ZEKHARIA 8
8
Yerusalem ri Doem So' Zhug wa Aseing Dangsoo" Joem
1Yoem: moo" bo da" Aseing da" he: mungdang: gi Zekharia jang" moo ju" loo bye:. 2Ngoo gi Yerusalem mo byumyu" yiri gye" jheddab yoomo nyangnu" ri pang" thoug nyid wigi nyangnu" da" gyivoo yiri gye" nheig yoo: noug bye:. 3Ngoo gi nga" younglho' voomoo" khyoo: doem tau" lo lho: houg: moo nyid nyid wa zi nghoid. Hau: voomoo" gi dang: zung" voo yo' yoem: moo" bo Aseing da" bouggung gi gyeung" shang: da" bouggung ga: myheing byid: zi shoug" wa nghoid. 4Phoug" mang: phyid" mang: yi mang: lho: lhamdung: thug ca" bye: bang: we' so" yen" lho: hau: voomoo" mo khyoo: yam cang doem lo zhung: jo, boem wa nghoid. 5Hau: lho: khyoo: cang gi zooshang: yi byeung" sho' lhu: ei" lo boem wa zi nghoid.
6Deing nyid shi" da" mung" byu yigi «Hidsu" gi ayo" bui" loo: ga: myid nyid boem nghoid loug we' ngoo ayo" zei: bui" wa khyoo: ci: we' aboo. 7Nyangnu" ri shu" byo sain" loo" shau" da" mungdain joem mo nga" mung" byu yiri ngoo khyoid yu shi" wa zi nghoid lho: 8Ngoo gi nyangnu" ri Yerusalem moo nyid nhang: wa shid re" bid thu bidvang khyo" wigi doem shu" tau" loo wa nghoid. Nyangnu" gi nga" byu yi bue" loo wa wigi ngoo we' nyangnu" ri deungmain" nyeung veung" ngheig loem: khyo" - vhoebkhang" nyid wa da" Mangsoo bue" loo wa zi nghoid.
9Yoem: moo" bo da" Aseing Mangsoo gi hidsu" ga: tid nyid shi". Nga" younglho' yhoem: moo" doem so' koid wa shid re" ayang: qei" da" bidnyid moo lapi: yi tid to" da" mungdang: ri akhid" nanu" we' shau" gyo: nyid bye:. Nanu" gi yoem: bo lho: seing" yang" nyid we'. 10Hau: ayo, aju" shi" uri gi Byu lang: jhang we' gougnyhoug vhukung: we' ayo" lhung: loo nya: gyivoo joem yoomo gau: nyu: khyoo: hang" we' ayoo". Ngoo gi nyangnu" nyang: cang" ri zain: goo" nhang: bye:. 11Nghoid loug we' akhid" ngoo gi deung nyid shi" da" mung" byu hid: bang: rigi shid phyang" mo bang: ri yhang: ti" gi akoid nyid loo: wa ga: wigi yoem: moo" bo da" Aseing gi tid nyid. 12Nyangnu" gi nyangnu" da" shivoo: joem ri voin: tang: za: yo" yham" yu boem wa zi nghoid. Nyangnu" da" zabyid nei joem gi ashi" myoo" sho' zei: lho: myid jang mo shivoo: shiloem joem ri yug loo nhang: wigi houg: moo agoin ayu: moug: ri voo byid: loo wa zi nghoid. Nyid deing da" nya: byumyu" mung" byu yiri ngoo gi he: da" agyid asoo: joem dangain" byid: loo wa zi nghoid. 13Yuda yi yo' Israela yi we"- shid phyang" tungbau byumyu" yi yo' shoug" go" uri dayug yo' dayug nheing" go" uri Israela yo' Yuda byumyu" yi yhang: ti" nang yau: khe" kyi" khyeug baja" ga: tid lo yu" bye:. Nghoid loug we' ngoo gi nanu" ri khyoid khyi: yu yu" bye: yoomo hau: tungbau byumyu" yigi nyangnu" nyang: cang nang gi Yuda yo' Israela byumyu" yi yhang: ti" agyid asoo: yoo" mo, bue" loo baja" ga: tid go" lo boem wa. Houg: yoomo nanu" agyug goo"- seing" yang" yang" danyid ge'» ga: tid.
14Myhang: thang da" Aseing gi hidsu" ga: tid nyid shi" «Nanu" da" phoug" phyid" yigi ngoo ri nheig yo: loo nhang: da" uri nyangnu" ri ngoo yau: khi" kyi" khyeug bui" nhang: bye: zi yo' ngoo gi nga" nheigloem: athid. 15Nghoid loug we' akhid" ngoo gi Yerusalem yo' Yuda bi" ri mainkaid byid: wa shid re" myid phyed too" bye:. Houg: yoomo nanu" agyoug nyid loo: goo". 16Nanu" koid wa zigi hidsu" nghoid. Nanu" nyang: cang" deingmain" da" dang: ri tid go" nyid we'. Nanu" da" tarha" yung" moo: we' deingmain" khyo" dang: ri phyed byid: we'. Hau: zigi myenjham" khyoo: ri bue" loo nhang: wa zi nghoid nyid. 17Nanu" nyang: cang" noo nhang: goo" wa khyo" phajhi" akhyoug" go". Jham' tang: lho: mhau' da" sagse: ri akham go". Ngoo gi mhau' zi adeingmain" zi pyi: sho: da" khyoo: yo' athoug" akhyoug: koid da" moo" ri ngheing" nyid» ga: tid. 18Houg: lho: Yoem: moo" bo da" Aseing gi ngoo ri hidsu" ga: tid nyid shi". 19«Lhammoo" myid: khyab wim: khyab nyhed khyab yo' xi: khyab ein: wa lhoo' khyab joem moo zoo: noem zeing: ayo, moo: gi Yuda byu yi shid re" gau yi ziyo' ngei pyo: da" pui" bidnyid bue" loo wa zi nghoid. Houg: yoomo nanu" gi deingmain" ziyo' myenjham" khyoo: ri vho: ngei ca"» ga: tid. 20Yoem: moo" bo da" Aseing gi hidsu" ga: tid shi" «Voomoo" thoem" moo" myoo" sho mo wigi Yerusalem voomoo" khyoo: byu myoo" sho' zeung: loo wa da" bidnyid ju" lo nyid bye:. 21Hau: voomoo" davoo mo byu yigi gootu: voomoo" davoo khyoo: yhe: lho: nyhang" gi yoem: moo" bo da" Aseing ri yhe: coung" pid, lho: nya: jang" mo agyid asoo: mho' yu boem shang. Ngoonu" dage" yhi: shang» ga: tid go" lo boem wa nghoid. 22Meing: byu myoo" sho' bang: yo' yoem: boo so, bo da" byumyu" yi we' Yerusalem moo: yoem: moo" bo da" Aseing ri coung" pid lo boem lho: agyid asoo: mho' lo boem wa nghoid. 23Hau: da" bidnyid moo tungbau byumyu" daxi: yug gi Yuda byu dayug thang: moo re" lho: Mangsoo nanu" yo' nyid ziri ngoonu" shoug" gyoo: bye: yoomo ngoonu" we' nanu" da" vhu" pi: lo, kyo' khoug: moo bo nyid nau› ga: tid lo boem wa ga: yoem: moo" bo da" Aseing tid.
Currently Selected:
ZEKHARIA 8: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
