HOSEA 7
7
1“Ka minung Israel damter ka tum ih ṭhangsoter sal ka duh naón an ṭhatlonak le thil sual an tuahmi lawng ka hmu. Samaria ah pakhat le pakhat an bum aw; inn an bauh ih thil an ruk; lamzin ah mi thil an long. 2Thil ṭha lo an tuahmi hi ka ciing ringring ding ti an ruat baan hrimhrim lo; an sualnak in a kulh ṭheh kha hmu loin ka um thei fawn lo,” a ti.
Siangpahrang Inn Ah Phiarnak
3 Bawipa in, “Miseenpi in an siangpahrang le an bawi pawl an bum an phiar ih an lung an tluanter. 4An zatein ṭaangṭawm sualnak tuahtu an si ih rintlak lo hlir an si. Sang tuahtu in sang a nawng ih meisa lingzet parah sang a rawh ih a lingzet vekin an mi huatnak cu a ling ringring a si. 5Siangpahrang in puai a tuah ni ah siangpahrang le a kut thuai bawi pawl cu zu an ri ih mi aa vek an si. 6An mi phiarnak cu meisa vekin a ling. An thinhengnak cu zanvar a sa ih zinglam ahcun meisa alh bangin a hliau.
7“An thin a sa tukih anmah uktu pawl an thah. An siangpahrang cu pakhat hnu pakhat an that naón bomnak dil in zohman ka hnenah thla an cam lo,” tiah a ti.
Israel Le Miphun Dang Pawl
8 Bawipa in, “Israel mi cu a hrek lawng a hminmi sang bangtuk an si. An kiangkap ih miphun dang pawl an rinsan ih, 9ramdangmi an rinsan ruangah an thazaang a nau ti kha an thei lo. Reipi an nung nawn lo ding; cu khal an thei cuang lo. 10An puarthaunak kha an sualnak langtertu a si. Hi bangtuk thil a cang ṭheh hnu khalah hin Bawipa an Pathian keimah ih hnenah an kir duh lo. 11Israel cu ruahnak nei lo laileng aa bangin a vak; hmaisa ah bomnak dil in Izipt ah a feh; neta ah Assiria hnenah a tlan. 12Sikhalsehla anmah kaihnak ah sur ka siah ding ih an feh phah ah vate bangin ka awk ding. Thilsual an tuah ruangah ka hrem ding.
13“Mi vanduai an si! In taan zo ih in dodal zo. Annih cu siatsuah an si ding. A hum ka duh hai naón keimah riangri ka thang in siat. 14Thinlung ngai in thla an cam lo; thlacam ai ah leilung ah an hlon aw ih Pathian thei lo pawl bangin an aukiau. Rawl le sabit hrangih thla an cam tikah Pathian thei lo pawl bangin an sun aw ciamco. Ziangtluk raltho phun so an si! 15Anmah cawmtu le a caktertu cu keimah ka si naón keimah zuarthlaitu riangri ah an cang. 16Cahnak zianghman a nei lomi khawzing hnenah in pialsan cingcing. Annih cu a kawimi li vekin rintlak lo an si. An hotu pawl cu puarthau zetih an ṭong ruangah sarthih in an thi ding ih Izipt mi pawl in an hnihsan ding,” tiah a ti.
Currently Selected:
HOSEA 7: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
