RUTH 4
4
Boaz In Ruth A ṭhit
1Khawsung mi an tonkhawm awk ṭheunak khawsuah ah Boaz cu a feh ih a to. Boaz ih a rel mi Elimelek ih sungkhat pa cu cutawk lam ahcun a ra ih Boaz in a hmin in a ko ih, “Hinah ra to hnik,” tiah a ti. A ti vek cun a ra to. 2Cule Boaz in khawsung upa pahra a ko ih, “Hinah ra to hrih uh,” a ti ih an ra to ve. 3Cutikah Boaz in a sungkhat tlentu pa hnenah cun, “Naomi cu Moab ram ihsin a ra kir sal zo ih kan sungkhat a si mi, a pasal Elimelek ih lo cu atu-ah a zuar a si.
4Ka lo sim duhmi cu, loram cu na tlen duh asile hi upa pawl theih hngan ahhin tlen-aw. Na tlen duh lo a si ahcun keimah i sim aw; ziangahtile hi loram tlen theinak dingah cun nangmah na hmaisa ih kei ka neta sawn a si,” tiah a ti.
Cupa cun, “Ka tlen ding,” tiah a ti.
5Cutikah Boaz in, “Cutiih Naomi hnen ihsin loram na tlen a si ahcun, loram cu mithi pa ih innsang kut sungih a um ringringnak dingah Moab mi leengleh nu Ruth cu na tlencih a ṭul ding a si,” tiah a ti.
6Cutikah cupa cun, “Cuti a si ahcun loram cu tlen loin ka um sawn pei, ziangahtile ka ro hmuahhmuah ka sung thluh pang ding ti ka phang. Nangmah in tlen aw. Kei cu ka tlen lo sawn pei,” tiah Boaz cu a ti.
7Culai ahcun Israel ram sungah thilri le leiram an zuar ah siseh, an thleng awk tikah siseh, an thlunmi daan cu: a zuartu in a kedam a phuak ih a tlentu hnenah a pek daan a si. Cuticun an thuhla a cat ti langternak a si.
8Curuangah Boaz hnenah, “Nangmah in tlen aw,” tiih a sungkhat pa ih a ti tikah a kedam a phuak ih Boaz a pek. 9Cutikah Boaz in upa pawl le cutawkih a rami hmuahhmuah hnenah, “Elimelek le a fapa Chilion le Mahlon pawl ih thilri le leiram hmuahhmuah cu Naomi hnen ihsin ka tlen zo ih tuihsun ahhin nannih cu nan zatein thutheitu nan si. 10Cuih tlunah a thi zomi Mahlon ih nupi, Moab nunau Ruth tla cu ka nupi ah a cang a si. Cuticun thilri le leiram cu mithi pa ih innsang sungah a um ding ih a miphun lak le a khawsungah a innsang pawl cu an tel ringring ding a si. Tuihsun ah nanmah hi thutheitu nan si,” tiah a ti.
11Cutikah upa pawl le a ra telmi pawl cun, “Asi, thutheitu kan si. Na innsang sungih a ra thleng dingmi hi nunau nu cu Jakob hrangih faate tampi a hringtu Rachel le Leah bangtuk ah Bawipa in tuah hram seh. Efrath hrin sungah milian si hram awla Bethlehem khua ah na hmin thang hram seh. 12Judah le Tamar ih fapa Perez ih innsang bangtuk in hi nunau nu sungih sin Bawipa in a lo pek dingmi na faale pawl in na innsang cu mawiter hram hai seh,” tiah an ti.
Boaz Le A Tefa Pawl
13Cule Boaz in Ruth cu a inn ah a tlunpi ih a nupi ah a cang. Bawipa in Ruth cu thluasuahnak a pek ih fa a vun ih fapa a hring. 14Cule khawsung nunau pawl in Naomi hnenah, “Bawipa cu thangṭhat si ko seh. Nangmah a lo kilkhawitu dingah Bawipa in tuihsun ah tupa a lo pek zo. Israel ram sungah hi nauhakpa cu a hmin thang hram seh! 15Amah cu nunnak thar a lo petu le na tar tikah a lo hnemtu si hram seh. Cule a thi zomi na fapa ih nupi Ruth cu a lo duhdawtu a si ih fapa pasarih hnakih miṭhahnem sawn a si,” tiah an ti. 16Naomi cun a kut in naute cu a cawi; a ṭaangah a pom ih naute kilkhawitu ah a cang.
17Cule naute cu an inn hnen nunau pawl in Obed tiah a hmin an sak ih, “Naomi in fapa a nei zo,” tiah an tomi poh an sim.
Obed cu Jesse ih pa a rung si ih, Jesse cu David ih pa a rung si.
18Hi pawl hi Perez ihsin David tiang an cithlah awk daan a si. Perez in Hezron a hring; Hezron in Ram a hring; 19Ram in Amminadab a hring; 20Amminadab in Nashon a hring, Nashon in Salmon a hring; 21Salmon in Boaz a hring; cun Boaz in Obed a hring; 22Obed in Jesse a hring ih Jesse cu David#4.22 David cu Israel siangpahrang hminthang zet a si. ih pa a si.
Currently Selected:
RUTH 4: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.