THUṬHENTU 16

Gaza Ah Samson

1Samson cu Gaza ah a feh ih cutawkah hlawhhlang nu pakhat a hmu ih a hnenah a it. 2Gaza khua mi pawl in an khua ih Samson a um kha an theih tikah an kulh ih zanvarte khawpi kulhnak kotka ihsin an bawh. Zanvar zianghman an tuah lo, an dai khepkhep. An thinlung tein, “Khawvang tiang kan bawh pei ih cutikah kan that leh pei,” tiah an ruat. 3Asinain Samson cu zanṭim tiang lawng a it. Cun a tho ih khawpi kulhnak kotka khar cu a ṭhuam pawl le a hrolh pawl le a thilri zate thawn a phawi ih a liang parih a suan hnuah tlangpar ram, Hebron khua ihsin ralden ih a ummi tlangpar tiang a phur ih cutawkah a tanta.

Samson Le Delilah

4Cuih hnuah Samson cun Sorek Phairawn ih a ummi nunau pakhat, a hminah Delilah#Delilah tihi Hebru ṭong in miderdai a si lole mithlem thiam tican a si. an timi a ngai. 5Cutikah Filistin hotu lal panga pawl Delilah hnen ah an feh ih, “Na tlangvalpa hi a hnik rak del aw; ziangtión so hi tluk lawmmam ih a cak tile, ziangtión so kan neh thei ding ih kan kaih ih kan ṭem thei ding, ti pawl a theih rak zuam hnik aw. Na ti thei asile ngun tangka thawngkhat le zakhat ciar kan lo pe ding,” tiah an ti.

6Curuangah Delilah in Samson hnen ahcun, “Ziangti in so hiti lawmmam ih na cah, i sim hnik aw he. Thuṭhimnak ah midang in a khih le a kaih lo tum bang hai sehla ziangti talin an lo kai thei lo ding maw?” tiah a sut.

7Cutikah Samson in, “A caar hrih lomi thalhri thar pasarih in i khit hai sehla ka tha a cem thluh ding ih midang vek thotho ka si ko ding,” tiah a ti.

8Cule Filistin hotu pawl cun a caar hrih lo mi thalhri thar pasarih cu Delilah an pek ih cumicun Samson cu a ṭawn. 9Inn khaan pakhat sungah mi a hrekkhat a ret ih Delilah in, “Samson, Filistin mi an ra!” tiah a au ciamco. Cutikah meisa urmi pat bangtuk in thalhri pawl cu Samson in olte in a botcat. Samson ih cahnak thuthup cu an thei lo.

10Cutikah Delilah cun, “Ruat hnik, thuphan i sim ih capohnak men ah i hman hi! Atu cu ṭhatein i sim thlang aw, ziangtinso mi in an lo ṭemtar thei ding,” tiah Samson cu a sut.

11Cule Samson cun, “Zohman ih hman dah hrih lomi hrihrual in in ṭem a si ahcun ka tha a cem pei ih midang vek thotho ka si ko ding,” tiah a ti.

12Curuangah Delilah in hrihrual tharte tampiin a lak ih Samson cu a ṭem hnuah, “Samson, Filistin mi an ra!” tiah a au. Mi a hrekkhat in khatlam khaan sung ihsin an rak bawh. Asinain Samson cun a kut an ṭemnak hrihrual cu pat phang khat vekin a botcat thluh thotho.

13Cutikah Samson hnenah, “Caponak men ah i hmang ih i bum thotho a si. I sim ko aw, ziangtinso an lo ṭem thei ding?” tiah Delilah in a sut.

Cule Samson in, “Ka samphiar phiar sarih hi thiam ah tak awla, thiamtleeng in hngette in khawncih awla, cule thiamtlang ah ṭemcih awla, ka tha a cem ding ih mi dang vek thotho ka si ko ding,” tiah a ti.

14Cule Delilah in Samson cu a thlim ih a ihthah lai ah a samphiar phiar sarih cu a lak ih thiam ah a tah; thiamtleeng in hngette in a khawncih, thiamtlang ah a ṭemcih ih, “Samson, Filistin mi an ra!” tiah a au. Samson cu a ṭhang ih a ṭhuam pawl thawn a thiambu pi in a thawhpi luihlo mai.

