ZEKHARIAH 10
10
Bawipa In Luatnak Thu A Kam
1 Bawipa ih hnenah thlatir ah ṭoruah dil uh. Khawdur a tuahtu le ruah a surtertu cu amah a si. Mi hmuahhmuah ih loram a hringtertu khal Bawipa a si. 2Minung in milem le pol hnenah thu an ron, a sinan an simmi cu thulolak le thuphan lawng a si. Mi hrekkhat in mang an let, asinain a peengah an lo hruai; thinhnemnak ṭong an ṭongmi cu ṭhathnemnak zianghman a nei lo. Curuangah mipi pawl cu a hlomi tuu vekin an vakvai. Hotu an neih lo ruangah harsatnak an tong a si.
3 Bawipa in hiti in a ti. “Ka minung pawl a uktu parah ka thin a heng. Curuangah ka hrem hai ding. Judah mi pawl cu keimah ih ta an si ih Cungnungbik Bawipa keimah in ka kilkhawi ding. Anmah cu ka uarzetmi le a cakzetmi ka raldonak rang an si ding. 4Anmah sung ihsin mi uktu pawl, mi hruaitu pawl le ralbawi pawl an suak ding ih ka minung pawl an uk ding. 5Lamzin ciarbek lakih an ral a palcil rerotu ralkap pawl vekin Judah mi pawl cu nehtu an si ding. Bawipa an hnenih a um ruangah ral an do ding ih an ral sungih rangralkap pawl hman an neh ding.
6“Judah mi pawl cu mi cakzet ah
ka tuah ding;
Israel mi pawl ka runsuak ding.
An parah lainatnak ka nei ding,
An zate in an khua le an ram ah
ka hruai kir ding.
Ka hnon dah lomi vekah ruah an
si ding.
Keimah hi Bawipa an Pathian ka si,
An thlacamnak ka theihsak ding.
7Israel mi pawl cu raldo thiam
vekin an cak ding ih,
Sabitti in bangtuk in an lung
a nuam ding.
An tesinfa pawl in hi nehnak cu
an cing ding ih,
Bawipa ih thiltuahmi ruangah
an lung a awi ding.
8“Ka minung pawl ka ko ding ih
Hmunkhat ah ka finkhawm ding.
Ka run hai dingih a hlan vekin
mi tamzet ah an cang sal ding.
9Miphun dang lakah ka ṭhekdarh
zo hai naón,
Ram hlazet khal in keimah in
thei ding.
Anmah le an faate pawl an nung
suak ding ih,
An khua le an ram ah an kir
tlang ding.
10Izip ram le Assiria ram ihsin
ka hruai kir ding ih,
Anmah ih ram sungah hmun ka khuar
sak ding.
Gilead le Lebanon ram khal ah
ka umter ding;
Ram pumpuluk ah minung
an khat ding.
11Harsatnak tifinriat an tan tikah,
Bawipa keimah in tilet cu
ka vuak ding ih,
Nail tiva thuk cu a kang
ṭheh ding,
A puarthaumi Assiria ningzak in
a um ding ih,
A maksakmi Izip huham a nei
nawn lo ding.
12Ka minung pawl Bawipa ah ka
cakter ding;
Ka hmin in lamzin an feh ding,”
a ti.
Bawipa in a sim zo.
Currently Selected:
ZEKHARIAH 10: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
