THUFIM 3
3
Mino Pawl Hnenah Ruahnak Peknak
1Ka fapa, ka lo zirh mi pawl tla kha hngilh hlah,
Tuah dingih ka lo sim mi pawl kha ciing ringring aw.
2Ka lo zirh mi in nun saunak le nun nomnak a lo pe ding a si.
3Na hnen ihsin felnak le rintlak sinak khan ziangtik hmanah lo suahsan hlah seh;
Na hngawng ah ngerh awla, na thin sungah ngan aw.
4Cubangtuk in na tuah asile Pathian hmai le minung hmaiah duhsaknak le hminṭhatnak na co ding.
5Bawipa cu na thinlung zate in rinsan aw.
Nangmah ih ruahnak le theihnak kha rinsan aw hlah.
6Na tuah mi kipah Pathian cu thei ringring awla,
Amah in lamzin dik a lo hmuh ding a si.
7Ka fim paam tiin ruat aw hlah;
Bawipa cu ṭih awla, sualnak tansan aw.
8Cubangtuk in na tuah asile na taksa hrangah damnak a si ding ih,
Na ruh hrangah sii ṭha a si ding.
9Bawipa cu na sumsaw le na thlairah hmaisa bik in thangṭhat aw.
10Cubangtuk in na tuah asile na rawl inn cu rawlin a khat dingih,
Na sabit ralca beel cu sabit thar in a liam thluahthlo ding.
11Ka fapa, Bawipa ih nun simnak cu ziang rel loin va um hlah,
A lo kawk tikah na thin na hlah.
12Ziangahtile pa in a duhdawt zetmi a faate nun a sim bangin,
Bawipa in a duhdawt mi pawl cu nun a sim a si.
13Fimnak a hmutu cu mi lungawi a si,
Theihthiamnak a neitu khal a lung a awi ve.
14Fimnak cu ngun hnakin a ṭha sawn ih,
Sui hnakin a man a khung sawn a si.
15Fimnak cu lungvar hnakin a man a khung deuh ih,
Thil dang thawn tahṭhim theih a si lo.
16Fimnak in nun saunak le lennak le upatnak a lo pek a si.
17A lamzin cu nunkhua nomnak lamzin a si ih,
A lamzin hmuahhmuah cu hnangamnak a si.
18Fimnak neitu tla cu an lung a awi ih,
Fimnak in nunnak a pek a si.
19Bawipa in leilungpi cu a fimnak thawn a sersiam ih,
A theihthiam theinak thawn van cu a hngetter.
20A fimnak in tiva a luanter ih,
Leilung ih ruah sur dingah mero a umter.
21Ka fapa, na fimnak le na ruahthiamnak kha kai hnget aw,
Na hnen ihsin ziangtik hmanah tlanter hlah aw.
22Na thlarau hrangah nunnak a si dingih,
Na hngawng hrangah mawinak a si ding.
23Na lamtluan ah himdamte in na feh thei ding ih,
Rilhbahnak khal na tong dah lo ding.
24Zan na ih tikah na ṭih lo dingih,
Ih hmuh thawte in zanvaar na ih that ding.
25Mi ṭha lo pawl hnenah thlisia bangin siatnak a thlen tikah,
Zianghman donharnak na hrangah a um lo ding.
26Bawipa in himdamte in a lo fingkhawi ding ih,
Thang sungah a lo tlater dah lo ding.
27A ṭul a sammi pawl hnenah na tuah thei zat tiangin thil ṭha kha tuah aw.
28Na innhnen kha tu rori ah na bom thei mi asile thaizing tiang hngakter aw hlah.
29Nangmah rinsan in na kiangah a ummi na innhnen kha a tlun ah harsatnak tuah dingin tum aw hlah.
30Na parah siatnak a tuah dah lotu va to rero hlah.
31Mi helhlong kha va daw hlah,
Amah bangih tuah ding khal va ruat hlah.
32Zianghrangah tile,
Bawipa in ṭhat lonak a tuahtu pawl cu a hua ih,
Miding pawl cu a humhim a si.
33Bawipa in mi sualral pawl ih inn kha a camsiat ih,
Miding pawl ih inn cu thluasuahnak a pek.
34Miziang siar lotu pawl cu ziangah a siar ve lo ih,
Mi tangdortu pawl parah duhdawtnak a langter.
35Mifim pawl in upatnak le sunlawinak kha an ngah dingih,
Mi aa pawl cu ningzahnak lawng an co ding.
Currently Selected:
THUFIM 3: FCL
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.