15Curuangah Delilah cun, “Na thinlung in i duh ngaingai lo naón ziangah so ka lo duh tiah i ti? Voithum tiang rori i hmuhsuam ih ziangruangah so hiti ih na cah, ti hman i sim duh lo,” tiah Samson cu a ti. 16Nikhat hnu ni khat, “I sim thlang aw he,” tiah Samson cu a ngiar ringring. Cutiin thlah loih a ningcerh tuk ruangah Samson cu a thin a pit ih thih hman a duh sawn thlang. 17Cule a netnak ah a thuthup cu a phuan. “Ka sam hi meh dah lomi a si. Ka suah thlak vete in Bawipa hnenih pekmi Nazir mi ka si. Ka sam hi met sisehla ka tha a cem thluh ding ih midang vek ka si ko ding,” tiah a sim.

18Cutikah thuhman i sim zo a si, ti kha Delilah in a thei. Filistin hotu pawl hnenah thu a cah ih, “Atu voikhatte cu ra hrih uh. A thuthup i sim zo a si,” tiah a ti. An ra ih tangka khal cu an rak keng. 19Delilah in Samson cu a cawn parah a thlim, a ihthatter ih mi pakhat a kawh ih Samson ih samphiar phiar sarih cu a hleptan thluh. Cule Delilah in neh hram a thok. Samson ih thazaang cu a cem ih a cah-nak hmuahhmuah a hlo ṭheh. 20Cutikah Delilah in, “Samson, Filistin mi pawl an ra!” tiah a au. Samson cu a ṭhang ih, “A hlan vek thotho in ka tho ding ih ka luat ko ding,” tiah a ruat. Bawipa in a fehsan zo kha a thei lo. 21Filistin mi pawl in an kai ih a mit an phorh ih Gaza ah an vun hruai. Cutawk ahcun dar ih tuahmi hreng an sut. Thawng sungah sangvut an rialter. 22Asinain a sam cu a cerh vivo sal.

Samson A Thi

23Lungawi ih aih ding le an khawzing Dagon hnenih thawinak nasazet pek dingah Filistin siangpahrang pawl cu hmun khatah an khawm aw ih,

“Kan khawzing in kan ral Samson,

Kan kut sungah a thlenter zo,”

tiah hla an sak.

24Misenpi in Samson an hmuh tikah an khawzing Dagon an thangṭhat ih,

“Samson in kan ram cu kan ruak

in a khahter,

Kan khawzing in kan ral cu

kan kut sungah a thlenter,”

tiah hla an sak ciamco.

25Misenpi cu an nuamzet ih, “Samson ko uh, hnihsuah capoh sainak ah kan hmang pei,” tiah an ti. Thawnginn ihsin Samson cu an rak hruai ih hnihsuah capoh sainak ah an hmang. Cule ṭhuam le ṭhuam karlak ah an dinter. 26A kut kai tahrat in a rak hruaitu nauhakpa hnenah Samson in, “Hi inn ṭhuam pawl i thamter hnik aw, a hngauhsan ka duh,” tiah a ti. 27Cuih inn sungah nunau le mipa a khat in an um. Filistin siangpahrang panga pawl khal an um ih hnihsuahnak ih an hman rero mi Samson zoh duh ah minung thawng thum tlunta don ah an um.

28Cutikah Samson cu thla a cam ih, “Maw Cungnungbik Bawipa, i run thei hram aw. Maw Pathian, nangmah ih zaangfahnak in tuihṭum ṭum khatte hi cu thacahnak i run pe hrih hram awla ka mit pahnih an phorh manah an tlunih phu ka lak theinak dingin i zaangfah hram aw,” tiah Pathian hnenah a dil. 29Samson cun inn dotu sutpi pahnih cu a pom ih kut khat in sutpi pakhat veve a kaih ih a nawp-aw ih, 30“Filistin mi pawl thawn thi tlang ko ning law,” tiah au phah in sutpi pahnih cu a tha neih tawp in a tuul ciamco ih innpi cu misenpi le siangpahrang pawl parah cun a vung cim luailo. Samson in cutawk ih a thahmi minung pawl cu a nun sungih a thahmi hmuahhmuah hnakin an tam sawn.

31A unau pawl le a sungkhat pawl in a ruak cu an vung lak. A ruak cu an tlunpi ih Zorah le Eshtaol karlak a pa Manoah ih thlaan ah an phum. Samson in kum kul sung Israel hotu a ṭuan.

Currently Selected:

THUṬHENTU 16: FCL

Highlight

Copy