JOB 10
10
1Nun hi ka ning thlang,
A siakha zetmi ka phunzainak hi
ngaihnik aw!
Ninghangzet in ka sim ding.
2Maw Pathian, mi mawh na si i ti
siang hrih hlah;
Ziangvek sual so i puh, i sim hnik!
3Zaangfah nei loih i namsuk rero
hi a dik na ti mawsi?
Na kutzungih na tuahmi nautat hi
a dik na ti mawsi?
Miṭha lo pawl ih tumtahmi hnihsan
men hi a ṭha na ti mawsi?
4Milai ih hmuhdan vekin thil
na hmu ve mawsi?
5Kan nunnak a tawi vekin na nunnak
a tawi ve maw?
6Ziangah so ka sualnak lawnglawng
na hawl ih,
Ka mawhnak fate bik khal na coih
suak ṭheh?
7Mawhnak ka neih lo hi na thei,
Asinain zohman in na kut sung ihsin
in runsuak thei lo ding tikhal
na thei ko.
8Na kut in i tuah ih i siam;
Atu-ah cuih na kut cun i siatsuah.
9Tlak in i siam hi hngilh hlah aw.
Leivut cang sal ding in i rialdip
ding maw si?
10Ka pa kha keimah hrin theinak
thazaang na pek ih,
ka nu ih pum sungah i ṭhanter.
11Ka ruangpi cu ruh le tha in na
tuah ih,
Ka ruh cu tit le vun thawn
na pehcih.
12Nunnak i pek ih duhdawtnak khal
i neihter.
I kilkhawi ruangah ka nung a si.
13Sikhalsehla na lung sungah
a thupte ih in na retmi,
Na thin sungah na ret thupmi cu
ka thei ngah a si:
14Ziangtikah sual pei maw, tiin
i bawh ringring;
Ka sualnak a ummi cu malte hman
ngaidam na tum hrimhrim lo.
15Mawhnak ka neih vete in miharsa
le mivanduai ah ka cang.
Thil ṭha ka tuah khalle lom ka
tong cuang lo.
Ka awloksong in ningzak in ka um.
16Hlawhtlinnak hnihkhat ka neih le
kiosa bangin i hawl.
Keimah tuahmawh duh ah mangbangza
tla na tuah.
17Ka thu a theitu na nei ringring;
Ka parih na thinhengnak cu a luar
deuhdeuh;
Ka parah na huham cu a thleng ih
a thuah a thuah in in nuai ciamco.
18Pathian, ziangah so ka nu ih
pum sung ihsin i suahter?
Zohman ih hmuh man hlanah
rak thih sawn taak ding.
19Ka nu ih pum sung ihsin thlaan ah
rak lanta ningla,
A va ṭha deuh ngaingai ding naón,
A rak seem dah lo bangin.
20Ka nunnak hi a cem zik thlang
a si lo maw?
I hnaihnok duh nawn hlah!
Tikcu malte ka neihsun cu lungdai
in ka hmang pei.
21Ka feh cing ding, ‘Kir sal nawn
lonak ram ah’!
Riahsiatnak ram le khuathimnak
ramah ka feh ding.
22Thimnak le thihnak phenthlam le
buairuainak thawn a khat mi,#A thim mi ram timi cu mithi khua a ti duhnak a si ih leilung hnuai ah phenthlam bangin mithi pawl an um tiin an zum.
Tleunak hman a thim thothonak
ram ahcun ka feh ding.
Currently Selected:
JOB 10: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
