ZEKHARIA 9
9
Yoem: Kyoo" Cang" Mungdain: yi Tho' moo Dang: Phyed da" Khyoo:
1He: zigi Aseing da" pang shug da" mungdang: nghoid.
Aseing gi Hadrag yo' Damasku ri dang: phyed wa zi myid phyed too" bye:. Israela byumyu" yi za: anghoid. Suri voomoo" ri we' Aseing seung: nyid zi nghoid. 2Hadrag yo' mougkyoo" xo' go" to" da" Hamad voo we' nya: shid re" nghoid. Turu yo' Sidon voomoo" moo nyid da" cang: joeb phajhi" si' mo, dangain" ri we' seung: nyid da:. 3Turu gi nya: shid re" gyidab daloem: ri zhug lho: ngei yo' sheing: gi myidzhoo" phei" su" shoin" zhug to". 4Nghoid loug we' Aseing gi nyang: yoo" mayoo" dangain" ri shoem" yoeb pyam' wa zi nghoid. Nammugdara khyoo: nya: jonu" ziyoo joem ri du" khyo' pyam' lho: voomoo" gi myid jang moo nghe' jhoem" tab pyam' zi shau" loo wa nghoid.
5Hau: ziri Ashkelon voo bang: myang wigi gyoug boem wa. Gaza: mung" bang: myang ri we' nain" nyid boem wa nghoid. Houg: yoomo Ekron voomoo" gi nya: nheig byu jang: ci: phyug pyam' zi shoug" wa nghoid. Gaza: khokham phoo we' joem: loo" wa zi nghoid- Ashkelon voo we' joem: thang loo" wa zi nghoid. 6Ashdod voomoo" we' byupyeug damyu" nyid thu loo wa. Aseing tid zigi «Nghoid boin: da" Philisti byu yi dangain" ri ngoo gi nyhoem: gyo" loo" nhang: wa zi nghoid. 7Nyangnu" gi deung nyid da" byu yi we' Mangsoo seung: wigi Yuda byu yhang: ti" bue" loo wa nghoid. Ekron gi Yebusi yang: ti" bue" loo wa. 8Ngoo gi nga" mungdain: ri lhoug zung" nyid wigi cenoem gyiphung: yi we' ayo" lid loo". Nya: mung" byu yiri shen" yhen doin: zeig nyid ziri ngoo khanham we' akhang" byid: wa zi anghoid. Ciwim gari akhid" mo wigi nga" byu yiri yhe: zung" yu" nyid wa.
Ju" Loo Wa Ayo, mo Khokham
9Ziun mung" byu yi we" gye" gau yi ngei bu: nyid ge'.
Yerusalem bang: we" yoid nyho: loo ngei bu we'.
Yu" we'- re" da" khokham phoo gi re" jang" moo ju" re" da:.
Nyang: gi ung: pui" oung: myug ziyo' ju" re".
Nghoid loug we' nyang: gi nu" nham' lho: loo zei: tho' moo zhung: wigi re" bye:.
Nghoid- Loo zei: nu" dadu: atho' moo zhung: lho: wigi re" da:.
10 Aseing gi hidsu" ga: tid
«Ngoo gi Israela yi da" gyimyang: rheing" ri yu pyam' byid: wa nghoid.
Yerusalem mo gyi zain: myang: joem ri we' shoem" pyam' byid: wa.
Gyipui" moo ci: da" lo, lid: joem ri we' khyau" pyam' byid: wa nghoid.
Nyangnu" da" khokham ri ngoo gi byumyu" yi veing" go" da" lu dang: ri tid fu" loo" nhang: wa.
Nyang: gi panglai: dathoem" mo zi thei: dathoem" khyoo: ju" sho'
Uphrad gyid lang mo wigi mougmyid thang sho' moo vhoeb wa nghoid» ga: tid.
Mangso Byumyu" yi Doem Nyid Yab ge Lo Khyoo:
11Hau: lho:Aseing Mangsoo gi
«Ngoo gi nanu" yo' dang: thang" cab' koid to" da" suid" yoomo
nanu" mo wigi pyoung" lo" zi shoug" mo, ri
Ngoo gi gyid ajo, gyoin: yhang: te" pyoung" shu" to" joyoo mo
nanu" lhoid pyoin kaid wa nghoid.
12Nheig byu joyoo yoo" mo, ri oung: lo" gyidab moo doem tau" loo ge'
nanu" da" goem loem joyoo khyoo: doem tau" loo ge'
akhid" nyid" nanu" ri ngoo tid kyoo" wa
Ngoo gi nanu" da" sho" jhen: yau: khi" tho' moo eig zhang
agyid asoo: doem xab byid: wa nghoid.
13Yuda rigi gyizoo: pho lo, lid: yo' dakhyoo" ti"
Israela rigi myoo: khaid joem yo' dakhyoo" ti" ngoo ci: wa nghoid.
Ziun rigi shamcoin" yo' akhyoo" ti" ci: lho:
Greek byumyu" yiri gyi zain: wa» ga: tid.
14Hau: uri Aseing gi nya: byumyu" tho' moo thu shug wa zi nghoid.
Nya: myoo: kaid joem gi lhab' myheug yhang: ti" thu loo" khari" wa
Aseing Mangsoo gi laboo" moid kaid wigi
mougpyi: uglid zoo" yo' dage" gyi jen" jen" do, to' loo wa zi nghoid.
15Yoem: moo" bo da" Aseing Mangsoo gi nya: mung" byu yiri goem loem byid: nyid yoomo
nyangnu" gi gyivoo joem ri yo" phyo' pyam' boem wa zi nghoid.
Nyangnu" gi yhid: yed mo, yhang: ti"
meing: zain: jang: moo nyho: lo wigi nyangnu" da" gyivoo joem da" suid" ri
jarung: mo phoin: khyoo: foid sain" da" xoin" du: suid" yhang: ti"
gyivoo joem da" suid" yau loo" wa nghoid.
16Hau: da" bidnyid ju" lo uri yang zung" su: gi nya: yang phung: ri gyoug pho" jang" mo
khyoid yu yhang: ti" Aseing gi nya: byumyu" yiri khyoid yu wa nghoid.
Nyangnu" gi bidmug mo lug nyoug joem yhang: ti" nyangnu" da" mougmyid moo
lo, lo, bang nyid boem wa zi nghoid.
17Nyangnu" mung" gi gye" ge ziyo' yu" yung" zi bue" loo wa.
vedyam" yi gi hau: moug: mo thu da" shivoo: shiloem yo' zabyid yhid: ri zo: shug wigi yoem: bo gyi: sheung: loo wa zi nghoid.
Currently Selected:
ZEKHARIA 9: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
