JOB 6
6
Job in hiti in a sawn:
1-2Ka tuarnak le riahsiatnak hi
Cuaithlainak ah a khing thlai
sisehla,
3Tifinriat ih vunnel hnakin an rit
sawn ding.
Ka ṭong hraang in lo mangbangter
hlah seh.
4Cungnungbik Pathian ih conkiang
in ka sungah i kalh;
A tur cu ka taksa pumpi ah a zai.
Pathian in ṭihnungza thil pawl
ka hmaiah a song.
5Laak cu hrampi a piat tikah
a lung a kim ko;
Caw khal daitein hrampi ro a ei.
6Asinain thawtnak neilo, ci phulh
lo rawl cu zoso a ei thei ding?
Arti hawng in ziang thawtnak so
a neih?
7Cubangtuk rawl ei ding cu
ka hiar hrimhrim lo;
Ka ei mi hmuahhmuah cu ka ning
seksek thluh.
8Ziangah so ka dilmi cu Pathian in
i pek lo ding?
Ziangah so ka thlacamnak cu i leh
lo ding?
9Pathian in dip seksek in i rial
sehla,
A kut suah in i cemter sawn sehla
ka va duh so!
10I that ding ti thei ningla
lungawi in ka khir ding,
Ziangtluk ih ka tuar hmanah!
Pathian cu a thianghlim, ka thei.
A thupekmi cu ziangtik hmanah
ka el dah lo.
11Nung hrih dingah ziang bangtuk
thazaang so ka neih lai?
Beiseinak zianghman nei loin
ziangah so ka nun duh rero?
12Lungto ih tuahmi maw ka si?
Ka ruangpi hi dar maw a si?
13Hum-aw thei dingin thazaang
ka nei nawn lo;
Bomnak duh ah pan ding ka nei
fawn lo.
14Atu vekih zonzaih caan ahcun,
Pathian ka dungtun ah siseh,
dungtun lo ah siseh,
rinsantlak rualpi ka ṭul a si.
15Sikhalsehla nannih ka rualpi
pawl cu,
Ruah a sur lo tikih a caar mi
tiva bangin i phiartu nan si.
16Cuih tiva pawl cu vur le tikhal
in an khat naón,
17Ni a sat tikah an zup ṭheh,
a tawne tiangin a kang thluh.
18Rannung thawn khualtlawng mi
lamzin an hlo,
Tidai hawl in an vak ih nelrawn
ah an thi.
19Sheba le Tema#Sheba le Tema cu Arabia ram ih khua an si ih sumtuahnak ah a ṭha mi khua an si. khua ihsin
ṭilva ruun thawn khualtlawng mi
pawl tla in an hawl.
20Asinain a caar mi tiva kapah
an ruahsannak a cem.
21Nannih tla cu ka hrangah cun
cuih tiva vek nan si.
Ka sizia in hmu tikah nan mang
a bang ih in ṭih.
22Laksawng i ra pe uh ka lo ti
maw si?
Ka ai ah mi pakhatkhat nawhthuh
pek ka lo fial maw si?
23Culole ka raal le zaangfah nei lo
mihremtu kut in i ra hum uh,
ka lo ti maw si?
24Asile i zirh hnik hmeen uh!
Ka sualnak i sim hnik uh!
Ṭong loin daitein ka um ding ih
ka lo ngaihnik hai ding.
25Ṭong tluangtlam cu lung a lut,
Asinain nan ṭong mi pawl cu
thulolak lawng a si.
26Ka ṭong mi hi thli meen a si
tiah nan ruat!
Asile ziangah so ka thinpihnak
ṭongkam pawl cu in leh duh rero?
27Ngakṭah farah nauta pawl cu
camcawhfung zuknak ah nan hmang ih,
Nan rualpi ṭha bik nekrawk ih
nanmah lian ding nan tum.
28Ka mithmai i zohhnik uh!
Thuphan ka per lo ding.
29Nan luan tuk zo! Mi namnuai
nawn hlah uh!
I hnong hlah uh! Ka thu cu a dik
a si.
30Asinain thuphan per rero ah
in ruat;
A dik le dik lo thleidang thiam
lo ah in ruat.
Currently Selected:
JOB 6: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
