ZEKHARIAH 9
9
Kiangkap Miphun Parih Thuṭhennak
1Himi cu Bawipa ih ṭongkam a si:
Hadrak ram le Damaskas khawpi hrem dingah amah in a ruat cat zo. Israel miphun pawl lawng si loin Siria ram khawpi khal Bawipa ih ta a si. 2Hadrak ramri ih a ummi Hamath khua tla amah ih ta a si ih cuvek ṭhiamṭhiam in ṭai-ar khua le Sidon khua pawl tla an thilthiamnak thawn Bawipa ih ta an si ṭheh. 3Ṭai-ar khua cun amah ih hrangah ralhruang nasa zetin a tuah ciamco ih tlunah sui le ngun tamzet a khawl ih a tamtuk ah hnawmhne bangtuk ah a cang. 4Asinain Bawipa cun ṭai-ar khua ih a neihmi hmuahhmuah cu a laksak ṭheh ding. A lennak hmuahhmuah cu tifinriat sungah a hlonsak ding ih a cuih khua cu meisa in ur ziam a si ding.
5Cumi cu Ashkelon khua in a hmu ding ih a phang ding. Gaza khal in a hmu ding ih a tuarzet ding. Cuvek thotho in Ekron khua khal in a hmu ding ih ruahsannak a neihmi hmuahhmuah a hloral ṭheh ding. Gaza siangpahrang khal a hloral ding ih Ashkelon cu a ṭhing reprep ding. 6Ashdod khua ah miphun za-rawi an um ding. Bawipa in “Hi a puarthau zetmi Filistin mi pawl cu nau ko in ka ṭhum ding. 7Thisen thawn sa cu an ei nawn lo ding; khammi rawl khal an ei nawn lo ding. A taangsun pawl cu ka miphun ah an tel ve ding ih Judah phun sungah phunkhat vek an si ding. Jebus mi pawl bangtuk in Ekron khal ka miphun ah a cang ding. 8Ka ram cu ka kilveng dingih a sungin zo ralkap pawl hman an feh thei lo ding. Zaangfah neilo ram uktu zohman in ka miphun an hrem nawn lo ding. Ka minung pawl ih tuarzia ka hmu ṭheh zo,” a ti.
A Ra dingmi Siangpahrang
9Nan lungawi uh, Zion mi pawl,
nan lungawi uh!
Lungawi in au ciamco uh,
Jerusalem mi pawl!
Zoh uh, nan siangpahrang a ra lai!
Nehtu a si ih nehnak thawn a ra;
Asinain lungnemmi a si ih
laak parin a ra;
Laak note, laakpi ih faate to in
a ra a si.
10Bawipa in, “Israel ram ihsin
raldonak rangleng ka hlon ding;
Jerusalem ihsin raldonak rang
pawl ka lak sak ding ih,
Raldonak likhuk pawl cu
ka siatsuah ṭheh ding.
Nan siangpahrang in mi phunkip
pawl thawn daihnak le remnak
a tuah ding.
Khatlam tifinriat in khatlam
tifinriat tiang a uk ding.
Eufrates tivapi ihsin vanrang deng
tiang a uk ding,” a ti.
Pathian Ih Minung Pawl Kirsalnak
11 Bawipa in, “Raithawinak thisen
thawn hngettermi nan hnen ih
ka thukamnak vekin,
Nan minung pawl cu ka luatter ding;
Saltaannak tidai um lo khur sung
ihsin ka luatter ding a si.
12Kir sal uh, ruahsannak neitu
saltaang pawl!
Himnak hmun nan ram ah tlung uh;
Atu-ah ka lo sim: harnak nan
tuarmi ruangah a let hnih in
thlawsuahnak ka lo pe ding.
13Judah cu ralkap ih li vekin ka
hmang ding,
Israel cu conkiang vekin ka
hmang ding,
Zion mi pawl cu ralnam vekin ka
hmang ding,
Grik mi pawl do dingah,” a ti.
14 Bawipa cu a minung pawl tlunah
a lang ding,
A thal pawl nimthlakau vekin
a sai ding.
Cungnungbik Bawipa in
a tawtawrawt a tum ding;
Thlanglam thlipi sungin
a feh ding.
15Cungnungbik Bawipa in a minung
pawl a hum ding.
An ral pawl an siatsuah ṭheh ding,
Lungherh deengtu pawl an palcih ding;
Raldonak ah zuri bangin an au
ciamco ding ih,
An ral pawl ih thisen an
suahter ding.
Cuih thisen cu biakṭheng ih
a ummi kheng sung ihsin
an thletmi thawinak thisen vekin
a luang ding.
16Cuih ni a kim tikah tuukhal in
a tuurual ṭihphannak sungin
a hum vekin,
Bawipa in a minung pawl
a hum ding;
Suilukhuh parih lungvar vekin,
A ram sungah cun an tleu ding.
17Ziangtluk ram ṭha le ram mawi
so a si ding!
Vainim in tlangval a cakter dingih,
Sabit in fala tla a cakter
hai ding.
Currently Selected:
ZEKHARIAH 9: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
