SEEMTIRNAK 49
49
Jakob In A Fapa Pawl Hrang A Netabik Thucahnak
1Cun Jakob in a fapa pawl a ko ih, “Hmun khatah khawm-aw uhla hmailamah nan tlunih thil a cang dingmi ka lo sim cia hai ding,” ti ah a ti.
2“Ra uhla ngai uh,
Jakob ih fapa pawl,
Nan pa Israel thusimmi ngai uh.
3“Reuben, ka fatir,
Nang cu ka thazaang na si,
Patling ka si hnu ih
ka neih hmaisa bik na si,
Ka fapa pawl lakah
a cak bik le a hngal bik;
4Nang cu tilian bangin
mi thinsahlap na si,
Mi thupi bik na si dah lo ding,
Ziangahtile
na pa ih nusun rori na sualpi,
Na pa ih ihkhun parah
na kai ih na baalter.
5“Simeon le Levi cu unau an si,
An hriamhrei cu mi-ih thisen
luannak ah an hmang;
6An thuthup relnak ah ka tel
lo pei,
An khawkhannakah
siarcih ka si lo pei,
Ziangahtile an ai a thok tikah
mi an that,
Nomnak menah
cawcang kaiza an sat cat.
7An thinhengnak parah
camriamnak um seh,
Ziangahtile an thinhengnak
a luar tuk.
An thinlingnak par khalah
camriamnak um seh,
Ziangahtile a siakha tuk.
Jakob ram sungah ka ṭhekdarh
thluh hai ding,
Israel mi lakah ka ṭhekdarh
thluh hai ding.
8“Judah, nang cu na unau pawl in
an lo thangṭhat ding,
Na ral pawl an hngawng in
na kai ding ih,
Na hmaiah na unau pawl
an kuun ding.
9Judah cu kiosa no bangtuk a si,
Sa a deh thluh in a rolnak ah
a kir sal, ka fapa,
Judah cu kiosa vek a si;
A dok aw ṭhunṭho ih a vung
bok sal,
Zohman in an ṭhang ngam lo.
10A siangpahrang fung a keng ih,
A tesinfa pawl cu
uktu an si ringring ding.
Miphun tampi in ngunkhuai
an pe ding ih,
Upatnak in a hmaiah an kuun ding.
11A laak no cu sabit kuangah
a hren,
Sabit kuang ṭha bikah.
A hnipuan cu sabitti in a sawp,
Thii bangin a senmi sabitti ah.
12Sabitti a in nakah a mit cu
thii bangin a sen hreihrei,
Cawhnawi a in ruangah a ha cu
vur bangin a vaar fiahfiah.
13“Zebulun cu tifinriat kapah
a um ding,
A tikap tla cu tangphawlawng
colhnak a si ding;
A ram cu Sidon tiang a kau ding.
14“Issakhar cu a cakzetmi laak
a si,
A phurhmi thilrit tom hnih
karlakah a bok;
15A colhnak hmun a ṭhatzia le,
A ram a nomzia a hmuh ruangah,
Thilrit phur dingah a zaang cu
a tun ih,
Hnaṭuan khung ṭuantu
sal ah a cang.
16“Dan cu a miphun uktu a si ding,
Israel miphun pawl vek thotho
a si ding.
17Dan cu lamzin kapih rul vek
a si ding,
Zintlang ih tur neimi rulha vek
a si.
Rang kebeu ah a cuk ih rang totu
cu dunglamah a hlon.
18“Maw Bawipa, nangmah ih
runnak ka hngak.
19“Gad cu fifir pawl in an siim
ding;
Asinain a do ding ih a dawi suak
ding.
20“Asher ih loram ihsin
rawlṭha a suak ding,
Siangpahrang ih ei tlak rawl a si
ding.
21“Naftali cu a tlang dualdomi
zuknengpi,
Fano mawi zetzet neimi vek a si.
22“Josef cu hramlak ih laak,
Cerhti kiangih a tlangmi laak
bangtuk a si,
Tlang parih laak note vek a si.#49.22 Josef cu hramlakih laak - Tlang parih laak note vek a si. timi hi, Hebru Ca Thianghlim sungah a fiang lo. Josef cu a rahmi sabit hri, cirh kiangih sabit hri bangtuk a si. A hnge pawl cu pharah an zaam, ti tla a si thei.
23Zaangfahnak nei loin a ral
pawl in an hual,
An li le an thal thawn an dawi.
24Asinain Jakob ih Pathian,
Ziangkimtithei ih cahnak le,
Israel ih Lungpi,
Israel Khaltu thawngin
A li cu a kiak thei ve lo ih
A baan tha cu a cak teltelzet
a si.
25Na pa ih Pathian, nangmah a lo
bawmtu le,
A lo thluasuahtu
Ziangkimtithei Pathian in,
Van ihsin thlawsuahnak cu
ruah bangin,
Lei hnuai khalin tidai bangin,
Te le fa, ṭilva sumhnam
thlawsuahnak thawn,
26Fangvui fual le rawlhan tlingin,
Thlaithlak le rawl ṭuan
thlawsuahnak;
Khuahlan ihsin a rak ummi tlang ih
thlawsuahnak le,
Kumkhua a hmunmi tlangpar ih
duhnungza thil pawl cu,
A unau lakih mi hleice dingin
sersiammi,
Josef ih lu parah
thleng thluh hram seh.
27“Benjamin cu a hrang zetmi
cinghnia paak a si;
A deh ciami cu zinglamah a ei,
Zanlam ah a ngahmi sa cu
a ṭhendarh ciamco,” ti ah a ti.
28Hi pawl hi Israel miphun hleihnih an si ih an hnenah an pa ih thucahmi an si. Pakhat hnu pakhat anmah thawn a mawitawk in thluasuah a pek ciar a si.
Jakob Thihnak Le Phumnak
29Cun Jakob in a fapa pawl hnenah, “Ka pu le ka pa hnenih feh ding ka si thlang. Kanaan ram Mamre ihsin nisuahnak lam Makpelah ah, 30Hit mi pa Efron hnen ihsin ram le lungkua cu thlaan hrangah Abraham ih leimi a um. Cutawkah in run phum pei. 31Cutawkah Abraham le a nupi Sarah phum an si. Isaak le a nupi Rebekah khal cutawkah phum an si thotho. Keimah in ka nupi Leah khal cutawkah ka phum zo. 32Cuih ram le a sungih a ummi lungkua cu Hit mi pa hnen ihsin leimi a si,” ti ah a ti. 33A fapa pawl hnenih a thucahmi a ṭheh vete in Jakob cu a ihkhun parah a ke a com ih a thaw a cemcihta. Cuticun a pu le a pa hnenah a fehta a si.
Currently Selected:
SEEMTIRNAK 49: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
