RUTH 2
2
Boaz Ih Lo Ah Ruth A Feh
1Naomi cun a thizomi a pasal Elimelek ih lam in sungkhat a nei ih cupa ih hmin cu Boaz a si. Boaz cu milian le upattlak a si. 2Ruth in Naomi hnenah, “Lo ah ka feh pei ih fang attu pawl ih hrelhmi fanglep ka va hawl pei.#Hlanlaiah Hebru pawl daan ahcun fang an ah hnu ih an hrelhmi fanglep cu farah pawl in an khawm ṭheu. I zaangfahtu hnenah ka va feh pei ih ka va hawl pei,” tiah a ti.
Cutikah Naomi cun, “Va feh awla va hawl he, ka fanu,” tiah a let.
3Curuangah Ruth cu lo ah a feh ih rawl ṭuantu pawl ih dunglam in a thlun ih fanglep cu a lak vivo. A fehnak cu Elimelek ih sungkhat Boaz ih lo a rak si.
4Khua a hung tlai deuh tikah Bethlehem ihsin amah Boaz cu a ra thleng. “Bawipa cu nan hnenah um hram seh,” tiah rawl ṭuantu pawl cu cibai a buk.
Cule annih in, “Bawipa in lo thlawsuah hram seh,” tiah an sawn.
5Cutikah Boaz in a rawl ṭuantu pawl hotu, a hnen-umpa hnenah, “Khi nu khi khuilam fala so a si?” tiah a sut.
6A hnen-umpa cun, “Naomi in Moab ram ihsin a rak tlunpimi nunau a si. 7‘Zaangfah tein rawl ṭuantu pawl hi an dung ka thlun pei ih an hrelh mi fanglep ka lak hram pei,’ tiah i dil. Zingpit ihsin tutiang a ṭuan ih tubaite ah khan deu sungah a vung cawl a si,” tiah a ti.
8Cutikah Boaz in Ruth hnenah cun, “Ka fanu, thu ka lo sim ding. Khui hmanah feh hlah aw; hi lo lawngah hin rawl cu hawl ko aw. Hinah um awla ka rawl khawmtu nunau#Hebru mi pawl daan ahcun mipa pawl in fang an at ih nunau pawl in at ciami an khawm. pawl hnenah hin ṭuan aw. 9Rawl an ahnak kha zoh awla, fang attu mipa pawl cu nangmah lo hnaihnok lo dingin ka tiam zo a si. Na ti a haal a si khalle mipa pawl ih an khai ciami thawl sungih ta kha rak in aw,” tiah a ti.
10Cutikah Ruth cu a hmai leilung dai in a kun ih Boaz hnenah cun, “Ziangah so kei miphun dang nunau hi hitlukin i zaangfah ih ka zawn i ruat?” a ti.
11Boaz in, “Na pasal a thih hnuah na ni parih na tuahmi hmuahhmuah a zatein mi in in sim thluh a si. Na nu le na pa le na suahnak ram na taantanak le na hmuh dah lomi le na theih dah lomi miphun hnenih na rat thu khal ka thei thluh. 12Hitiih na tuah ruangah hin Bawipa in lo rul hram seh. A thla hnuai ih humhimnak na hawlmi Bawipa, Israel ih Pathian in a laksawng cu famkim zetin lo pe hram seh,” tiah a ti.
13Cutikah Ruth in, “I zaangfahzet a si, bawipa. Na hnen-um pawl lakih pakhat tluk hman ka si lo naón awkam ṭhazet ih i biak ruangah ka hna i ngamter zo a si,” tiah a sawn.
14Suncaw ei caan a si tikah Boaz in Ruth hnenah cun, “Ra awla sang hi ra ei ve aw; sabitti sungah ciah in ra ei aw,” tiah a ti. Curuangah Ruth cu fang attu pawl lakah cun a to ve ih Boaz cun vaikan a rak pek. Khop zetih a ei hnuah a hlahmi tla a um lai. 15Cule fanglep hawl dingih a feh hnuah Boaz in a hnaṭuantu pawl cu, “Fangcang phal pawl lak khalah fang cu hawl ve ko seh, dawn hlah uh.#Hlan lai Hebru mi pawl ih hnaṭuan daan cu mipa pawl in fangcang an at ih, fangcangtel pawl cu leilung ah an ret. Cumi cu nunau pawl in an khawm ih an thiar ih puum ah an ret. Cuih hnu ih an hrelhmi a leep cu mi farah pawl in an lak thei a si. 16Fangteel sung ihsin malte zuk uhla a sar dingah taanta hrim uh. A kawk khal kawk hlah uh,” tiah thu a pek.
17Curuangah Ruth in lo sungah fanglep cu zanlam tiang a hawl ih a ngah mi hmuahhmuah cu a vuak ṭheh tikah han khat lai a kim. 18A fang phur in inn ah a tlung ih fang a khawmmi cu a ni hnenah cun a hmuh. Cule a suncaw hlahmi khal a ni hnenah a pek. 19Cutikah Naomi in, “Tuihsun khuitawkah so fanglep na hawl? Zo ih lo ah so na ṭuan? A lo zaangfahtu pa cu Pathian in thlawsuahnak pe hram seh,” a ti.
Cule Ruth in, “Boaz an timi pa ih lo ah ka ṭuan a si,” tiah Naomi cu a sim.
20Cutikah Naomi cun, “A nungmi parah siseh, a thi ciami par khal ah siseh, zaangfahnak a thlenter ringringtu Bawipa in Boaz cu thlawsuah hram seh,” a ti. Cule Ruth hnenah, “Boaz cu kan hrinpi, kan sungkhat ngaingai sokhaw a si. Kannih in kilkhawitu ding khal amah a si,” tiah a ti.
21Ruth in, “A si ngai ding. ‘Rawl ṭuan kan ṭheh hlan lo cu ka hnaṭuantu pawl hnenah ra ṭuan ringring aw,’ i ti hngehnge,” tiah a ni cu a sim.
22Naomi in Ruth hnenah, “A si ko, ka fanu; midang loih na feh ahcun hmuhsuamnak tla na tong pang ding. Boaz lo ih nunau hnaṭuantu pawl hnenih na ṭuan cu a ṭha bik a si,” tiah a sawn. 23Curuangah Ruth cu Boaz ih hnaṭuantu pawl lakah hna a ṭuan ih barli fang le sangvut an ah ṭheh hlan lo fanglep cu a hawl. Cule a ni hnenah cun a um ringring.
Currently Selected:
RUTH 2: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.