SEEMTIRNAK 50

1Cutikah Josef in a pa ih ruak cu a pom ih ṭap rero phahin a hmai a hnam. 2Cun a kuthnuai-ih hna a ṭuantu sibawi pawl cu a pa ih ruak siat loih erh dingah a fial ih a fial vekin an tuah. 3Miruak siat lo dingih an tuah tikah a rei ṭheu bangtuk in ni sawmli sung an rei. Cun Izipt mi pawl in Jakob thih cu ni sawmsarih sung an ul ih an ṭah.

4A pa an ṭah ni a cem hnuah Josef in siangpahrang ih bawi pawl hnenah, “In zaangfah a si ahcun hiti in Faro#50.4 Faro: timi hi mi hmin a si lo; a hnaṭuan hmin a si ih, siangpahrang tican a si. hnenah i va sim sak uh: 5‘Ka pa a thih hlan deuhah Kanaan ram ah amah hrang rori ih a laihmi thlaan ah keimah ih phum dingin thukamnak i tuahter ih thukamnak cu ka tuah. Curuangah ka pa va phum dingah i thlah hram aw. Zamrangte in ka ra kir sal ko ding a ti,’ ti ah in sim sak uh,” ti ah a ti. 6Cule Faro in, “Thu na kam vekin phum dingah va feh aw,” ti ah thu a khirh sal.

7Curuangah a pa phum dingin Josef cu a feh. Faro kuthnuai-ih bawi hmuahhmuah, a innsangih mi upa deuh le Izipt ram sungih hruaitu deuhdeuh tla in Josef cu an thlun. 8Cun Josef ih innsang hmuahhmuah, a unau pawl le a pa ih sungte pawl tla an feh thluh. An nauhak pawl le an tuu, an me le an caw pawl lawnglawng Goshen ram ah an taang. 9Rangleeng in siseh, rangpar in siseh, an feh dutdo ih an tam ngaingai.

10Jordan tiva ihsin nisuahnak lamih a ummi Atad ih fangcilnak rawn an thlen tikah reipi mithiphum pumkhawmnak an tuah. Cule Josef in ni sarih sung mithi zuun a ngai. 11Cuticun Atad hmunih an mithi ngai daan cu Kanaan mi in an hmuh tikah, “Izipt mi pawl in mithi ngainak nasazet an tuah a sihi,” ti ah an ti. Curuangah cuih hmun cu Abel Mizraim#50.11 Abel Mizraim timi cu Izipt pawl ṭahnak ti thawn a aw suah a bang aw. ti ah an ko ih Jordan tiva ihsin nisuahnak lamah a si.

12Cuticun Jakob ih thupek vekin a fapa pawl in an tuah. 13Kanaan ram ahcun a ruak cu an phur ih Hit mi pa Efron hnen ihsin thlaan hrangah Abraham in a rak leimi ram, Mamre ihsin nisuahnak lamih a ummi Makpelah-ih lungkua ah an phum. 14A pa a phum ṭheh tikah Josef cu a unau pawl le a pa phum dingih a fehmi hmuahhmuah tla thawn Izipt ah an kir.

Josef In A Unau Pawl An Hna A Ngamter

15An pa a thih hnuah Josef ih unau pawl in, “Josef in in rak hua ziar laiin a tlunih harsatnak kan thlentermi hmuahhmuah ruangah in lehrul tum sehla ziangtinso kan ti ding? ti ah an ti-aw ih an thin a phang ngaingai. 16Curuangah Josef hnenah, “Na pa in a thih hlanah thu in cahta: 17‘Josef rak sim uhla, thil ṭha lo a tlunih nan tuahmi sualnak le siatnak cu lo ngaithiam seh,’ a ti. Curuangah kannih na pa ih Pathian ih siahhlawh pawl hi in ngaithiam hram aw,” ti ah thu an cah. A cuih thu an sim tikah Josef cu a ṭap.

18Cun a unau pawl cu an ra ih a hmaiah an kuun ih, “Na hmaiah na sal kan si ko,” ti ah an ti. 19Asinain Josef in, “Phang hlah uh. Pathian ai cu ka awh thei lo ding. 20Keimah siatsuah dingah khua nan khang naón Pathian in thil ṭha-ah a canter a si. Cucu tuih sunih kan hmuh vekin mi tampi humhimnak dingah a si. 21Curuangah nan thin phang hlah uh. Nanmah siseh, nan faate pawl siseh, ka lo cawm hai ding,” ti ah a ti. Cuticun Josef in ṭong thlum in a hneem hai ih an hna a ngam sal.

Josef Thihnak

22Josef cu Izipt ramah a pa ih sungkhat pawl thawn an um ih kum za le kum hra a ti ah a thi. 23A thih hlanah Efraim ih faate pawl suan thum tiang a hmuta. Manasseh ih fapa Makhir in faate a neih tikah Josef in a sungkhat ah a siarcih. 24Cun a unau pawl hnenah, “Kei cu ka thi thlang ding. Asinain Pathian in a lo kilkhawi ding ih hi ram ihsin a lo suah hai ding; Abraham, Isaak le Jakob hnenih a kam ciami ramah a lo hruai tengteng hai ding a si,” ti ah a ti. 25Cule Josef in Israel ih fapa pawl cu siatcam in thu a kamter ih, “Pathian in a lo veh caan a thlen ih hi ram ihsin a lo suahpi hai tikah ka ruh nan lak pei ih nan fehpi pei,” ti ah a ti. 26Cuticun Josef cu kum za le kum hra a ti ah Izipt ram ahcun a thi. Siat thei lo dingin an erh ih ruak kuang sungah Izipt ramah cun an ret.

Currently Selected:

SEEMTIRNAK 50: FCL

Highlight

Copy