1 TIMOTHI 2
2
Phung: Mo Noku Loem, Khau: Da" Khyoo:
1Hougsu" nghoid yoomo dangain" mo, da" shid' moo-byu bain' sho' bang: da" shid' re" Mangso jang" moo akyu" mho' xo' byid: da" khyoo:- mho' tung" bain: byid: da" khyoo: joem yo' jeju" ri coung" byid: da" khyoo: dakoid nyid boem wa shid re" doin: nyheun" yoem: byid: kaid. 2Ngoonu" gi Mangsoo ri gyoug phau" khyoo: moo goolho: za: cang lo" wigi ge, da" young" du, du asam" avoid, bo lho: ngei pyoo: myen, jham" za: kangso' yo" dei nyid goo" baja"- Kho: kham yi yo' amyeing" akhang" ci: bang: dangain" shid re" akyu" mho' nyid ge'. 3He: moozoo" gi ge, da" moozoo" nghoid wigi yha" da" khyoid yu Mangsoo ri vho: ngei nhang: da" khyoo: nghoid. 4Nyang: gi byu dangain" mo, khyoid yu zi shau" lho: hau: deingmain" da" khyoo: ri se' loo wa shid re" vho: ngei nyid khyoo: nghoid. 5Khasu" wim ga: ri Mangsoo gi dayug za: danghoid ziyo' byu yi ri tid nyheing tid feing" byid: su:- xang: su: byu re" bue" da" Khristu Yesu ein: zi we' dayug kyeing" danghoid. 6Nyang: gi byumyu" bain' sho' mo, ri khyoid yu wa shid re" nya: gung du: ri nyang: ab, byid: pyam' bye. Hau: zigi ayo, ju" lang" ngoonu" byu xangsu yug khang" moo" ri khyoid yu nau da" sag si: toin" shid' to" zi nghoid. 7Hougsu" nghoid yoomo Aseing: gi ngori lagyoo: dayug khyo" we' tung: bau byu yi da" jhoug" byid: sara: dayug khyo" we' hau: loem" jeung" da" khyoo: yo' deingmain" da" mungdang: ri kho" kyoo" wa shid re" nhang: kaid' zi shau" bye. Ngoo mhau' tid zi anghoid- deingmain" da" dang: ri tid nyid.
8Phung: mo mo, da" akyu" mho' ayo, khang" moo" moo yug gi yi ri akyu" mho' nhang: nau- Mangso jhang khyoo: mho' ab, xoin" to' byid: da" yug gi yi gi nheig yoo: go" zi ngeung byo, go" zi aboo loo: za: gyeungshang: da" lo, ri tu: lho: akyu" mho' nyid goo" baja". 9Myi: yi: zoo: yi gi avoid' ge, sam" dab, nu" nham, ziyo' nyangnu" da" void, mi void byi: void, da" khyoo: moo young" du, phoug" dab, tung" void, ci: nhang: nau. Xam: ri vhuzung zung khyo" xam: zeig zeug lho: lhoo, yhoung" khyo" ngei sheing: Palhe" tab- hougsu" anghoid lang" gi atho' tid loo sho' phoug" dab, da" byimi yo' lhoo, yhoung khyo" anghoid loo: za: 10Loem, khau: khyoo: moo goolhoo: za: cang lo" da" myiyi: zooyi lhoo, yhung eung: da" ziyo' dakhyoo" ti"- yu" du, yu" ge, da" asam" avoid, yo' nyang: nya: gung ri lhoo, yhoung nyid goo" baja". 11Myiyi: zoo: yi gi nheigloem: khyo, nyhoem: ziyo' myen, myenjham" jham" jhau" mho' khyoo: ri kham: yu nyid goo" baja". 12Jhoug" byid: mhoo, byid: wa ziyo' yug gi yi da" atho' moo amyeing" ci: lho jhau" mhoo, byid: nyid wa shid re" vhoeb, khang" nyid wa da" khyoo: myiyi: zoo: yi ri ngoo akhang" abyid- nyangnu" gi sam" zoo: tam" too" goo" baja". 13Khasu" wim ga: ri Mangsoo gi Adam: ri xang shed" phain" to" lho: thang: ri she, Eva, ri daphain" to. 14Satan wigi mhau' mhoid" jhu, phyo' zi shau" su: gi Adam: anghoid- myiyi: zoo: she, mhau' mhoid" jhu, phyo' zi shau" wigi Mangso da" tarha" ri peug rhue, pyam' bye. 15Nghoid loug we' myiyi: zoo: gi asam" a void, ge lho: loem" jeung" khyoo: jheddab khyoo: moo gyeungshang: khyoo: moo xo' lho: yoem: kaid' lo nghoid rigi myiyi: gi zoo: ri khu: kaid' su: nghoid yoomo nyang: gi khyoid yu zi shau" wa nghoid.
Currently Selected:
1 TIMOTHI 2: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
