RUTH 3
3
Ruth In Pasal A Tong
1Cule Naomi in Ruth hnenah, “Ka fanu, innpawn suak ding le nunkhuasak nuam dingin ka lo tawlrel sak pei. 2Na theih vekin, a nunau hnaṭuantu pawl thawn hna nan ṭuannak lo neitu Boaz cu kan sungkhat a si. Cule, ngaihnik, amah cu tuihzan ah fang ciilnak ah barli fang a thlir ding. 3Curuangah ti kholh awla, rimhmui tla hnih awla, na hnipuan ṭha bik hruk aw. Cule fang a thlirnak ahcun va feh aw; asinain a in a ei hlan cu cutawkih na um kha lo thei hlah seh. 4Cun a ih tikah a ihnak hmun kha hminsin aw. A ihthat tikah feh in a ke lam in puan kha ong awla a kiangah it ve aw.#Puan kha ong timi hi Hebru pawl daan ahcun humhimtu ka nei lo, nangmah in i humhim aw ti tluk a si. Cule amah in ziang tuah ding ti kha a lo sim ding,” tiah a ti.
5Cutikah Ruth in, “I sim vek in ka tuah thluh ding,” tiah Naomi cu a ti.
6Curuangah Ruth cu Boaz ih fang thlirnak hmun ahcun a feh ih a ni ih simmi vek cun a tuah thluh. 7Cule Boaz cu a in a ei ih nuam huahhi in a um ih, barli fang tampi an retnak ah a feh ih a it. A ihthat tikah Ruth cu thawthaang lo tein Boaz hnenah cun a feh ih a ke khuhnak puan a hliip hnuah a kiangah cun a it ve. 8Zanṭim hrawngah Boaz cu a ṭhanghoi ih a siir a her tikah a ke kiang ih nunau pakhat a ih kha a hmu ih a mang a bang ngaingai. 9Cutikah Boaz in, “Zoso na si?” tiah a sut.
Ruth in, “Na siahhlawh nu Ruth ka si. Na sungte ngaingai ka si ih i tlentu ding na si. Na puan kilte i zawn hram aw,”#Puan i zawn hram aw timi hi culai daan ahcun, i ṭhi hram aw tican a si. tiah Ruth cun a ti.
10Cutikah Boaz cun, “Ruth, Pathian in thlawsuah lo pe hram seh. Na ni Naomi parih na tuahmi hnakin atu ih na tuahmi ihsin sungkhat duh awknak cu na langter sinsin. Milian siseh, mi farah siseh, tlangval deuh sawn pasal ah na hawl lo a si. 11Curuangah zianghman phang hlah aw. Nunau ṭha na si hi khawsungmi hmuahhmuah khal in an thei thluh. Na duhmi hmuahhmuah ka lo tuah sak thluh ding. 12Na sungkhat ngaingai ka si cu a dikmi a si. Sikhalsehla kei hnakin a nai sawnmi, na sungkhat tlentu, mipa pakhat a um. 13Tuihzan cu hitawk ah hin um ko awla thaizing ah cuih na sungkhat pa cun na hrangah sungkhat ih ṭuanvo a la duh maw duh lo ti cu kan hliahter ding. A lak duh a si ahcun a ṭha ko; a lak duh lo asile a nungmi Pathian hmin sal in ka lo kam: Na hrangah ṭuanvo cu keimah in ka lak ding. Khawvang tiang hitawk ah it ko aw,” tiah a ti.
14Curuangah zinglam tiang a kiangah cun a it. Asinain a kiangah Ruth a it ti kha mi ih an theih ding cu Boaz in a duh lo ruangah Ruth cu khawvang hlanah a tho. 15Cule Boaz in, “Na korfualpi kha phuak awla hitawk ah phah aw,” a ti. A ti vek cun Ruth in a korfualpi cu a phuak ih a phah. Boaz cun barli fang han hnih tluk a pek ih a phurhter. Cule Ruth cu inn ah a tlung. 16Inn a thlen tikah a ni Naomi cun, “Ka fanu, ziang na bang?” tiah a rak sut.
Cutikah Ruth cun Boaz hnenih a hmuhmi le a theihmi hmuhhmuah a sim. 17“Cuih tlunah na lawngte ih kir ding cu a rem lo a ti ih barli fang hizat hi i ṭhen a si,” tiah Ruth in a ti.
18Cule Naomi cun, “Ka fanu, cuih thu a hliah awk hlan cu hnangam tein um ko aw. Hi thu cu tuihsun ah Boaz in a fianter ko ding, a um men lo ding,” tiah a ti.
Currently Selected:
RUTH 3: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.