THUṬHENTU 4
4
Deborah Le Barak
1Ehud a thih hnuah Israel mi pawl cu Bawipa ih hmaiah an sual lala. 2Curuangah Bawipa in Hazor khawpi ih a um mi Kanaan siangpahrang Jabin cu Israel a nehter. Siangpahrang Jabin ralkap pawl hotubik cu Zentail pawl ih khawpi Harosheth ih a ummi Sisera a si. 3Jabin cun thir rangleng zakua a nei ih Israel mi pawl cu zaangfahnak neilo le ṭha lo zetin kum kul sung a neh-nen hai. Cule Israel mi pawl cu Bawipa hnenah an aihram lala.
4Culai ih Israel pawl thu rak ṭhensaktu cu Lappidoth ih nupi nunau profet Deborah a si. 5Efraim ih tlangpar ram, Ramah le Bethel karlak ah ungkung pakhat a um ih acuih ungkung hnuai ahcun Deborah cu a to ṭheu ih Israel mi ih thu pawl cu a ṭhensak ṭheu. Israel mi pawl in a cuih hmun ahcun an va fuk ṭheu. 6Cule Naftali ram, Kedesh khawpi ih ummi Abinoam ih fapa Barak cu Deborah in a ko ih, “Bawipa, Israel ih Pathian in, ‘Feh aw la na minung pawl cu Tabor Tlangah hruai hai aw. Naftali le Zebulun hrin pawl sung ihsin ralkap thawng hra la awla, 7Jabin ralkap pawl hotu Sisera cu nangmah do dingah Kishon Tiva ah ka ratpi ding. Rangleeng pawl le ralkap pawl thawn a ra ding naón amah ih tlunih nehnak ka lo pe ding,’ a ti a si,” tiah a sim.
8Cutikah Barak in, “Ka hnenih na feh asile na sim vekin ka feh ding; na feh lo ahcun ka feh ve ce lo ding,” tiah Deborah cu a sawn.
9Cule Deborah in, “A ṭha, ka feh ding; sikhalsehla ral kan neh tikah ziang hman hminthannak na ngah lo ding, ziangahtile Bawipa in Sisera cu nunau kut sungah a pe ding a si,” tiah a ti. Cule Deborah cu a pok ih Kedesh ah Barak thawn an feh. 10Zebulun le Naftali mi pawl sung ihsin Barak in ralkap thawng hra a lak ih Kedesh ah a fehpi. Deborah khal a feh ve.
11Culai ah Ken mi pa Heber in Kedesh kiang Zanannim ih a ummi sasua kung kiangah a puanthlam a sak. Heber cu Moses farnu ih pasal Hobab#Hobab timi hi Hebru Cathiang hrekkhat ahcun Moses puzon ti in a um. ih tefa sin pawl Ken miphun hnen ihsin a cer ih Kedesh kiangah a thleng.
12Sisera cu Abinoam ih fapa Barak, Tabor Tlang a thleng zo tiah an sim. 13Cutikah a thir rangleng zakua le a ralkap hmuahhmuah a khawm ih Zentail mi khawpi Harosheth ihsin Kishon Tiva tiang an feh.
14Cutikah Deborah in Barak hnenah, “Feh aw; tuihsun hi Bawipa in Sisera na kut sungih a thlenter ni a si. Bawipa in a lo hruai a si,” tiah a ti. Cule Barak cu a ralkap thawng hra thawn Tabor Tlang ihsin a vung feh. 15Barak le a ralkap pawl cun an nam ih cu vete cun Sisera le a rangleng le a ralkap pawl hnenah Bawipa in buainak a thlenter. Sisera cu a rangleng ihsin zamrang in a ṭum ih a ke in a tlan. 16Barak in Sisera ih rangleng pawl le ralkap pawl cu Zentail mi khawpi Harosheth tiang a dawi ih ralkap pakhat hman zuah loin a that ṭheh a si.
17Sisera cu a tlan vivo ih Ken miphun Heber ih nupi Jael ih thlam lam a pan; ziangahtile Hazor khua siangpahrang Jabin le Heber innsang cu an rual-aw zet. 18Cun Jael cu a feh ih Sisera a va hmuak ih a hnenah, “Ra aw, ka bawipa, ka thlam ah ra aw: ziang hman ṭih ding a um lo,” tiah a rak ti. Curuangah Sisera cu a feh ih Jael cun a puanthlam ih puanzar phenah a thup. 19Cule Sisera in, “Ka ti a haal ih tidai i pe hram aw,” tiah a dil. Jael in saphaw tithawl a ong ih cawhnawi a lakih a pek; a in thluh hnuah a thup sal. 20Cun Sisera in, “Thlam kaa ah khan ding awla mi pakhatkhat a rat ih thlam sungah zo tal an um maw ti ih a lo sut asile um hlah, tiah rak ti aw,” a ti.
21Cule Sisera cu a bangtuk ruangah ihhmuh thawzet in a it that. Cutikah Jael cun sobul le puanthlam khennak fungzum a lakih a thup tein a peel ih a hnakhang ihsin leilung tiang tlang ko in a khencih. Cunah Sisera cu a thi. 22Barak cu Sisera hawl in a rat tikah Jael in a va hmuak ih a hnenah, “Hinah ra awla na hawl reromi mipa cu ka lo hmuh ding,” tiah a ti. Barak in Jael cu a thlun ih, a lu ihsin fungzum thluah niarniar in leilungah Sisera a rak thih kha a hmuh.
23Cuih sunah Israel mi hrangah Bawipa in Kanaan siangpahrang Jabin cu a neh. 24Israel mi in Siangpahrang Jabin cu an nor deuh deuh ih a neta bik ah an thah.
Currently Selected:
THUṬHENTU 4: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.