reè tsɛ. 28Nìì reè dzia mòò vu, yè dàn gɔɔ̀n bàsɔùn bar'la mà, è to na dzia gèsɔn fa xɔɔn nà waa, e maà shi twɛy jɔun waa. Ŋà, nìi dzia gɔɔ̀n ko xɔɔn sa bara jààndamaan doùn, ye shi tɔ̀ rii jɔun.

29Kɛ̀ynììn fii na gɔɔ̀ tanma soo ɔ ? Ŋà, è soo na mɛɛ̀ dzɔ̀nxɔɔ̀ tsɛ fyeu, ye Fà Ŋaablà tɔ mà bà ni à ɲan waa. 30Nìi ye, arì ye kùngwɛ̀yn neè, twɛy sa daɔn rìì, è dzii yè tɔ̀. 31Tɔ̀ doùn, e maà shi waa, kàtsu nàfa ni ye ɲan, è geren twɛy kɛ̀ynììn neè kuru blaa tsɛ.

32Àwà mòò o moò ye e tsiì è dzin mòdzian jaa ra ci wo mun naa, mun sa nà n tsiì, min dzin n Fa Ŋaablà jaa ra, tɔ̀ riì ni jìrànxɔ rɔ̀n, ci mun tɔ̀ tsìfa raa. 33#Tsim2 2.12.Mòò riì to nà e nɔn mun ne mòdzian jaa ra, mun sa nà dzin n Fa Ŋaablà jaa ra, tɔ̀ riì ni jìrànxɔ rɔ̀n, ci mun na tɔ̀ tsìfa tɔ̀ waa.»

34Yesù yè geren goomaa ka ci: «E maà à siin ci mun naɔ̀ jaancin nì ji dzɔ̀nxɔɔ̀ tsɛ dɛ ! Mun na naɔ̀ jaancin ji waa, fɔ kaà. 35#Mik 7.6.Mun naɔ̀ nì, min nà dzin kpir'la ko e faà fi vyɛ, min dzin taan ko e naà fi vyɛ, min dzinaa ko e daànaà fi vyɛ. 36Mòdzian rè tsii dzin neè yɛ̀r'la rìì nà bà à ɲan ì.

37Mòò riì yè e naà tàmafa e faà dzibee e ra è geren mun tsɛ, tɔ̀ na dzia bà mun ne kàràndzin waa. Mòò riì to yè e dzin kpir'la tàmafa e dzin taan dzibee e ra è geren mun tsɛ, tɔ̀ na dzia bà mun ne kàràndzin waa. 38#Mat 16.24; Mar 8.34; Luk 9.23.Àwà, mòò riì ma e gbaàn gɔɔ̀ sen è gban mun kpɛyn fyeu, tɔ̀ na kakan mun ka waa. 39#Mat 16.25; Mar 8.35; Luk 9.24; 17.33; Yux 12.25.Wo mòò riì ci wo sɔ̀ɔn a xɔɔn kpɛyn, wo nà fɔn à ɲan. Wo mòò riì to nà fɔn a xɔn nɔn mun kamà, wo nà à sèè tàrà.»

40 # Luk 10.16; Yux 13.20; Mar 9.37; Luk 9.48. Àwà Yesù yè dzin kɔn ci: «Mòò o moò ye kuun'n kuru wubee, tɔ mun nì kuun'n kuru wubeu. Mòò o moò to ye mun kuun'n kuru wube, tɔ mun kabaà rìì kuun'n kuru wubeu. 41Mòò riì ye kɛɛra ladɔ̀n kàtsu à kɛɛra, tɔ nà kɛɛraa raa bàràjia tsuru tàrà. Mòò riì to ye mòdzin tereonma ladɔn kàtsu à mòdzin tereonma, tɔ nà tɔ̀ raa bàràjia tsuru tàrà. 42Àwà, mòò o moò rìì ye arì yukuun jaa soo yu cin sìn nèe dziin nèe rèè sɔn na, kàtsu à mun ne kàràndzin, sààben na, mun nì ci e ra, tɔ̀ tsìfa fa fɔn tɔ̀ bàràjia ɲàn fyeu.»

Currently Selected:

Matsiyù 10: BDZU

Highlight

Copy